2026 жылдың жазы инвесторларға не әкелмек: маусымның негізгі инвестициялық идеялары

2026 жылдың жазы күшті корпоративтік есептермен, қазақстандық экономиканың негізгі секторларындағы тарифтердің өсуімен және жаһандық нарықтардағы жасанды интеллект төңірегіндегі жалғасып жатқан инфрақұрылымдық буммен ұштасуда. Freedom Broker сарапшылары жоғары дивидендтік кірісі бар қазақстандық эмитенттерден бастап технологиялық және энергетикалық секторлардың әлемдік көшбасшыларына дейінгі осы маусымның инвестициялық идеялар жинағын дайындады.

 

Қазақстан нарығы

Данияр Оразбаев, Freedom Finance Global талдаушысы

 

Қазақстан компаниялары жаз маусымына бірінші тоқсанның әртүрлі нәтиже көрсеткен қаржылық қорытындыларымен қадам басып отыр. Компаниялардың түсімі негізінен өсіп келеді, алайда бірқатар компанияның таза пайдасы өткен жылмен салыстырғанда төмендегенін көрсетті. Сондай-ақ жаздың тағы бір ерекшелігі - әлі толық аяқталмаған дивидендтер маусымы. Осы орайда сарапшылар тәуекел мен ықтимал кірістіліктің тартымды арақатынасына ие бірнеше идеяны ерекше атап өтеді.

Жаздағы көшбасшылар

• АО KEGOC (KEGC): KEGOC бірінші тоқсанның қорытындысы бойынша күшті есеп беріп, түсімнің өткен жылдың сәйкес кезеңімен салыстырғанда (ж/ж) 44%-ға өскенін көрсетті. Бұған қоса, маржиналдылықтың барлық көрсеткіштері жақсарды, ал компанияның таза пайдасы 2025 жылмен салыстырғанда 80%-ға өсті. Мұндай өсім тарифтердің көтерілуі арқасында мүмкін болды. Компанияның 2026 жылдың мамыры мен қыркүйегі аралығындағы тарифті біздің күткенімізден де жоғары деңгейге арттырғанын атап өтеміз. Негізгі тәуекел ретінде алдағы жылдардағы ірі күрделі салымдар мен айтарлықтай өсімді көрсетпеуі мүмкін жаңа бес жылдық тарифтік кестенің бекітілуі қалып отыр. 

• «ҚазТрансОйл» АҚ (KZTO): мұнай тасымалдау компаниясының акциялары жақын арадағы түзетуден кейін қайта қалпына келу үрдісін көрсетіп жатыр. Компания 2025 жылдың қорытындысы бойынша жақсы есеп берді және биылғы жылы дивидендтерді бір акцияға шаққанда 118 теңгеге дейін (+37%) арттыра алды, осылайша соңғы 5 жылда алғаш рет үш таңбалы деңгейге қайта оралды. Сонымен қатар екінші жартыжылдықтан бастап мұнай экспортына арналған тарифтің 10,6%-ға өскенін атап өтеміз, бұл қаржылық көрсеткіштерді айтарлықтай жақсартуы тиіс. Екінші жағынан, акциялар жазда дивидендтер кезеңі аяқталғаннан кейін көбіне бейтарап динамика көрсетеді, бұл жолы ол 3 маусымда өтеді. Дегенмен, бұл үрдіс әрдайым қайталана бермейді және егер компанияның қаржылық көрсеткіштері одан әрі жақсаруын жалғастырса, онда жаңа өсім толқынын көруіміз мүмкін.

• «Altyngold PLC» (ALTN): LSE және KASE биржаларында саудаланатын алтын өндіруші компания байыту фабрикасының толық операциялық қуатына шыға отырып, 2025 жылдың қорытындысы бойынша жақсы есеп берді. Компания өткен жылы рекордтық 53 мың унция алтын өндіре алды, бұл басшылықтың бұған дейінгі 50 мың унция деңгейіндегі күтілімінен жоғары. Алтын бағасы жоғары деңгейде қалуын жалғастыруда, ал компанияның жаңа жобалары (фабриканы кеңейту және Тереңсай кен орнын игеру) бағаға қосымша қолдау көрсетуі мүмкін. Екінші жағынан, әлемдегі мөлшерлемелердің өсуі аясында алтын бағасының төмендеу тәуекелі, сондай-ақ доллардың теңгеге шаққандағы айырбас бағамының төмен болу тәуекелі бар, бұл алтынды доллармен сататын компанияның маржасын тарылтады.

 

Әлеуеті ең жоғары компаниялар

• Altyngold PLC (ALTN): 37% (Алтынның жоғары бағасы және алтын өндіру бойынша жобалық қуатқа шығу, болашақтағы кеңейту жобалары).

• АО KEGOC (KEGC): 57% (түсім мен пайда өсімінің жалғасуы және компанияның жалпы төмен бағалануы).

