OpenAI және Freedom Holding Corp. ChatGPT Edu арқылы Қазақстандағы білім беру жүйесін цифрландыруды қолдайды

2025 жылғы 6 қарашада Вашингтонда (АҚШ) Қазақстан Республикасы Үкіметі, OpenAI, Inc. және Freedom Holding Corp. арасында стратегиялық келісімге қол қойылды. Келісім аясында Қазақстанның 165 000 педагогіне деректердің құпиялылығы мен қауіпсіздігі жоғары деңгейде қорғалған ChatGPT-дің жетілдірілген білім беру нұсқасы – ChatGPT Edu платформасын қолдану мүмкіндігі беріледі.

Бұл серіктестік Қазақстанның білім беру жүйесін цифрландыру және педагогтердің жасанды интеллектіні қолдану сауаттылығын дамыту жөніндегі ұлттық бастаманың маңызды кезеңі болып саналады. Келісім нәтижесінде Қазақстан ChatGPT Edu жүйесін мектептерден бастап жоғары оқу орындарына дейін — ұлттық деңгейде енгізетін әлемдегі алғашқы елдердің бірі. Бұл педагогтер заманауи жасанды интеллект құралдарын тиімді қолдана отырып, білім беру сапасы мен тиімділігін арттыруға жол ашады.

Келісімге сәйкес, Freedom Holding Corp. бастаманы толық қаржыландырады, ал OpenAI ChatGPT Edu платформасы мен қазақ, орыс тілдеріндегі техникалық-әдістемелік қолдауды қамтамасыз етеді. Өз кезегінде, Қазақстан Республикасы Үкіметі бастаманы мемлекеттік органдар мен білім беру ұйымдары деңгейінде үйлестіріп, оны ұлттық білім беру бағдарламаларымен және педагогтердің кәсіби даму жүйелерімен үйлестіреді.

ChatGPT Edu педагогтер үшін арнайы әзірленген және ChatGPT-дің тегін нұсқасында қолжетімсіз мүмкіндіктерді ұсынады. Атап айтқанда,
● құжаттарды, деректер мен интернет-материалдарды жүктеу және талдау мүмкіндігі;
● жеке пәндер, оқу тапсырмалары мен бағалау критерийлеріне сәйкес, арнайы жасанды интеллект ассистенттерін (Custom GPTs) жасау;
● оқу үдерісін басқару жүйелері (LMS) мен дерекқор және білім беру ұйымдарының басқа да цифрлық құралдармен біріктіру;
● оқу жоспарына сәйкес оқу материалдары, тапсырмалар, кері байланыс пен бағалауды ұйымдастыруға арналған жеке жұмыс кеңістіктері.

Қазақстанның барлық педагогі ChatGPT Edu қызметіне BilimClass платформасы арқылы қосылады. Freedom Holding қаржыландыратын бұл қызмет мұғалімдерге тегін ұсынылады және олардың кәсіби қызметінде жасанды интеллект технологияларын қауіпсіз әрі ыңғайлы қолдануға мүмкіндік береді. 

Аталған бастама цифрландыру саласындағы мемлекеттік саясатты қолдауға, педагогтердің цифрлық құзыреттерін арттыруға, жасанды интеллект технологияларын жауапты пайдалануға және инновациялық шешімдер арқылы білім беру сапасын жақсартуға бағытталған.