АҚШ қор индекстеріне арналған фьючерстер сауданың оң басталуын меңзейді

АҚШ қор индекстеріне арналған фьючерстер (ES00: +0,81%) 17 сәуірде аптаны оң нотада аяқтауға бағыт алды. Бұған ирандық өкілдің Ормуз бұғазы «толық ашық» деп мәлімдеуі себеп болды.

Иранның жоғары лауазымды шенеунігі X әлеуметтік желісіндегі жазбасында Ливанда атысты тоқтату аясында «Ормуз бұғазы арқылы барлық сауда кемелерінің өтуі бітімнің қалған мерзіміне толық ашық деп жарияланды» деп хабарлады. Сонымен қатар, Axios мәліметінше, АҚШ Иранның $20 млрд көлеміндегі бұғатталған қаражатын қайтаруды көздейтін мәмілені қарастыруда, оның орнына Иран байытылған уран қоры­нан бас тартуы тиіс.

АҚШ қазынашылық облигацияларының кірістілігі Израиль мен Ливан арасындағы 10 күндік бітімнің жасалуын инвесторлардың оң қабылдауы аясында төмендеді. АҚШ доллары негізгі әлемдік валюталарға қатысты әлсіреді, себебі соңғы кезде оның «қауіпсіз айлақ» ретіндегі тартымдылығы төмендеді. Осы ретте еуро бағамы 0,51%-ға өсіп, $1,184 деңгейіне жетті. Америкалық валюта қатарынан екінші апта төмендеумен аяқтауы мүмкін. Deutsche Bank AG және Wells Fargo & Co. бұған дейін соғысқа байланысты доллардың раллиі, ықтимал түрде, аяқталғанын атап өткен болатын. Себебі АҚШ пен Иран арасындағы әлсіз бітім инвесторларды тәуекелі жоғары активтерді іздеуге итермелеуде. Банктер долларды «шорттау» уақыты келгенін алға тартып отыр және жаһандық инвесторлар дәл осы стратегияны таңдағандай.

State Street Corp. деректеріне сәйкес, инвесторлар доллар бойынша хеджирлеу коэффициенттерін соңғы екі жылдағы ең жоғары деңгейге дейін ұлғайтқан. Ал опциондар нарығында доллар­ға деген сенім әлсіреп, позициялану соңғы апталардағы ең қолайсыз деңгейге жетті.

Ормуз бұғазының ашылғаны жөніндегі хабарламадан кейін мұнай бағамдары төмендеді. WTI маркалы мұнайдың мамыр айындағы фьючерсі барреліне $85,48 деңгейінде саудалануда (−9,73%). Алтын бағасы алдыңғы сессияда ай ішіндегі күндік максимумға жеткеннен кейін өсті. Соңғы бір аптада сары металлдың спот бағасы 0,9%-ға артты. Алтынның маусым айындағы фьючерсі унциясына шамамен $4 879 деңгейінде тұр (+1,48%).