Біздің пікірлер мен күтілімдер
Сыртқы фон. S&P 500 кеше құбылмалы сессия өткізді: ашылу кезінде индекс төмендеді, алайда кейіннен бағалар баяу қалпына келді. Нарықтағы толқудың басты себебі қайтадан сауда қақтығыстары болды. Кейін инвесторлардың назары Джером Пауэллге ауды – ол еңбек нарығының болашағы әлсіреп келе жатқанын айтып, пайыздық мөлшерлеменің төмендеуін күтетін инвесторлардың көңілін көтерді. Қазір своп-келісімшарттар келесі жылдың соңына қарай мөлшерлеменің шамамен 1,25 пайыздық тармаққа төмендеуін болжайды (қазіргі 4%–4,25% деңгейінен).
Еуропада континенттік индекстер 0,4–0,6%-ға төмендеді.
Бүгін таңертең әлемдік чип өндірісіндегі маңызды компаниялардың бірі — ASML тапсырыстарының көлемі сарапшылардың болжамынан асып түскені белгілі болды. Бұған жасанды интеллект инфрақұрылымына инвестициялар себеп болды. Тапсырыстар көлемі 5,4 млрд еуроға жетті, ал чип өндіруші қаңтарда акцияларды кері сатып алу бағдарламасын жарияламақ. Осы жаңалықтар аясында таңертең S&P 500 фьючерстері 0,4%-ға өсті.
Азия нарықтары да оң динамика көрсетуде: Гонконг, Қытай, Жапония және Корея индекстері 1,5%-дан 2,7%-ға дейін көтерілді.
Бүгін мұнайдың Brent маркасы барреліне $62,2 деңгейінде саудалануда.
Алтын нарықтардағы оң көңіл-күйге қарамастан, өсуін жалғастыруда.
KASE индексі. KASE үш сессия қатарынан төмендеп, кеше 0,5%-ға азайды. Техникалық тұрғыда баға бокстық каналдың және қолдау деңгейінің төменгі шегінен сәл түсті. Біздің ойымызша, бұл әзірге сындарлы деңгей емес, дегенмен жағдайды бақылауда ұстаймыз. Техникалық көріністің нашарлау қаупін жою үшін бүгін индекс 0,3%-дан 1%-ға дейін өссе жеткілікті.
Индекстегі акциялар. Кеше ең көп төмендеген – ҚазТрансОйл акциялары (-3,9%). Графикке қарағанда, бұл 22 қыркүйектен 3 қазанға дейінгі 6,2%-дық өсуінен кейінгі түзету сияқты. Маңызды жаңалықтар байқалмады, сауда көлемі 22,3 млн теңгені құрады.
Төмендеу бойынша екінші орында – Банк ЦентрКредит (-1,9%). Бағалар әлі де төмен бағыттағы тренд сызығының қысымында және оны бұза алмай отыр.
Керісінше, елеулі өсім көрсеткен жалғыз акция – ҚМГ, ол теңгенің әлсіреуі аясында нығайды.
Air Astana ГДР-лары (LSE) бойынша қызық жағдай қалыптасты – кеше сессия кезінде 6,5%-ға дейін төмендеді, осылайша алдыңғы сессиядағы өсімді жойды. Дегенмен, жабылу $6,48 деңгейінде өтті, бұл орта мерзімді перспективада көтерілу мүмкіндігін сақтайды.
Kaspi.kz Nasdaq-та тағы 1,1%-ға төмендеді. Жалпы алғанда, біз мұны компанияның түрік нарығына шығуымен және шетелдік нарықты игеруге бағытталған капиталдық шығындардың өсуімен байланыстырамыз. Түркияда маркетплейстердің бөлшек саудаға ену коэффициенті әлі де төмен. Инвесторлардың назары 3-тоқсанның алдағы есептілігінде.
Валюта. USD/KZT бүгін орта мерзімді тренд сызығы маңындағы қолдау деңгейінен өсе бастады. Қазіргі уақытта доллар форексте 540 теңге шамасында саудалануда. Сонымен қатар рубль доллармен салыстырғанда нығаюын жалғастыруда, ал DXY индексінде доллар өсім толқынынан кейін түзетілуде.