АҚШ‑тағы саябақтарға шетелдік келушілер санының азаюы Disney акцияларының құлдырауына әкелді

Walt Disney (DIS) АҚШ-тағы тақырыптық саябақтарға шетелдік келушілер санының төмендегені және теле‑, кино бөлімшелеріндегі пайда азайғаны туралы ескерту жасады. Reuters хабарлауынша, бұл мәлімдемеден кейін компания акциялары шамамен 5%‑ға төмендеді.

Компания шетелдік туристерге байланысты теріс факторларды атап өтті, бірақ олардың себептерін нақтыламады. Қаржы директоры Хью Джонстонның айтуынша, Disney ішкі нарықтағы маркетингті күшейтіп жатыр, себебі шетелдік қонақтар арасында брендтің танымалдығы төмен. Оның сөзіне қарағанда, АҚШ‑қа шетелдік туристер ағымы бұдан әрі де азайып келеді.

Disney‑дің фильм студияларын, телеканалдарды және стриминг сервистерін қамтитын ойын‑сауық бөлімшесі операциялық пайданы 35%‑ға төмендеткенін тіркеді. Бұл жағдай көптеген кинотұсаукесерлердің маркетинг шығындарының жоғары болуына байланысты, оның ішінде «Зверополис 2» және «Аватар: От пен күл» фильмдері бар. Компания сонымен қатар телеканалдардың табысы мен операциялық пайдасы туралы жеке деректерді жариялауды тоқтатты. Джонстонның айтуынша, контенттің әмбебап таралуы жағдайында мұндай жіктеу өзектілігін жоғалтқан.

Disney‑дің ескертуі бүкіләлемдік Туризм және саяхат жөніндегі кеңес жариялаған есеппен тұспа‑тұс келді. Есепке сәйкес, халықаралық шиеленістің күшеюіне байланысты өткен жылы АҚШ‑қа келген шетелдік туристер саны 6%‑ға азайған.

Disney ағымдағы тоқсанда Disney Experiences бөлімшесінің қалыпты өсімін күтеді және жылдың екінші жартысында өсімнің жеделдеуіне үміттенеді. Компания бұл болжамды наурызда Сингапурда іске қосылатын жаңа Disney Adventure круиздік лайнерімен байланыстырады.

Freedom Finance Global сарапшысы Сәкен Исмаиловтың айтуынша, жалпы кіріс нарық күткен деңгейден жоғары болды. Бұған «Зверополис 2» және «Аватар: От пен күл» фильмдерінің рекордтық прокаттық табыстары, сондай‑ақ стриминг бағытының операциялық тиімділігінің артуы ықпал етті. Алайда кинорелиздердің маркетинг шығындарының өсуі, сызықтық теледидардағы жарнамалық түсімнің төмендеуі және спорттық трансляцияларға байланысты шығындар операциялық пайданы болжамнан асыруға мүмкіндік бермеді. Менеджмент 2026 қаржы жылының II тоқсанында да пайдаға түсетін қысым сақталатынын, ал өсімнің қалпына келуі жылдың екінші жартысынан ерте болмайтынын күтеді.

Сонымен қатар АҚШ‑тағы тақырыптық саябақтарда халықаралық туризмнің әлсіздігі де атап өтілді. Осы факторлардың әсерінен есеп жарияланғаннан кейін DIS акциялары 7%‑дан астам төмендеді.

2026 қаржы жылының I тоқсанында компанияның кірісі жылдық есеппен 5% өсіп, 25,98 млрд долларды құрады. Бұл көрсеткіш консенсус‑болжамнан (25,70 млрд доллар) жоғары болды. Өсімге кинотеатрлардағы табысты премьералар, стриминг бизнесінің дамуы және саябақтардың рекордтық кірістері ықпал етті. Бұл факторлар жарнама мен сызықтық ТВ‑дағы әлсіздікті өтеді.

Операциялық пайда 9% төмендеп, 4,60 млрд долларға жетті — бұл нарық күтулеріне шамамен сәйкес келді. Түзетілген акцияға шаққандағы пайда 1,63 долларды құрап, жылдық есеппен 7% азайғанымен, 1,57 долларлық болжамнан жоғары болды.

Ойын‑сауық сегментінің кірісі 7% өсіп, 11,61 млрд долларға жетіп, күтулерден жоғары болды. Алайда операциялық пайда контенттің амортизациясы мен маркетинг шығындарының жоғары болуына байланысты 1,10 млрд долларға дейін төмендеді. Сегменттің операциялық маржасы 9,5%‑ға дейін қысқарды.

Стриминг бағыты сенімді өсім көрсетті. SVOD кірісі жылдық есеппен 11% өсіп, 5,35 млрд долларға, ал операциялық пайда 72% өсіп, 450 млн долларға жетті. Маржа 8,4% деңгейіне дейін көтеріліп, 2026 қаржы жылының соңына қарай мақсатты 10% маржаға қол жеткізу траекториясын қуаттады.

Кино сегменті жоғары кассалық көрсеткіштерге қарамастан, маркетинг шығындарының көптігіне байланысты операциялық нәтижені төмендетті. Линейный ТВ сегменті аудиторияның құрылымдық қысқаруы және жарнама нарығының әлсіздігі салдарынан қысымда қалды.

Спорт сегментінің кірісі 4,91 млрд долларға дейін баяу өсіп, операциялық пайда 23% төмендеп, 191 млн долларға түсті. Бұған спорттық құқықтар құнының өсуі және YouTube TV‑мен туындаған дау әсер етті. Ал тақырыптық саябақтар мен круиздер күткеннен жоғары нәтижелер көрсетіп, 10,01 млрд доллар рекордтық кіріс және 3,31 млрд доллар пайда жариялады. Бұл АҚШ-тағы сұраныстың артуы және жаңа лайнерлердің іске қосылуымен байланысты.

Менеджмент 2026 қаржы жылының II тоқсанында маржаға қысым сақталатынын, бірақ жыл қорытындысы бойынша түзетілген акция кірісінің екі таңбалы өсімін, 19 млрд доллар операциялық ақшалай ағымды және 7 млрд долларлық байбек бағдарламасын растайтынын мәлімдеді. Нарықтың теріс реакциясы пайда төмендеуі және сақтықпен берілген қысқа мерзімді болжамға байланысты болды.