Мұнай бағасы Таяу Шығыстағы қақтығыстың ушығуы аясында күрт өсті
Таяу Шығыста энергетикалық инфрақұрылымға жасалған соққылардан кейін қақтығыс өрши түсті, соның нәтижесінде мұнай бағасы күрт көтерілді, деп хабарлайды Reuters.
Brent эталондық маркалы мұнайы бейсенбі күнгі сауда кезінде барреліне $119 деңгейінен жоғары көтерілді. Бұл өсім Иранның энергетика нысандарына соққы жасағаны туралы хабарламалардан кейін болды. Бұған дейін Израиль «Оңтүстік Парс» газ кен орнына шабуыл жасаған еді.
Brent фьючерстері $7,39-қа, яғни 6,9%-ға өсіп, барреліне $114,77 болды. Сауда сессиясы барысында баға $10-нан астам өсіп, $119,13 деңгейіне дейін жетті — бұл соңғы үш жарым жылдағы ең жоғары көрсеткіштердің бірі. West Texas Intermediate (WTI) мұнайының бағасы $0,27-ке, немесе 0,3%-ға өсіп, барреліне $96,59 болды. Бұған дейін WTI баға белгілеулері шамамен $4-қа көтеріліп, $100,02 деңгейіне жеткен еді. WTI‑дің Brent‑ке қатысты дисконты соңғы 11 жылдағы ең жоғары деңгейге шықты.
АҚШ президенті Дональд Трамп АҚШ пен Катар шабуылға қатыспағанын айта отырып, Израиль Иранның «Оңтүстік Парс» кен орнындағы учаскесіне соққы бергенін мәлімдеді. Оның айтуынша, Иран Катарға қарсы шара қолданбаса, Израиль бұл нысанға жаңа соққылар жасамайды. Сондай‑ақ ол АҚШ Дохаға төнетін кез келген қауіпке жауап беруге дайын екенін атап өтті.
QatarEnergy компаниясы Иранның Рас-Лаффанға жасаған зымыран соққылары нысандарға, соның ішінде әлемдегі ең ірі сұйытылған табиғи газ өндіру қуаттарына айтарлықтай зиян келтіргенін хабарлады. Осы жағдайға байланысты Еуропадағы газ бағасы үш жылдан астам уақыт ішіндегі ең жоғары деңгейге дейін өсті.