Freedom сарапшылары қытайлық технологиялық Alibaba Group Holding Ltd. (BABA) компаниясының акциялары бойынша «Сатып алу» ұсынымын және $200 мақсатты бағасын сақтап қалды. Ағымдағы баға $119,30 болғанда, бұл 67,64% өсу әлеуетін білдіреді. Ұзақ мерзімді негізгі драйвер — бұлтты бизнестің жеделдеуі және жасанды интеллектті (ЖИ) монетизациялау болып қала береді, алайда ЖИ-ге ауқымды инвестициялар әзірге компанияның рентабельділігі мен еркін ақша ағынын айтарлықтай төмендетіп отыр.
Alibaba e-commerce компаниясынан ЖИ-платформаға айналуда
Alibaba — электрондық коммерцияны, бұлтты есептеулерді және ЖИ негізіндегі өз шешімдерін дамытатын Қытайдың ең ірі технологиялық компанияларының бірі. Топ экожүйесіне бөлшек онлайн-сатып алуларға арналған Taobao алаңы, брендтерге арналған Tmall маркетплейсі, халықаралық B2B-платформа Alibaba, шекарааралық бөлшек сауда сервисі AliExpress және деректерді сақтау мен есептеуге арналған Alibaba Cloud бұлтты платформасы кіреді. Компания сондай-ақ Alipay төлем платформасына иелік етеді.
Сарапшылардың пікірінше, дәстүрлі e-commerce сегментінің әлсіздігі Alibaba нәтижелеріне қысым факторы болып қала береді, алайда бұлтты бағыттың жеделдеуі және ЖИ-ді біртіндеп коммерцияландыру ұзақ мерзімді өсім үшін анағұрлым елеулі әлеует қалыптастырады.
2026 жылдың II тоқсанында Alibaba кірісі 9% ж/ж өсіп, 268,953 млн юаньға ($39,639 млн) жетті. Бұл ретте таза пайда 75%-ға төмендеп, 10,444 млн юаньды ($1,539 млн) құрады, ал түзетілген таза пайда 38%-ға төмендеп, 20,715 млн юаньға ($3,053 млн) түсті.
Бұлт және ЖИ негізгі бизнестен едәуір жылдам өсуде
AI Cloud and Compute Services бағытының кірісі 45% ж/ж өсіп, 48,437 млн юаньға ($7,139 млн) жетті. Түзетілген EBITA 133%-ға өсіп, 5,628 млн юаньды ($830 млн) құрады.
ЖИ-өнімдерден түскен кіріс 12,376 млн юаньға ($1,824 млн) жетіп, үш таңбалы қарқынмен қатарынан 12-тоқсан өсім көрсетті. Alibaba сондай-ақ өз чиптерін және Qwen ЖИ-модельдерін дамытып, технологиялық тізбектің барлығын — есептеу инфрақұрылымынан бастап соңғы қолданбаларға дейін — бақылауға ұмтылуда.
Алайда ЖИ әзірге болашаққа арналған қымбат ставка болып қалып отыр: тоқсандағы капиталдық шығындар 75%-ға өсіп, 67,678 млн юаньға ($9,975 млн) жетті. Еркін ақша ағыны теріс болды — 44,670 млн юань ($6,584 млн), бұл өткен жылдағы 18,815 млн юань көлеміндегі шығынан нашар.
E-commerce әзірге дәл сондай серпін бермей отыр
Alibaba-ның Қытайдағы негізгі e-commerce бизнесі әлі де әлсіз буын болып отыр: транзакциялық белсенділіктің төмендеуі және тұтынушылық сұраныстың әлсіздігі аясында оның кірісі 8%-ға төмендеп, 110,900 млн юаньға ($16,345 млн) түсті.
Сонымен қатар жедел коммерция бағыты әлдеқайда жылдам өсуде: оның кірісі 45%-ға өсіп, 53,295 млн юаньға ($7,855 млн) жетті. Alibaba орташа чектің өсуі және логистика тиімділігінің артуы есебінен Taobao Instant Commerce юнит-экономикасының жақсарғанын атап өтті.
Осылайша, инвесторлар үшін қазір дәстүрлі электрондық сауданың қалпына келуі ғана емес, сонымен бірге Alibaba-ның ЖИ-ге өсіп келе жатқан сұранысты қаншалықты тез тұрақты пайдаға айналдыра алатыны да маңызды.
Әлеует сақталады, бірақ тәуекелдер артты
Freedom Broker сарапшылары қазіргі пайда әлсіздігінің едәуір бөлігі инвестициялық фазамен байланысты және ұзақ мерзімді инвестициялық кейсті жоққа шығармайды деп санайды. Alibaba-ны қайта бағалау үшін негізгі факторлар — ЖИ монетизациясының қарқыны, бұлтты бизнестің өсуі, Қытайдағы тұтынудың қалпына келуі және капитал салымдарының тиімділігі.
Мақсатты бағаның динамикасы
Бұған дейін Freedom сарапшылары Alibaba акцияларын $170 мақсатты бағамен «Сатып алуға» ұсынған. Негізгі драйверлер ретінде сарапшылар бұлтты бизнестің және ЖИ бағытының жеделдеуі, Қытайдағы тұтынушылық сұраныстың қалпына келуі және жоғары бәсеке жағдайындағы компанияның тұрақтылығын атаған.
Бұған дейін Alibaba бұлтты бизнестің жеделдеуін де көрсеткен: IV қаржылық тоқсанда бөлімше кірісі жыл/жылға 38%-ға өсті, ал ЖИ-өнімдерден түсетін кіріс қатарынан 11-тоқсан бойы үш таңбалы қарқынмен артты. Бұл ретте электрондық коммерцияның негізгі бағыты Қытайдағы ішкі сұраныстың әлсіздігі салдарынан қысымда қалды. Alibaba-ның ЖИ-бизнесін дамытудың қосымша факторы ретінде сарапшылар өз есептеу инфрақұрылымын кеңейтуді атады.
Жеке инвестициялық ұсыныс болып табылмайды.