Innovative Solutions & Support (ISSC) 2026 қаржы жылының II тоқсаны бойынша нәтижелерін жариялап, бір акцияға шаққандағы пайда бойынша талдаушылардың күтулерінен айтарлықтай асып түсті. Freedom Broker пікірінше, компания бірігу және жұтылу (M&A) бойынша белсенді мәмілелер мен коммерциялық авиация сегментіндегі бизнес өсімі арқасында авиациялық автопилоттар нарығындағы позициясын нығайтып келеді. Innovative Solutions & Support азаматтық және әскери авиацияға арналған авионика, автопилоттар және ұшу басқару жүйелерін әзірлейді.
ISSC-тің түзетілген бір акцияға шаққандағы пайдасы $0,26-ны құрап, консенсус-болжамнан шамамен 50%-ға жоғары болды. Түсім жылдық есеппен 2%-ға өсіп, $22,4 млн-ға жетті, бұл да нарық күтулерінен жоғары нәтиже көрсетті.
Күшті қаржылық есептілік пен болжамдардың жақсаруы аясында Freedom Broker ISSC акцияларының мақсатты бағасын $27-ға дейін көтеріп, «Сатып алу» ұсынымын растады. Сарапшылар компания кірісінің одан әрі өсуін коммерциялық авиациядағы бизнестің кеңеюі, жаңа активтердің интеграциясы және авиониканы жаңғыртуға тұрақты сұраныс есебінен күтуде.
Тоқсанның негізгі драйвері коммерциялық сатудан кейінгі қызмет көрсету және іскерлік авиация сегменті болды. F-16 бағдарламасын есепке алмағанда, кіріс жылдық мәнде 69%-ға өсіп, $18,9 млн-ға жетті, ал жалпы маржа 51,1%-ға дейін жетіп, менеджменттің шамамен 45% деңгейіндегі ұзақ мерзімді бағдарынан айтарлықтай асты.
Freedom Broker талдаушылары үш сатып алудың стратегиялық маңызын да атап өтеді: Moog және Honeywell автопилоттарының алынған өнім желілері ISSC-ке нарықтағы ірі автопилот жеткізушілерінің бірі болуға мүмкіндік береді. Енді компания шағын авиациядан бастап ірі бизнес-джеттерге дейінгі әуе кемелерінің кең ауқымын қамтиды.
Freedom Broker қосымша оң фактор ретінде Экстондағы зауытта F-16 бағдарламасы бойынша жабдықты қайта сертификаттау аяқталғанын атап өтеді. Компания толық көлемде өндірісті қайта бастап, алдағы жылдары осы бағдарлама бойынша кірістің тұрақты деңгейін күтуде.
Жеке инвестициялық ұсыныс болып табылмайды