Freedom Holding Corp.-тың 2027 ф. ж. I тоқсанындағы қаржылық нәтижелері

Freedom Holding Corp. компания үшін 2026 жылғы 30 маусымда аяқталған 2027 фискалдық жылдың I тоқсанының қаржылық нәтижелерін жариялайды.

Қаржылық көрсеткіштер

Компания 2027 қаржы жылының I тоқсанында жиынтық түсімді $732,9 млн деңгейінде көрсетті, бұл өткен жылғы осы кезеңдегі $524 млн-мен салыстырғанда жоғары. Түсімнің өсуін бірден бірнеше бағыт қамтамасыз етті: пайыздық және комиссиялық кірістердің артуы, сауда бағалы қағаздарымен операциялардан түскен таза қаржылық нәтижесінің оң динамикасы. Есепті кезең қорытындысы бойынша салық салуға дейінгі пайда $40,8 млн-ға жетті, таза пайда $31,7 млн-нан асты, ал бір жай акцияға шаққандағы пайда $0,52** болды.

2026 жылғы 30 маусымдағы жағдай бойынша ақша қаражаттары мен олардың баламалары, шектелген қаражат және инвестициялық бағалы қағаздар көлемі $7 млрд құрады, жиынтық активтер $14 млрд-қа жетті, ал акционерлердің меншікті капиталы $1,5 млрд болды.

Клиенттік база

Freedom Holding Corp. құрамына кіретін компаниялардың клиенттік базасы 8,7 млн-ға дейін өсті. 2026 жылғы 31 наурыздағы көрсеткіштермен салыстырғанда нәтижелер: брокерлік шоттар бойынша – 874 мың (+16 мың), Freedom SuperApp банктік мобильді қосымшасының пайдаланушылары – 5,7 млн (+493 мың) және қаржылық емес компаниялардың клиенттері – 1 498 мың (+393 мың) болды.

2026 жылғы 30 маусымдағы жағдай бойынша Freedom экожүйесінің, оның ішінде серіктес компаниялар пайдаланушыларын қоса алғанда, клиенттерінің жалпы саны 13,8 млн-нан асты, бұл өткен жылы 11,7 млн болған.

Нәтижелердің негізгі факторлары

Холдингтің пайыздық кірісі $198,6 млн-нан $295,1 млн-ға дейін артты, бұл маржиналдық қарыздар, клиенттерге берілген кредиттер, сондай-ақ өтеуге дейін ұсталатын бағалы қағаздар, сауда және сатуға қолжетімді бағалы қағаздар, кері РЕПО операциялары және банктерде орналастырылған қаражаттар бойынша кірістердің өсуі есебінен болды.

Комиссиялық кірістер $107,6 млн-нан $156,7 млн-ға дейін көбейді, негізінен клиенттік базаның және сауда белсенділігінің артуы салдарынан брокерлік қызметтерден түсетін кірістердің өсуі есебінен.

Сауда бағалы қағаздары бойынша таза пайда $79,8 млн-ға дейін өсті (өткен жылғы $45,6 млн-мен салыстырғанда) – ең алдымен Қазақстанның егемен бағалы қағаздарын, корпоративтік борыштық бағалы қағаздарды сату және есепті кезең соңында топ портфелінде қалған бағалы қағаздардың әділ құнының өсуі есебінен.

Валюта операциялары бойынша нәтиже жақсарды – $12,9 млн шығыннан $13,7 млн пайдаға дейін – негізінен теңгенің еуроға қатысты бағамының тұрақты болуы аясында валюталық қайта бағалаудан болған шығындардың айтарлықтай қысқаруының арқасында, ал өткен жылы айтарлықтай әлсіреу байқалған еді.

Компанияның шығыстары шамамен $691,3 млн болды, бұл өткен жылғы $476,5 млн-мен салыстырғанда жоғары. Өсімнің негізгі факторлары сақтандыру шығындары мен полис ұстаушыларға төлемдердің (қайта сақтандыруды шегергенде), пайыздық шығыстардың, еңбекақы төлеу және бонустарға арналған шығындардың, жалпы және әкімшілік шығыстардың ұлғаюы болды. Бұл ретте шығындардың өсуі комиссиялық шығыстардың төмендеуі есебінен ішінара өтелді.

Freedom Holding Corp. Қазақстандағы әлеуметтік бастамалар мен орнықты даму жобаларын «Freedom Шапағат» корпоративтік қоры арқылы іске асыруға жүйелі түрде инвестиция салады. 2026 күнтізбелік жылының I жартыжылдығында осы мақсаттарға шамамен $25 млн бағытталды.