• Халық банкі АҚ (HSBK): 18% (пайыздық кірістер өсімінің жалғасуы, жоғары дивидендтік кірістілік және компанияның жалпы төмен бағалануы).

 

Жаз қарсаңындағы (1-тоқсан қорытындысы бойынша) қазақстандық компаниялардың есептілігі мен дивидендтеріне қатысты негізгі мәліметтер:

Ірі жария қазақстандық компаниялардың шамамен жартысы 2025 жылдың 1-тоқсанының қорытындысы бойынша әлі есеп бермеді. Дегенмен, есеп бергендердің ішінен тарифтердің өсуі аясында түсімі мен таза пайдасының айтарлықтай өскенін көрсетіп, жаңа рекордтарға қол жеткізген KEGOC-ты ерекше атап өтеміз. Сондай-ақ Халық Банкі, БЦК және Kaspi.kz сияқты ірі банктердің есептерін де атап өткен жөн. Үш банк те ең төменгі резервтік талаптардың артуы, жоғары базалық мөлшерлеме және осыған байланысты пайыздық шығындардың өсуі аясында таза пайданың күтілгендей төмендегенін көрсетті. Бірінші тоқсанда Халық Банкінің таза пайдасы өткен жылмен салыстырғанда 15%-ға, БЦК-да 25%-ға, ал Kaspi.kz-те тек 1%-ға ғана төмендеді. Сондай-ақ Air Astana да есеп берді, оның есебін қалыпты-теріс деп бағалауға болады. Түсімнің өсуіне қарамастан, компания ұшақтардың бос тұрып қалуы және Pratt & Whitney қозғалтқыштарына қатысты мәселелердің жалғасуы салдарынан шығындар өсімінің әлдеқайда жоғары қарқынын көрсетті. Компания мұнай бағасының өсуінен әзірге зардап шеккен жоқ, өйткені бірінші тоқсанда шетелдік отын әлдеқайда төмен бағамен хеджирленген болатын. Дегенмен, жылның екінші жартысында хедж жоқ және мұнай бағасы осы күйінде сақталған жағдайда, компанияға шығындардың артуымен бетпе-бет келуге тура келеді. Қазақстандық компаниялар дәстүр бойынша дивидендтерді көктемнің соңында, жаздың басында төлейді. KASE индексіндегі компаниялардың көпшілігі дивиденд төлеуді жоспарлап отыр (БЦК мен Кселлді қоспағанда) және бекітілген/ұсынылған дивидендтердің көлемі белгілі болып үлгерді. Дивидендтік тізілімді бекіту мерзімдері KEGOC, Халық Банкі және Қазақтелеком бойынша өтіп кетті, бірақ ҚазМұнайГаз, Қазатомөнеркәсіп, Kaspi.kz, ҚазТрансОйл және Air Astana дивидендтеріне әлі үлгеруге болады.

 

 

Жаһандық инвестициялық мүмкіндіктер

Елдар Шакенов, Freedom Finance Global талдаушысы

 

Ұсынылып отырған таңдалым - бұл таяу жылдардағы негізгі құрылымдық трендтерге бағытталған теңгерімді инвестициялық қоржын. Ол трендтерге: ЖИ инфрақұрылымын ауқымдау, энергия тұтынудың өсуі, цифрлық инфрақұрылымды дамыту, демографиялық өзгерістер, сондай-ақ қорғаныс секторларындағы тұрақты сұраныс пен күшті ақша ағыны бар компаниялардың тартымдылығы жатады. Портфельге ЖИ мен дата-орталықтарға күрделі салымдардың жеделдеуінен ұтатын өсім компаниялары да, тұрақты дивидендтік кірістілігі бар қорғаныс сипатындағы компаниялар да енгізілген. Мұндай комбинация телекоммуникация, тұтынушылық, фармацевтика, энергетика және инфрақұрылым секторларының сапалы өкілдері есебінен волатильділікті төмендете отырып, сонымен бірге ұзақ мерзімді технологиялық драйверлерге қатысуға мүмкіндік береді. Негізгі идея - пайданың озық өсім әлеуетін макроэкономикалық конъюнктураның өзгерістеріне төзімділікпен ұштастыратын диверсификацияланған акциялар жиынтығын қалыптастыру.

 Деректер 20.05.2026 жағдайы бойынша көрсетілген.

 

●        Micron Technology, Inc. (MU)

Micron ЖИ-дің инфрақұрылымдық цикліндегі ең күшті таңдаулардың бірі болып қала беруде: ЖИ-серверлеріне арналған HBM-жады, DRAM және NAND-қа деген сұраныс ұсыныстан озып келеді. Соңғы тоқсанда компания рекордтық түсім, пайда және бос ақша ағынын көрсетті, ал келесі тоқсанға арналған болжам нарық күткеннен тағы де жоғары болды. Негізгі драйверлер - NVIDIA үдеткіштері үшін HBM4 жеткізілімін ауқымдау және клиенттермен жасалған ұзақ мерзімді келісімшарттар. DRAM/NAND тапшылығы кем дегенде 2026 жылдың соңына дейін күтілуде, бұл маржаның алдағы уақытта одан әрі кеңеюін қолдайды.

