Nvidia жаңа мәміле есебінен позициясын күшейтеді, бірақ актив үшін артық төлейді — Freedom

Hugging Face платформасын $12,93 млрд-қа сатып алу Nvidia (NVDA) компаниясына жасанды интеллект саласындағы позициясын нығайтуға мүмкіндік береді. Hugging Face — ашық жасанды интеллект модельдерін, деректер жиынтықтарын және қолданбаларды әзірлеу, тарату және енгізуге арналған платформа әрі қауымдастық. Ол Nvidea-ға ашық ІІ-модельдер, деректер жиынтықтары мен құралдардың ірі экожүйесіне қол жеткізуге жол ашады. Алайда активтің құны оның түсіміне қатысты айтарлықтай жоғары болып көрінеді, ал қосымша тәуекелдер ретінде киберқауіпсіздік пен реттеушілердің рұқсатын алу қажеттілігі қалады, деп есептейді Freedom Finance Global жетекші талдаушысы Наталья Мильчакова.

Nvidia не үшін Hugging Face-ті сатып алады

Nvidia (NVDA), графикалық процессорлар мен жасанды интеллектке арналған есептеу шешімдерінің ең ірі әзірлеушісі, Hugging Face ІІ-платформасын $12,93 млрд-қа сатып алу туралы келісімге келді. Қазір оны 18 млн-нан астам әзірлеуші, зерттеуші және контент жасаушы, сондай-ақ 200 мыңнан астам компания пайдаланады. Платформада 3 млн-нан астам модель, 500 мың деректер жиынтығы және 1 млн қолданба орналастырылған.

Nvidia үшін қосымша тәуекелдер ретінде талдаушы Наталья Мильчакова Hugging Face-тің кибершабуылдарға осалдығын және қазіргі таңда мәмілеге монополияға қарсы органдардың рұқсатының жоқ екенін атайды.

Мильчакованың пікірінше, сатып алу Nvidia-ға ашық ІІ-модельдер, деректер мен құралдардың орасан репозиторийіне қол жеткізуге мүмкіндік береді. Бұл чип өндірушіге жабдық нарығынан тыс ықпалын кеңейтіп, жасанды интеллект әзірлеу экожүйесінде позициясын нығайтуға жол ашады.

Мәміле Nvidia-ның ірі клиенттері, соның ішінде Meta (META), Microsoft (MSFT) және OpenAI, өз процессорларын әзірлеп, компания чиптеріне тәуелділікті азайтуға ұмтылып жатқан жағдайда ерекше маңызды. Ашық модельдер экожүйесін дамыту Nvidia-ға көбірек әзірлеушілерді тартуға көмектесуі мүмкін, ал оларға кейін ІІ-сервистерді іске қосу үшін есептеу қуаттары қажет болады.

Hugging Face ашық платформа болып қала ма

Мәміле жарияланғаннан кейінгі негізгі сұрақтардың бірі — Hugging Face-тің нақты бір жабдық өндірушілеріне тәуелсіз алаң ретіндегі болашағы. Nvidia басшысы Дженсен Хуанг Hugging Face бүкіл ІІ-экожүйесі үшін ашық платформа болып қала беретінін мәлімдеді.

Әзірлеушілер модельдерді, бағдарламалық құралдарды, бұлт сервистерін және есептеу платформаларын өздері таңдай алады. Hugging Face-пен жұмыс істеу үшін Nvidia жабдығын пайдалану міндетті болмайды.

Мильчакова Nvidia басшылығының бұған дейінгі мәлімдемелерін ескере отырып, мұндай сценарийді әбден ықтимал деп санайды. Ашықтықты сақтау Hugging Face-ке әзірлеушілердің кең аудиториясымен жұмысты жалғастыруға және платформаны тек Nvidia экожүйесімен шектемеуге мүмкіндік береді.

Сонымен бірге стратегиялық тұрғыдан сатып алу чип өндіруші үшін пайдалы болуы мүмкін. Nvidia қазірдің өзінде Hugging Face-те ашық модельдер мен деректердің ең ірі жеткізушісі: компания алаңға 500-ден астам модель және 250-ден астам деректер жиынтығын орналастырған.

Hugging Face бағасы неге сұрақ тудырады

Мильчакова мәміленің басты кемшілігі ретінде оның құнын атайды. $12,93 млрд баға Hugging Face бизнесінің ауқымымен салыстырғанда жоғары болып көрінеді. Платформаның жылдық түсімі жуырда шамамен $150 млн болған.

Салыстыру үшін, 2023 жылы Hugging Face $4,5 млрд бағалаумен $235 млн тартқан. Nvidia сол раундқа басқа инвесторлармен бірге қатысқан. Кейінірек, БАҚ дерегінше, стартап Nvidia-ның бизнесін шамамен $7 млрд-қа бағалауды көздеген инвестициялық ұсынысын қабылдамай тастаған.

Сондықтан қазіргі сатып алу құны, Freedom Finance Global талдаушысының пікірінше, Nvidia үшін артық төлеу тәуекелін алып келеді. Мұндай бағалауды ақтау үшін компанияға Hugging Face бизнесінің елеулі өсімін қамтамасыз етіп, платформаны интеграциялаудан стратегиялық артықшылықтар алу қажет болады.

Киберқауіпсіздік пен реттеушілер тәуекел болып қала береді

Тағы бір тәуекел факторы Hugging Face-тің қорғалуымен байланысты. 2026 жылдың жазында OpenAI ІІ-модельдерді тестілеу кезінде болған инцидент туралы хабарлады, оның әрекеттері Hugging Face инфрақұрылымына әсер еткен. Компаниялар болған оқиға бойынша бірлескен тергеуді бастап, киберқауіпсіздік бойынша сыртқы мамандарды тартты.

Мильчакованың пікірінше, бұл жағдай платформаның осалдығын көрсетеді әрі бір мезгілде қауіптердің жаңа түрін айқындайды: ақпараттық жүйелерге қарсы күрделі әрекеттерді адамның тікелей қатысуынсыз-ақ ІІ-модельдердің өзі орындай алады.

Қосымша белгісіздік реттеушілерге байланысты. Мәмілені жабу 2027 жылдың бірінші жартысында күтіледі және, соның ішінде, мемлекеттік органдардың қажетті рұқсаттарын алуға тәуелді. Әзірге олар алынған жоқ.

Жеке инвестициялық ұсыныс болып табылмайды.