Кезеңнің маңызды жетістіктері

2026 жылғы маусымда компания Freedom бірыңғай брендіне көшу туралы жариялап, оның аясында экожүйенің қаржылық және цифрлық сервистерін біріктірді. Ребрендинг холдингтің бірыңғай платформаны дамыту, брендтің танымалдылығын арттыру және барлық қатысу нарықтарында үздіксіз клиенттік тәжірибе құру стратегиясын көрсетеді.

Тағы бір маңызды оқиға – S&P Global Ratings агенттігінің Freedom Holding Corp.-тың негізгі қаржылық бөлімшелерінің кредиттік рейтингтерін «B+» деңгейінен «BB-» деңгейіне дейін тұрақты болжаммен, сондай-ақ еншілес компаниялардың Қазақстанның ұлттық шкаласы бойынша рейтингтерін «kzA-» деңгейіне дейін көтеруі болды. Freedom Holding Corp.-тың өз рейтингі «B-» деңгейінде тұрақты болжаммен сақталды. Агенттік топтың тәуекел-менеджментінің нығаюын және орнықты қаржылық көрсеткіштерін көтерудің негізгі факторлары ретінде атап өтті.

Холдингтің Түркиядағы даму стратегиясын іске асырудағы маңызды оқиға Turkish Bank A.Ş. сатып алу мәмілесінің аяқталуы болды: Freedom Finansal Hizmetler A.Ş. Түркиядағы қажетті реттеушілік мақұлдауларды алғаннан кейін банктің акционерлік капиталының 99,32% мөлшеріндегі бақылаушы пакеттің иесі атанды. Акционерлердің жалпы жиналысы Директорлар кеңесінің жаңа құрамын бекітіп, банктің атауын Freedom Bank A.Ş. деп өзгерту туралы шешім қабылдады.

Сондай-ақ 2026 жылғы 10 шілдеде Freedom 1933 жылғы АҚШ-тың «Бағалы қағаздар туралы» заңындағы Regulation S ережесіне сәйкес АҚШ резиденті емес тұлғаларға қолданылатын рәсім бойынша жалпы сомасы $300 млн болатын 2 374 356 жай акцияны орналастыруды аяқтады.

Осы баспасөз хабарламасы шығарылған сәтте компания жетекші технологиялық компаниялардың бірі – ТОО Bilim Group LTD-дағы үлесті сатып алу мәмілесін аяқтады. Бұл Қазақстан мен Орталық Азиядағы білім беру технологиялары саласындағы ең ірі ойыншы. Мәміле ҚР Бәсекелестікті қорғау және дамыту агенттігінің мақұлдауын алды, бұл жасанды интеллектіні қолдана отырып, бірлескен білім беру жобаларын одан әрі дамыту мүмкіндіктерін ашады.

 

Анықтама

Есептілік валютасын қайта есептеуге байланысты резервтің өзгеруі.

Холдингтің өзге жиынтық кірісі/шығыстары құрамына консолидациялау кезінде еншілес компаниялардың қаржылық есептілік көрсеткіштерін холдинг валютасына қайта есептеу барысында туындайтын есептілік валютасы резервін қайта есептеуден болатын кірістер мен шығыстар енгізілген. Активтер мен міндеттемелер баптары есепті күнгі бағам бойынша, кірістер мен шығыстар баптары – есепті кезеңдегі орташа бағам бойынша қайта есептеледі. Резервтің оң өзгерісі еншілес компаниялардың функционалдық валюталарының холдинг есеп беретін валютаға қатысты бағамы төмендеген кезде туындайды.

* Өзгеше көрсетілмесе, барлық салыстырулар 2025 жылғы 30 маусымда аяқталған тоқсан көрсеткіштерімен келтіріледі.

** Пайда 60,4 млн дана базалық орташа өлшенген акция санына сүйене отырып есептелген.

Компания туралы

Freedom Holding Corp. – қаржылық қызметтер көрсететін, телекоммуникациямен айналысатын, әуе билеттері мен мәдени және спорттық іс-шараларға билеттерді онлайн сататын, онлайн-супермаркет қызметтерін және басқа да көптеген қызметтерді ұсынатын әртараптандырылған компания. Еншілес компанияларды қоса алғанда, Freedom Holding Corp.-та 12,1 мыңнан астам қызметкер жұмыс істейді. Холдингтің бөлімшелері мен еншілес компаниялары 24 елде, оның ішінде Қазақстан, АҚШ, Кипр, Армения, Өзбекстан, Еуроодақ елдері және басқа да елдерде орналасқан. Freedom Holding Corp.-тың жай акциялары АҚШ-тың Бағалы қағаздар және биржалар комиссиясында тіркелген және Nasdaq Capital Market алаңында FRHC тикерімен саудаланады.

БАҚ үшін байланыстар: [email protected]

www.freedomholdingcorp.com