Билл Акман UMG ді сатып алуды және NYSE де листинг жасауды жоспарлап отыр

Билл Акманға тиесілі Pershing Square Capital Management компаниясы Тейлор Свифт, Дрейк және Bad Bunny‑мен жұмыс істейтін Universal Music Group (UMG) лейблін қолма‑қол қаражат пен акциялар арқылы сатып алу жөнінде ірі мәміле ұсынды. Хабарламадан кейін UMG акциялары 13%-ға қымбаттады.

Шамамен 64 млрд долларды құрайтын бұл мәміле UMG‑нің Pershing Square SPARC Holdings компаниясымен бірігуін көздейді. Нәтижесінде «жаңа UMG» құрылып, ол Невада штатында тіркелген, SEC‑ке есеп беретін корпорация болады, Нью-Йорк қор биржасында (NYSE) саудаланып, есептілікті US GAAP стандарттары бойынша ұсынатын болады.

 Pershing Square Universal‑дың төртінші ірі акционері болып табылады: компаниядағы үлесі 4,74%. UMG директорлар кеңесіне жолдаған хатында Акман компанияның қазіргі нарықтық бағалануы оның жетістіктерін толық көрсетпейді деп мәлімдеді. «Бизнестің жоғары көрсеткіштеріне қарамастан, UMG акцияларының бағасы төмен деңгейде қалып отыр», — деді Pershing Square бас директоры, бұл ретте компания акцияларының Euronext Amsterdam биржасында орналастырылғанын меңзеді.

UMG листингін Нью‑Йорк қор биржасына көшіру арқылы миллиардер‑инвестор музыкалық лейблді S&P 500 сияқты АҚШ‑тың негізгі биржалық индекстеріне енгізуге жарамды етуді көздеп отыр. Мұндай қадам ірі инвестициялық қорларды компания акцияларын сатып алуға мәжбүр етеді, ал бұл теориялық тұрғыдан олардың нарықтық құнын арттыруы мүмкін.