●        Alphabet Inc. (GOOGL)

Alphabet тұрақты жарнама бизнесін, Google Cloud-тың жылдам өсімін және Gemini жүйесінің ауқымды интеграциясын өзара ұштастырып отыр. Соңғы есеп бұлтты сегменттің жеделдегенін және Search пен YouTube-тің күшті динамикасын растады. Бизнес пен тұтынушылар үшін ЖИ-сервистеріне деген корпоративтік сұраныстың өсуі және Gemini-ді монетизациялау негізгі катализаторлар болып қала береді.

●        Corning Incorporated (GLW)

Corning талшықты-оптикалық шешімдерге деген сұраныстың арқасында ЖИ-дата-орталықтары өсімінің негізгі бенефициарына айналуда. Ірі технологиялық компаниялар оптика сатып алу көлемін арттырып жатыр, бұл Optical Communications сегментінің дамуын жеделдетеді. Есептеу инфрақұрылымының алдағы уақытта одан әрі кеңеюі сұраныс өсімінің көпжылдық циклін қалыптастырады.

●        GE Vernova Inc. (GEV)

GEV - ЖИ мен дата-орталықтар тарапынан электр энергиясына деген әлемдік сұраныс өсімінің ең айқын таңдауларының бірі. Компания газ турбиналары мен электр желісі жабдықтары сегменттерінде тапсырыстар қоржынының күшті өсімін көрсетіп отыр. Қосымша драйвер - энергия жүйелерін жаңғыртуға бағытталған ауқымды инвестициялар.

●        ConocoPhillips (COP)

ConocoPhillips мұнай-газ секторындағы сапалы ұзақ мерзімді таңдау  болып қала береді: бұған мықты ресурстық база, жоғары бос ақша ағыны және акционерлерге капиталды тәртіппен қайтару тән. Компания LNG бағытын дамытып, Alaska LNG жобасындағы қатысуын кеңейтуде. Әлемдік нарықта LNG-ге сұраныстың артуы, Permian және Alaska кен орындарында өндірістің ұлғаюы, buyback және дивидендтер негізгі катализаторлар болып қала береді.

●        Welltower Inc. (WELL)

Welltower - АҚШ халқының қартаюының демографиялық трендіне жасалған ең үздік таңдаулардың бірі. Компания сектордағы шектеулі ұсыныстар аясында таза операциялық пайданың (NOI) жедел өсуін және нысандардың толу деңгейінің артқанын көрсетіп отыр. Негізгі драйвер - baby boomers буынының қартаюы жағдайында қарт адамдарға арналған сапалы инфрақұрылымның құрылымдық тапшылығы.

●        Verizon Communications Inc. (VZ)

Verizon абоненттік динамиканың жақсаруы және шығындарды оңтайландыру арқасында тұрақты өсімге қайта оралуда. Соңғы есеп postpaid-сегментінің тұрақтанғанын және күшті бос ақша ағынын көрсетті. Компания жоғары дивидендтік кірістілігі мен бизнесінің қорғаныс сипатының арқасында мөлшерлемелердің төмендеуінен ұтатын ықтимал бенефициар болып көрінеді.

●        Eli Lilly and Company (LLY)

Eli Lilly семіздік пен диабетке қарсы препараттардың жедел өсуі есебінен әлемдік фармацевтика секторында көш бастап тұр. Mounjaro және Zepbound өнімдерінің сатылымы күтілген нәтижелерден асып түсуін жалғастыруда. Болашақтағы негізгі катализатор - GLP-1 терапиясы нарығын айтарлықтай кеңейтуге қабілетті, ішуге арналған orforglipron препараты болуы мүмкін.

●        Costco Wholesale Corporation (COST)

Costco мүшелік моделі мен клиенттерінің жоғары адалдығы арқасында тұтынушылық сектордағы ең тұрақты компаниялардың бірі болып қала беруде. Соңғы нәтижелер тұтынушыларға қысым жасалған жағдайдың өзінде де салыстырмалы сатылымдар мен трафиктің өскенін растады. Желінің кеңеюі, онлайн-сатылымдардың өсуі және мүшелік құнының ықтимал артуы негізгі катализаторлар болып қала береді.

●        The Southern Company (SO)

Southern Company дата-орталықтар мен ЖИ-инфрақұрылымы тарапынан электр энергиясын тұтынудың қарқынды өсуінен ұтып отыр. Vogtle 3 және 4 блоктарының аяқталуы генерациялау қуаттарын күшейтеді, ал реттелетін активтер базасының кеңеюі көпжылдық өсім циклін қалыптастырады. SO компаниясы электр энергетикасының қорғаныс сипатын ЖИ мен экономиканы электрлендіруден келетін жаңа құрылымдық драйвермен өзара ұштастырады.