Apple капиталдануы алғаш рет $5 трлн-нан асты — Freedom Broker талдаушыларының пікірі

Сейсенбі күні Apple (AAPL) акциялары тарихи ең жоғары деңгей — $342,89-ға дейін көтеріліп, соның нәтижесінде компанияның капиталдануы алғаш рет қысқа уақытқа $5 трлн-нан асып түсті. Сауда жабылғанға қарай қағаздар түзетіліп $340, 08 деңгейіне дейін түсті, ал нарықтық құны шамамен $4,98 трлн болды. Дегенмен Apple Nvidia (NVDA) компаниясынан озып, әлемдегі ең қымбат жария компания мәртебесін сақтап қалды. Freedom Broker талдаушыларының пікірінше, $5 трлн деңгейіндегі капиталдануға қысқа мерзімді жету маңызды психологиялық межеге айналып, технология секторындағы инвесторлардың қалауының өзгеруін көрсетеді.

Apple неге өсіп жатыр

Apple Inc. — тұтынушылық электроника мен цифрлық сервистердің әлемдегі ең ірі өндірушілерінің бірі; iPhone, Mac, iPad, Apple Watch құрылғылары мен App Store, iCloud және Apple Music сервистерін қамтитын құрылғылар және бағдарламалық өнімдер экожүйесін дамытады.

Freedom Broker талдаушыларының пікірінше, $5 трлн белгісін символикалық түрде еңсеру технология секторындағы инвестициялық басымдықтардың өзгеруін көрсетеді. Бұрын инвесторлар жасанды интеллектке шығындарды белсенді арттыратын компанияларға басымдық берсе, қазір нарық тұрақты табыстылығы, мықты ақша ағыны және капиталды неғұрлым тәртіпті бөлуі бар бизнеске жиірек ставка жасап отыр.

Сонымен бірге, Freedom Broker пікірінше, капиталданудың $5 трлн-нан жоғары деңгейде әрі қарай орнығуы алдағы тоқсандық есептілікке және Apple-дың технологиялық дербестігін жоғалтпай өз ІІ-функцияларын жеделдетіп дамыту қабілетіне байланысты болады.

Сатылымның жаңа форматы сұранысты қолдайды

Сейсенбі күні Apple ресми түрде Apple Upgrade бағдарламасын таныстырды, ол америкалық сатып алушыларға құрылғыларды сатып алудың орнына лизингке рәсімдеуге мүмкіндік береді. Klarna-мен серіктестікте пайдаланушылар айына $17,99-дан бастап екі жылға дейінгі мерзімге iPhone-ды жалға ала алады. Ұқсас бағдарлама Apple Watch, iPad және Mac құрылғыларына да қолданылады. Жаңа сервис құрылғылар бағасының қымбаттауының әсерін азайтып, назарды бір жолғы бағадан ай сайынғы төлемге аударуға бағытталған.

Нарық күшті тоқсандық есепті күтуде

Apple-дың үшінші тоқсан бойынша қаржылық нәтижелері 30 шілдеде сауда жабылғаннан кейін жарияланады. Алдағы есептілік сондай-ақ Тим Кук үшін компанияның бас директоры ретіндегі, өкілеттіктерді Джон Тернусқа тапсырар алдындағы соңғысы болады; ол 1 қыркүйектен бастап Apple-ды ресми түрде басқарады.

Капиталдану бойынша Nvidia-мен бәсеке

Бұған дейін Apple жад құнының өсуіне байланысты Mac және iPad-тың жекелеген модельдері бойынша бастапқы бағаларды көтерген болатын, ал талдаушылар жаңа iPhone-дарға қатысты да осындай қадам болуы мүмкін екенін жоққа шығармайды. 

Сонымен қатар, шілде айында Apple қайтадан озып, нарықтық капиталдану бойынша Nvidia-ны артта қалдырып, әлемдегі ең қымбат жария компания мәртебесін өзіне қайтарды. Сондай-ақ компания PrismML стартапының iPhone-да бұлттық инфрақұрылымды пайдаланбай-ақ ірі жасанды интеллект модельдерін тікелей іске қосуға мүмкіндік беретін технологияларын зерделеп жатыр.

Жеке инвестициялық ұсыныс болып табылмайды.