Біздің түсіндірмелер мен күтулер
Сыртқы фон. S&P 500 кеше 1,5%-ға көтеріліп, екінші күн қатарынан өсім көрсетті. Ең жоғары өсім технологиялық секторда байқалды, сондықтан Nasdaq 2,7%-ға өсті, ал өнеркәсіптік Dow Jones небәрі 0,44%-ға қосылды. Нарықтағы негізгі позитив тағы да ФРЖ мен мөлшерлеме бойынша күтулерден келді: ФРЖ басқарушыларының бірі Кристофер Уоллер еңбек нарығы «жеткілікті әлсірегенін» айтып, желтоқсанда мөлшерлемені тағы 25 б.п.-қа төмендетуді қолдайтыны жөнінде белгі берді. Оған дейін Мэри Дейли де келесі айда мөлшерлемені төмендетуді қолдайтынын айтқан болатын.
Бүгін нарық қыркүйек айына арналған бөлшек сауда статистикасын күтуде, онда қалыпты өсім күтіледі. Апта ішінде сонымен қатар ӨПИ және ұзақ мерзімді пайдаланылатын тауарларға тапсырыстар бойынша деректер жарияланады. Бейсенбіде АҚШ нарығы Алғыс айту күніне байланысты жабық болады.
Еуропада индекстердің өсімі әлдеқайда қалыпты. DAX ең көп өсім көрсетті, дегенмен ол әлі де мамыр айындағы минимумдарға жақын. Stoxx 600 индекстеріне фьючерстер 0,25%-ға төмендеуде. Азияда таңертең АҚШ-тағы алдынғы сессиядағыдай айқын позитив байқалмайды. Қытай және Гонконг биржалары 0,5–0,8%-ға жоғары, Nikkei 225 — бейтарап. S&P 500 фьючерстері де айтарлықтай өзгеріссіз. Мұнай бағасы бүгін $62,4 деңгейінде.
Облигациялар. АҚШ-тың 10 жылдық облигацияларының табыстылығы үшінші сессия қатарынан төмендеп, 4%-ға жақындады.
KASE индексі. KASE индексі кеше 0,26%-ға аздап жоғарылады. Қазіргі уақытта біз 6690 пункт деңгейінде қолдау бар екенін көреміз — бұл деңгей жергілікті түрде екі рет сыналған.
Индекс акциялары. Алдыңғы сессияда Халық банк 2,5% өсім көрсетіп, нарыққа қолдау көрсетті — бұған дейін оның өзі нарықтағы құлдырауға ықпал еткен еді. Бұған дейін біз HSBK бойынша жылдам серпілісті емес, қалыпты орта мерзімді өсімді күтетімізді және ағымдағы баға деңгейлері инвесторлар үшін тартымды екендігін атағанбыз.
Нарық аутсайдері — Kcell. 20 қарашада Қазақтелекоммен бірге белсенділік көрсеткенімен, тез кері бұрылды. LSE және Nasdaq-та біздің барлық қағаздар, Air Astana-дан басқа, 1%-дан жоғары өсім көрсетті. Ең жоғары өсім — Қазатомпромда (+1,5%). Техникалық тұрғыда — ГДР бағалары тұрақтануда, құбылмалылық төмендеуде және үшбұрыш фигурасының қалыптасу белгілері бар — бұл орта мерзімді перспектива үшін оң белгі. Kaspi және Халық банк қолдау деңгейлерінен өсім көрсетті.
ҚМГ 9 ай бойынша есеп берді: мұнай бағасы әлсіз болғанына қарамастан, операциялық көрсеткіштер жақсарған және таза қарыз 2,5 есеге төмендеп, 904 млн долларды құрады.
Валюта. Доллар таңертең 518,8 теңге деңгейінде саудалануда. Соңғы екі сессиямен салыстырғанда өзгеріс аз — біз күткендей USDKZT өсімі әзірге байқалмайды. Ал рубль доллармен салыстырғанда алтыншы сессия қатарынан нығаюда. DXY доллар индексі биылғы жылдың мамырынан бергі максимумында.