Freedom Broker: CrowdStrike акцияларының нысаналы бағасы $800-ге дейін көтерілді
Биржалық жаңалықтар
8 июня 2026, 17:30
Freedom Broker сарапшылары CrowdStrike Holdings (CRWD) акцияларының нысаналы бағасын $520-дан $800-ге дейін көтеріп, «Сатып алу» ұсынымын растады. Бұл шешім 2027 қаржы жылының бірінші тоқсаны бойынша жарияланған күшті есеп пен жылдық болжамның жақсартылуынан кейін қабылданды. CrowdStrike — қорғауға арналған Falcon бұлтты платформасын дамытатын америкалық киберқауіпсіздік компаниясы. Компания әлемдегі киберқауіпсіздік шешімдерінің ірі жеткізушілерінің бірі саналады.
Freedom Broker бағалауынша, CrowdStrike жасанды интеллект нарығының өсуінен негізгі пайда көретін компаниялардың бірі мәртебесін сақтап отыр. Сарапшылардың пікірінше, компания ЖИ-қосымшаларды, бұлтты есептеулерді және жаңа агенттік жүйелерді қорғауға арналған инфрақұрылым жеткізушісі ретінде стратегиялық маңызға ие бола түсуде.
2027 қаржы жылының бірінші тоқсанында CrowdStrike табысы жылдық мәнде 26%-ға өсіп, $1,39 млрд-қа жетті. Бұл көрсеткіш компания болжамынан да, нарық күткен деңгейден де жоғары болды. Түзетілген акцияға шаққандағы сұйылтылған пайда 51%-ға өсіп, $1,10 құрады.
Компания сондай-ақ жылдық рекурренттік табыстың рекордтық тоқсандық өсімін көрсетті: көрсеткіш 32%-ға артып, $256 млн-ға жетті. Freedom Broker мамандары генеративті жасанды интеллектінің белсенді енгізілуі аясында Falcon платформасына сұраныстың жоғары екенін атап өтті. Бұған қоса, Falcon Flex лицензиялау моделі де бизнеске қолдау көрсетіп, CrowdStrike сервистерін қазіргі клиенттер арасында кеңірек пайдалануға мүмкіндік беруде.
Сонымен қатар, бірқатар озық индикаторлар нарық күткен деңгейден төмен болды. Billings көрсеткіші (клиенттерге ұсынылған тауарлар мен қызметтер үшін қойылған шоттардың жалпы сомасы) 18%-ға өсіп, $1,35 млрд-қа жетті, ал RPO көрсеткіші (қолданыстағы келісімшарттар бойынша келешекте алынуы тиіс табыс көлемі) $8,8 млрд болды. Сарапшылар мұны сұраныстың төмендеуімен емес, келісімшарт құрылымының өзгеруімен және клиенттердің икемдірек төлем схемаларына көшуімен байланыстырады.
CrowdStrike менеджменті 2027 қаржы жылына арналған болжамын да жақсартты. Компания табыстың $5,91–5,96 млрд аралығында болуын күтеді, бұған дейінгі болжам $5,87–5,93 млрд деңгейінде болған. Ал түзетілген акцияға шаққандағы пайда болжамы $4,88–4,96 дейін көтерілді.
Бұл жеке инвестициялық ұсыным болып табылмайды.