FB RPC мұнай сервистік компаниясының акциялары бойынша «Ұстау» ұсынымын сақтап қалды

Freedom Broker талдаушылары RPC, Inc. (RES) компаниясының 2026 жылдың екінші тоқсанындағы нәтижелерін қалыпты түрде оң деп бағалап, «Ұстау» ұсынымын сақтап қалды. Пайданың күшті динамикасы мен рентабельділіктің өсуіне қарамастан, сарапшылар жақсару көбіне мұнай нарығындағы уақытша конъюнктурамен байланысты екенін атап өтеді. Акцияның нысаналы бағасы $6,2-ден $6-ға төмендетілді, бұл ағымдағы $5,6 баға кезінде шамамен 11% өсу әлеуетін білдіреді.

RPC қандай компания

RPC, Inc. — АҚШ-тағы мұнай сервистік компания, ол қабатты гидрожару, цементтеу, ұңғымаішілік жұмыстар, жабдықтарды жалға беру және басқа да сервистерді АҚШ-тағы мұнай-газ өндірушілеріне ұсынады.

Мұнайдың жоғары бағасы тоқсандық нәтижелерді қолдады

Freedom Broker талдаушыларының пікірінше, екінші тоқсанда қаржылық көрсеткіштердің жақсаруына негізгі фактор — әлемдік мұнай бағасының өсуі аясында АҚШ-та бұрғылау белсенділігінің артуы болды. Алайда сарапшылар бұл фактор уақытша сипатқа ие болуы мүмкін деп санайды.

2026 жылдың екінші тоқсанында RPC түсімі алдыңғы тоқсанмен салыстырғанда 1,3% өсті. Көрсеткіш $460,9 млн-ға жетті. Түзетілген таза пайда 15,7% өсіп — $17,8 млн болды, ал акцияға шаққандағы түзетілген пайда $0,08-ды құрап, нарықтық консенсустан шамамен екі есе жоғары болды.

Талдаушылар атап өткендей, рентабельділіктің жақсаруына орындалатын жұмыстар құрылымының қолайлырақ болуы, ең алдымен Pressure Pumping (жоғары қысыммен айдау, арнайы сұйықтықтар мен ерітінділерді аса жоғары қысыммен жердің тереңіне айдау) сегментінде ықпал етті. Түзетілген EBITDA $66 млн-ға дейін өсті (алдыңғы тоқсанда $53,5 млн), ал оның маржасы 14,3%-ға дейін артты. Сонымен қатар GAAP стандарттары бойынша таза пайда $12,1 млн болды (алдыңғы тоқсанда $0,9 млн), ал сұйылтылған акцияға шаққандағы пайда $0,05-ке жетті.

Күшті баланс артықшылық болып қала береді

Freedom Broker компания сектордағы ең орнықты қаржылық позициялардың бірін сақтап отырғанына назар аударады. Тоқсан қорытындысы бойынша ақша қаражаты қарыз міндеттемелерінен шамамен $128 млн-ға артық болды, ал теріс таза қарыз алдыңғы тоқсанмен салыстырғанда іс жүзінде өзгермей, $127,6 млн-ды құрады.

Айналым капиталы өзгерістерін есепке алмағанда операциялық ақша ағымы жылдық мәнде 9% өсіп — $64,2 млн-ға жетті, ал күрделі шығындар 10% қысқарып — $38,7 млн болды. Талдаушылар жылдың екінші жартысында инвестициялардың ұлғаюын күтеді.

Директорлар кеңесі де тоқсандық дивидендті акцияға $0,04 деңгейінде сақтап қалды, бұл қағаздардың ағымдағы бағасына шаққанда жылдық шамамен 3% кірістілікті білдіреді. Бұл ретте компания екінші тоқсанда акцияларды кері сатып алуды жүргізген жоқ.

Неліктен талдаушылар сақтықты сақтайды

Күшті есептілікке қарамастан, Freedom Broker сарапшылары RPC акцияларына қатысты бейтарап көзқарасты сақтайды. АҚШ-тағы бұрғылау белсенділігінің өсуін негізінен мұнайдың жоғары бағасы қолдап отыр, деп атап өтеді талдаушылар. Таяу Шығыстағы жағдай қалыпқа келгеннен және Ормуз бұғазы арқылы жеткізілімдер қалпына келгеннен кейін белсенділік айтарлықтай төмендеуі мүмкін, бұл компанияның қаржылық нәтижелеріне қысым түсіреді.

Бірінші тоқсанның көрсеткіштері

2026 жылдың бірінші тоқсанының қорытындысы бойынша RPC бизнестің қалпына келуін көрсеткен болатын: түсім алдыңғы тоқсанмен салыстырғанда 7% өсіп — $454,8 млн-ға жетті, түзетілген EBITDA $53,5 млн-ды құрады, ал компания алдыңғы тоқсандағы шығыннан кейін қайтадан таза пайдаға шықты. Ол кезде менеджмент те нарықтық конъюнктураның біртіндеп жақсарып келе жатқанын атап өткен еді. 

Жеке инвестициялық ұсыным болып табылмайды.