SailPoint технокомпаниясы АҚШ-тағы ІРО барысында $11,5 млрд бағалауға үміттенеді
Биржалық жаңалықтар
5 ақпан 2025, 13:25
Киберқауіпсіздік саласындағы бағдарламалық қамтамасыз етуді әзірлеуші SailPoint АҚШ-та акцияларды бастапқы орналастыру барысында $1,05 млрд-қа дейін тартуды және $11,5 млрд-қа баға алуды жоспарлап отыр, деп жазады Reuters.
SailPoint пен оған иелік ететін Thoma Bravo инвестициялық компаниясы инвесторларға бір данасы үшін $19-дан $21-ге дейінгі бағамен 50 млн акция ұсынады. Оның ішінде 47,5 млн акцияны SailPoint өзі ұсынады, қалған 2,5 млн — Thoma Bravo.
ІРО нақты күні белгісіз.
SailPoint 2005 жылы Остинде Техас штатында құрылды. Корпорация бизнестің сәйкестендіру қауіпсіздігін басқаруға арналған бағдарламалық шешімдерге маманданады және ұйымдарға қызметкерлердің, әріптестердің және клиенттердің корпоративтік деректер мен жүйелерге қолжетімділігін бақылауға мүмкіндік беретін платформаларды әзірлейді.
Бұдан басқа, компания жасанды интеллект және машиналық оқыту негізінде жұмыс істейтін технологияларды ұсынады. SailPoint-тің дербес деректерді қорғау жөніндегі ұсыныстары IBM (IMB), Microsoft (MSFT), Oracle (ORCL), CyberArk (CYBR), Okta (OKTA) және One Identity өнімдерімен бәсекелеседі.