Microsoft, Chevron және Engine No. 1 электр энергиясын жеткізу туралы келісім жасады

Microsoft (MSFT) АҚШ-тағы деректерді өңдеу орталықтарына электр энергиясын ұзақ мерзімге жеткізу жөнінде Chevron (CVX) және Engine No. 1 инвестициялық қоры­мен эксклюзивті келіссөздер жүргізіп жатыр, деп хабарлайды Reuters.

Жобаның құны шамамен 7 млрд долларды құрайды және Батыс Техаста газбен жұмыс істейтін электр станциясының құрылысы қарастырылған. Нысанның бастапқы қуаты 2500 МВт болады, кейін оны 5000 МВт-қа дейін арттыру мүмкіндігі бар. Өндірілетін электр энергиясы Microsoft-тың ірі дата-орталық кампусын қамтамасыз етуге бағытталады.

Компаниялар эксклюзивті келісімнің бар екенін растады, алайда коммерциялық шарттар әлі толық келісілмеген, сондықтан мәміле аяқталмаған. Бұған дейін Chevron мен Engine No. 1 дата-орталықтар маңында электр станцияларын салу жөніндегі серіктестік туралы хабарлаған болатын. Жобада GE Vernova (GEV) турбиналарын пайдалану жоспарланған.

Chevron нысанның алғашқы кезеңін 2027 жылға қарай іске қосуды күтеді. Қуатты 2500 МВт деңгейіне дейін жеткізу үш жылға дейін уақыт алуы мүмкін.