Біздің түсініктемелеріміз бен күтілімдеріміз
Сыртқы жағдай. Дүйсенбі күні S&P 500 индексі 2,3%-ға, Nasdaq 2,7% ға, Dow Jones 2,2%-ға өсті. АҚШ нарығы өткен аптадағы сатылымдардан кейін қалпына келуін жалғастырды. Мұнай бағасының күрт төмендеуі инфляцияға қатысты алаңдаушылықты азайтып, нарыққа қолдау көрсетті. Еуропа нарықтары да сауданы өсіммен аяқтады: Stoxx 600 индексі 1,3%-ға, DAX 1,7%-ға, FTSE 100 1,0%-ға көтерілді. Brent мұнайы 5,8%-ға арзандап, барреліне $92,57 болды. Бұған Трамптың келіссөздер алға жылжыған жағдайда Иранға жаңа соққылар жасалу ықтималдығы төмен екені туралы мәлімдемесі негізгі себеп болды. Физикалық мұнай нарығындағы әлсіреу белгілері де бағаға қосымша қысым көрсетті: Reuters мәліметінше, қазанда ОПЕК мұнай өндірісін арттырды, ал Dated Brent жақын мерзімді фьючерстерге қатысты дисконтпен саудаланды. АҚШ-тың 10 жылдық мемлекеттік облигацияларының (UST) кірістілігі шамамен 4,86% деңгейінде қалды, ал доллар индексі іс жүзінде өзгермеді. Алтын 1,0%-ға қымбаттап, унциясы $4 114,5 болды. Сейсенбі күні таңертең Азия нарықтарында өсім жалғасуда: Nikkei шамамен 3,4%-ға, ал Оңтүстік Кореяның KOSPI индексі бірден 4,7%-ға көтерілді. Brent мұнайы шамамен $91,6-ға дейін төмендеді. Бүгін басты назарда АҚШ-тағы қазан айының инфляциясы болады. Еңбек нарығы туралы күшті есептен кейін инвесторлар ФРЖ мөлшерлемесінің алдағы бағытына қатысты жаңа сигналдарды күтуде.
KASE индексі. KASE индексі 0,7%-ға өсіп, жұма күні төмен қарай шығып кеткен жергілікті өсу арнасының төменгі шекарасынан қайта жоғары көтерілді. Техникалық тұрғыдан оң динамика байқалғанымен, KASE-нің бүйірлік трендке емес, өсу трендіне қайта оралғанын сенімдірек айту үшін индекстің 7920 тармақтан жоғары көтерілгенін көргіміз келеді. Өсімнің кең ауқымда болғанын атап өтеміз: индекстегі жеті акция оң аймақта аяқталды, ал тек «Қазақтелеком» төмендеді. Мұндай динамика әдетте нарықтағы жалпы көңіл күйдің жақсарғанын көрсетеді. Бұл әлемдік индекстердің ауқымды қалпына келуімен сәйкес келді.
Индекс акциялары. Kaspi.kz акциялары 0,2%-ға өсіп, 41 700 теңгеге жетті, алайда оның ADS-тері 2,4%-ға төмендеп, $89,47 болды. Біздің ойымызша, компанияның үшінші тоқсандағы қаржылық нәтижелері бейтарап болды. Пайыздық шығыстар күтілгендей пайыздық кірістерден жылдамырақ өсіп жатыр, дегенмен олардың өсу қарқыны екінші тоқсанмен салыстырғанда сәл баяулады. Тоқсандық таза пайда жылдық мәнде небәрі 1,1%-ға өсті, бұл біздің күтулерімізге сәйкес келді. Басшылықтың болжамдарына келсек, Marketplace сегментіндегі GMV өсімі бойынша болжам 20%-дан 12%-ға дейін төмендетілді. Бұл ретте қалған болжамдар бұрынғы деңгейде расталды, ал тоғыз айдағы нақты нәтижелер белгіленген бағдарларға толық сәйкес келеді. Бұл олардың 2026 жылдың қорытындысында орындалу ықтималдығы жоғары екенін көрсетеді. Теңгенің басқа валюталарға, соның ішінде доллар мен түрік лирасына қатысты нығаюы Marketplace сегментіндегі GMV-дің, сондай ақ Түркиядағы еншілес Hepsiburada маркетплейсінің кірістерінің жылдық мәнде 35%-ға төмендеуіне әкелгенін атап өтеміз. Компания депозиттік мөлшерлемелердің төмендеуі пайыздық шығыстардың өсуін IV тоқсанның өзінде баяулатады, ал айтарлықтай әсері 2027 жылы байқалады деп күтуде. «Қазатомөнеркәсіп» акциялары жергілікті нарықта 2,3%-ға өсті, ал LSE дегі ҒДҚ-лары 3,9%-ға қымбаттады. Техникалық тұрғыдан бұл оң белгі, себебі бағалар шамамен $59,6 деңгейіндегі қолдаудан екінші рет серпіліс көрсетіп отыр. Бұл «қос түп» деп аталатын өсімге бағытталған техникалық фигураның қалыптасуын көрсетуі мүмкін. «ҚазТрансОйл» акциялары 1,0%-ға өсіп, 1 383,60 теңгеге жетті. Сессия жоғары сауда белсенділігімен ерекшеленді: күн ортасына қарай айналым 287,6 млн теңгеге жетті. Сол уақытта баға іс жүзінде өзгеріссіз, шамамен 1 369,90 теңге деңгейінде болды, ал өсім кейінірек қалыптасты. AIX биржасында Solidcore акциялары алтынның қымбаттауына қарамастан, 4,7%-ға төмендеп, $12,08 болды. Ал бағалы металдың өзі қолайлы жағдайда қалып отыр: төмендеуші тренд сызығын бұзып өткеннен кейін бағалар қалпына келуін жалғастыруда және жақын арада 50 күндік жылжымалы орташа деңгейді сынай бастайды. Акциялардың төмендеуіне себеп болатын жеке расталған жаңалық табылған жоқ.
Валюта. Кеше USDKZT доллардың үш сессиялық төмендеуінен кейін алғаш рет өсті. Бүгін теңге қайта нығайып, доллар бағамы 447,65 теңгеге жетті.
Қз