Amazon Луизианада құны $12 млрд болатын деректер өңдеу орталықтарын салуды жоспарлап отыр
Биржалық жаңалықтар
24 ақпан 2026, 14:00
Amazon (AMZN) Луизиана штатында деректер өңдеу орталықтарын салуға 12 млрд доллар инвестициялау жоспарын жариялады. Компанияның мәліметінше, жаңа деректер орталығы кампустары Луизиананың солтүстік-батысында, Каддо және Божер округтерінде салынады. Жоба нәтижесінде 540 тұрақты жұмыс орны ашылады деп күтіледі. Сонымен қатар электр энергетикасы, құрылыс, жылыту, желдету және кондиционерлеу жүйелерін техникалық қызмет көрсетумен байланысты салаларда шамамен 1 710 қосымша жұмыс орны пайда болады.
Amazon инвестициялары бұлттық технологиялар мен есептеу инфрақұрылымына өсіп отырған сұранысты қолдауға бағытталғанын хабарлады. Компанияның төртінші тоқсандағы есебінде ағымдағы жылы 200 млрд доллар көлемінде капиталдық шығындар жоспарланғаны көрсетілді. Бұл сома 2025 жылы тіркелген 131 млрд доллардан айтарлықтай жоғары.
Amazon сондай-ақ жобалардың әлеуетті экологиялық әсерін өтеу ниетін білдірді. Компания 400 млн долларлық арнайы қор құрып, оның қаражатын Луизиананың су инфрақұрылымын дамытуға бағыттамақ. Компания объектілерде қолданылатын судың тек салқындату және техникалық қажеттіліктер үшін пайдаланылатынын атап өтті.