Біздің пікірлер мен күтулеріміз
Сыртқы фон. S&P 500 жаңа рекорд орнатып, 3 шілдедегі көрсеткіштен сәл ғана жоғары деңгейде жабылды. Трамп 1 тамыздан бастап Канададан келетін тауарларға 35%-дық тариф енгізді және көпшілік сауда серіктестері үшін 15% немесе 20% мөлшеріндегі бірыңғай баж салығын енгізуді жоспарлап отыр. Бұл жаңалықтар нарыққа айтарлықтай әсер еткен жоқ. JPMorgan Chase басшысы атап өткендей, нарық тарифтерге немқұрайлы қарайды. АҚШ Федералды резерв жүйесінің мүшесі Мэри Дейли биыл екі рет мөлшерлемені төмендету – «ықтимал сценарий» екенін айтты. Ал Мусалемнің пікірінше, баж салығының инфляцияға тұрақты әсері болатынын айтуға әлі ерте. ФРЖ төрағасы лауазымына үміткер Кевин Хассетт орталық банкті мөлшерлемені төмендетуде «артта қалды» деп сынға алды. Еуропада индекстер әртүрлі бағытта қозғалды: Stoxx 600 төртінші сессия қатарынан өсті, ал DAX тарихи максимумнан шегінді. Азияда таңертең Гонконг биржасы жақсы өсімді көрсетті, ал Жапония мен Корея индекстері аздап төмендеді. Goldman MSCI Asia Pacific ex-Japan индексі үшін 12 айлық мақсатты бағасын көтерді, бұл доллармен есептегенде 9% кірістілік береді дегенді білдіреді. Brent маркалы мұнайдың бағасы кеше $69 деңгейінен төмендеді. ОПЕК 2050 жылға қарай дүниежүзілік мұнай тұтыну шамамен 19%-ға өсіп, тәулігіне 123 миллион баррельге жетеді деп болжап отыр. Қазіргі уақытта S&P 500 индексінің фьючерстері 0,3%-ға, ал Еуропадағы фьючерстер 0,3–0,5%-ға төмендеуде.
Облигациялар. АҚШ-тың 10 жылдық мемлекеттік облигацияларының кірістілігі кеше аздап өсіп, 4,35%-ды құрады.
KASE индексі. KASE индексі кеше 0,9%-ға өсті — бұл ағымдағы өсу толқысы мен 9 сессиядан тұратын серия ішіндегі ең жақсы нәтиже. Сауда көлемі 30 маусымнан бергі ең жоғары деңгейге жетті.
Индекс акциялары. Kcell акциялары қарсылық деңгейлеріне жеткен соң бейтарап деңгейде жабылды. Нарықта өсудің негізгі локомотивтері ретінде БЦК мен КМГ қағаздары қалды. CCBN акцияларының керемет раллиі кеше де жалғасты: котировкалар жаңа максимумдарды жаңартты, ал сауда көлемі былтырғы наурыз айынан бергі ең жоғары деңгейге жетті. Осы жағдай ForteBank сияқты индекске кірмейтін банк секторындағы басқа акцияларда да бум тудырды. Бұл қағаздар біздің талдау аясымызға кірмейтіндіктен, оларға қатысты толыққанды пікір немесе болжам айта алмаймыз. Алайда мультипликаторлар бойынша бұл қағаздар қазір артық бағаланған сияқты. Әсіресе акция бағасының баланстық құнға арақатынасы банктік сектор үшін әдеттен тыс жоғары.
КМГ қағаздары 2,1%-ға өсіп, жаңа максимумдарға жетті. Қазіргі бағалар біздің 17 900 теңгелік негізді бағалауымызға жақындап қалды, сол себепті біз бұл сәтте «ұстау» деген жергілікті ұсынысты орынды деп санаймыз. LSE-де Казатомпромның ЖДҚ-лары жақсы өсті, дегенмен олар жергілікті консолидациядан шықты деп айтуға әлі ерте. Уран бағасының төмендеуіне реакция әлсіз болғанын атап өтеміз.
Валюта. USDKZT бағамы 520,8 теңгеге дейін өсті. Бұл доллардың жоғары қарай серпілуіне және жергілікті консолидациядан шығуына тағы да нұсқауы мүмкін. Кеше рубльге Ресейге қарсы санкциялардың күшеюі туралы жаңалықтардан кейін жоғары құбылмалылық тән болды.