Біздің пікірлеріміз бен күтулеріміз
Сыртқы фон. Кеше S&P 500 индексі 0,8%-ға өсті. Таяу Шығыстағы жалғасып жатқан қақтығыс аясында оң экономикалық жаңалықтардың бірі ISM жариялаған қызмет көрсету секторы бойынша PMI есебі болды: ақпан айындағы көрсеткіш күткеннен жоғары шықты — индекс қаңтардағы 53,8-ден 56,1-ге дейін өсті, ал нарық шамамен 53,5 деңгейін күткен еді. Бұл 2022 жылдың шілдесінен бергі ең жоғары деңгей, ал көрсеткіш 20 ай қатарынан 50 деңгейінен жоғары қалып отыр, яғни қызмет көрсету секторының кеңеюін білдіреді. Сонымен қатар Дональд Трамп АҚШ-тың Иранға қарсы әскери кампаниясы «өте жақсы» жүріп жатқанын мәлімдеді, алайда оның мерзімі мен мақсаттары әлі нақты емес. Ақ үйдің баспасөз хатшысы Каролина Ливитттің айтуынша, АҚШ «Иранның әуе кеңістігін толық бақылауға алуға» жақындап келеді. Осы уақытта Тегеран АҚШ-пен қақтығысты тоқтату мәселесін талқылау туралы ұсыныс жасағаны жөніндегі хабарламаны «ашық өтірік» деп атады. Сонымен қатар Скотт Бессент Дональд Трамп енгізген жаһандық тарифтің 10%-дан 15%-ға дейін көтерілуі осы аптада күшіне енуі мүмкін екенін айтты. Bloomberg деректеріне сәйкес, Еуроодақ төменірек мөлшерлемені сақтап қалатыны жөнінде кепілдік алған. Еуропадағы индекстер кеше АҚШ-қа қарағанда да жоғары өсім көрсетті. Азияда бүгін таңертең оң динамика байқалады — Қытайдың CSI 300 және Жапонияның Nikkei 225 индекстері 1,1–1,7%-ға өсіп жатыр, ал кеше 12%-ға төмендеген Оңтүстік Кореяның Kospi индексі қалпына келуде. Хабарларға сәйкес, Қытай Ираннан жеткізілімдердің бұзылуына байланысты ірі мұнай өңдеу зауыттарына дизель отыны мен бензин экспортын уақытша тоқтатуды сұраған. АҚШ–Қытай бағыты бойынша супертанкерлермен мұнай тасымалдау құны жаңа рекордқа жетіп, 29,1 млн долларға дейін өсті. Таңертең S&P 500 индексінің фьючерстері 0,3%-ға төмендеуді көрсетуде. Мұнай бағасы бүгін $84,3 деңгейіне дейін өсіп отыр.
KASE индексі. Кеше KASE сауда сессиясын тыныш әрі бейтарап деңгейде бастады, алайда сыртқы факторлардың қысымымен сессия соңында 1%-ға төмендеді. Бүгін таңертең сыртқы нарықтағы көңіл-күйдің жақсаруы байқалады, бұл жергілікті нарыққа оң әсер етуі мүмкін.
Индекс акциялары. Кеше ҚМГ акциялары күтпеген жерден ең көп төмендеген қағаздардың бірі болды. Сірә, бұл мұнай бағасының өсуі тоқтауы мүмкін деген қауіп аясында позицияларды бекітуге байланысты болды. Алайда Brent маркалы мұнай котировкалары Ормуз бұғазы арқылы кемелер қозғалысының болмауына байланысты раллиді жалғастыруда. Сонымен қатар Air Astana, Халық банкі және ҚазТрансОйл акциялары да түзетуге ұшырады. Nasdaq-та Kaspi акциялары $73,1 деңгейіне дейін төмендеп, бұрын бұзылған көлбеу тренд сызығынан сәл төмен түсті. Айта кетейік, компания 15 сәуірге акционерлердің жалпы жиналысын белгілеп, бір акцияға 850 теңге мөлшерінде тоқсандық дивидендтерді бекітуді жоспарлап отыр. Дивидендтер бойынша тіркеу күні — 14 сәуір.
Қазатомөнеркәсіп акциялары уран компанияларының кеше өскеніне қарамастан 3,4%-ға төмендеді. Жалпы алғанда, америкалық нарықпен корреляциясы бар компаниялар акцияларының кеше сол нарықтағы өсімнен қолдау алмауы жағымсыз тосынсый болды. Бүгін сауда ашылған сәтте KSPI және KZAP акциялары 1,5–1,7%-ға төмендеп жатыр.
Валюта. Бүгін теңге долларға қатысты 494,6 деңгейіне дейін нығайды. Күндік шамға қарағанда, доллар үшін 493 теңге деңгейі қолдау аймағы болып тұр.