Freedom Broker Argan акциялары бойынша ұсынымды «Сатып алу» деңгейіне көтерді

Freedom Broker талдаушылары Сергей Глинянов пен Аружан Сейфулла Argan (AGX) акциялары бойынша ұсынымды «Ұстаудан» «Сатып алуға» дейін көтеріп, мақсатты бағаны $700 деңгейінде қалдырды. Талдау шолуын дайындау кезінде пайдаланылған $410,40 бағасынан есептегенде, бағдар 70,57% өсім әлеуетін білдіреді.

Компания нәтижелері, өсу факторлары және тәуекелдері бойынша егжей-тегжейлі талдау Freedom Broker-дің жаңа аналитикалық шолуында ұсынылған.

Argan – америкалық инжиниринг және құрылыс компаниясы. Ол электр станцияларын, өнеркәсіптік нысандарды, энергетикалық және телекоммуникациялық желілерді жобалап, салып, пайдалануға береді. Түсімнің негізгі бөлігін газ генерациясы жобалары қамтамасыз етеді. Компания акциялары Нью-Йорк қор биржасында AGX тикерімен саудаланады.

Argan түсімі 61,5% өсті

2027 қаржы жылының екінші тоқсанында Argan-ның шоғырландырылған түсімі рекордтық $384 млн-ға жетті. Көрсеткіш жылдық мәнде 61,5%-ға және алдыңғы тоқсанмен салыстырғанда шамамен 32%-ға өсті.

Операциялық пайда 89%-ға, $56,8 млн-ға дейін өсті. Таза пайда 51%-ға, $35,3 млн-нан $53,3 млн-ға дейін, ал бір акцияға шаққандағы сұйылтылған пайда $2,50-ден $3,76-ға дейін артты.

Freedom Broker талдаушыларының бағалауынша, нәтижелер компанияның негізгі жобаларды сәтті орындап жатқанын растайды. Алайда кейінірек алынуы күтілген түсімнің бір бөлігі екінші тоқсанда-ақ танылды. Бұл алдағы тоқсандарда көрсеткіштердің бірізді өсуін шектеуі мүмкін. Freedom Broker болжамы бойынша, 2027 қаржы жылының қорытындысында Argan түсімі $1,35 млрд болады, ал бір акцияға шаққандағы пайда – $12,94.

Газ электр станциялары нәтижелерді қолдады

Энергетика бағытының түсімі 52,9%-ға артты және $301,2 млн-ға жетті. Өсім күн электр станциялары құрылысының аяқталуына жақындап, олардың үлесін біртіндеп алмастырып жатқан газ генерациясының төрт ірі жобасы бойынша жұмыстар көлемінің ұлғаюы есебінен қамтамасыз етілді.

Бағыттың жалпы маржасы 22,4% болды, бұл өткен жылғы 19,6%-ға және алдыңғы тоқсандағы 23,6%-ға қарсы. Көрсеткіштің тоқсаннан тоқсанға төмендеуі күтілімдерге сай: қазіргі ірі жобалар әзірге құрылыстың бастапқы кезеңдерінде. Келесі кезеңдерге өткен сайын жұмыстар көлемі мен түсім артуы тиіс.

Argan-ның әрі қарайғы динамикасы қолданыстағы келісімшарттарды орындауға ғана емес, жаңа тапсырыстарды алуға да байланысты болады. Компания басшылығы алдағы 7–15 ай ішінде, негізінен газ генерациясы саласында, бірнеше жобаның берілуін күтеді. Бұған дейін 10–18 ай диапазоны аталған еді.

Тапсырыстар портфелі ағымдағы жобалар орындалуына қарай біртіндеп қысқарып келеді. Жартыжылдықта Argan $675 млн түсімді таныды, сонымен бірге портфельдің $260 млн-нан астам қысқаруын қолданыстағы келісімшарттар бойынша жұмыстарды кеңейту және шағын жаңа тапсырыстар есебінен ішінара өтеуге қол жеткізді.

Өнеркәсіптік бағытқа қысым уақытша болады

Өнеркәсіптік бағыттың түсімі жылдық мәнде 111,2%-ға өсіп, рекордтық $76,2 млн-ға жетті. Алайда оның жалпы маржасы 12,5%-дан 7,3%-ға төмендеді. Талдаушылардың пікірінше, көрсеткіштің нашарлауы деректерді өңдеу орталықтары нарығынан тыс бірнеше жобамен байланысты. Күтілетін шығындар қайта қаралғаннан кейін олардың экономикалық тиімділігі бастапқы бағалаудан төмен болды. Бұл жұмыстарды алты ай ішінде аяқтау жоспарланып отыр, сондықтан маржалыққа қысым тағы бір-екі тоқсан сақталуы мүмкін.

Freedom Broker талдаушылары бұл фактордың Argan-ның жалпы көрсеткіштеріне әсері шектеулі болады деп күтеді. Өнеркәсіптік бағытқа қосымша қолдауды деректерді өңдеу орталықтарын салқындатуға арналған жылулық энергияны жинақтау жүйелері мен сыйымдылықтарды жеткізу жөніндегі $125 млн келісімшарт беруі мүмкін. Мұндай жүйелер есептеу жабдығынан жылуды әкетуге және үй-жайларда қажетті температураны ұстап тұруға көмектеседі. Кейіннен жоба тоқсан сайын $10 млн-нан астам қосымша түсім әкелуі мүмкін.

Телекоммуникациялық бағыттың кірісі 39,5%-ға өсіп, $6,6 млн-ға жетті. Әзірге ол шоғырландырылған түсімнің шамамен 2%-ын ғана құрайды, алайда органикалық өсім және жуырдағы жаңа активті сатып алу уақыт өте келе оның кірісін 2026 қаржы жылы деңгейімен салыстырғанда екі еселеуі мүмкін.

Электр энергиясына сұраныс өсу факторы болып қала береді

Маусым айында Freedom Broker Argan акцияларының мақсатты бағасын $700-ге дейін көтерген, бірақ «Ұстау» ұсынымын сақтаған болатын. Ол кезде талдаушылар қаржылық болжамдардың жақсарғанын, компанияның жүктемесінің жоғары екенін және деректерді өңдеу орталықтарының жаңа электр энергиясы көздеріне деген қажеттілігінің өсіп жатқанын атап өткен.

Салалық үрдістің бір дәлелі – құны шамамен $7 млрд болатын Батыс Техастағы газ электр станциясы жобасы. Оның қуаты 5 мың мегаватқа дейін жетуі мүмкін, ал өндірілетін электр энергиясы деректерді өңдеу орталықтарының ірі кешенін қамтамасыз етуге бағытталады.

Жеке инвестициялық ұсыным болып табылмайды.