Отынды хеджирлеу қымбат мұнай жағдайында Ryanair акцияларын қолдайды – Freedom Broker

Ryanair (RYAAY) мұнай қымбат күйінде қалса, 2027 жылы әуе билеттері бағасы айтарлықтай өсуі мүмкін екенін ескертті. Ағымдағы тоқсанда тасымалдаушы тарифтері сәл төмендейді, алайда қысқы кезеңге болжам белгісіз күйінде қалып отыр.

Freedom Broker талдаушысы Владимир Черновтың пікірінше, отынның басым бөлігінің құнын баррельіне $67 деңгейінде бекіту Ryanair-ге қорғанысы әлсіз бәсекелестеріне қарағанда артықшылық беріп, бизнестің рентабельділігін қолдайды. Сонымен бірге, кейін билеттер құнының өсуі саяхатқа сұранысты төмендетіп, тасымал көлемін шектеуі мүмкін.

Ryanair немен айналысады

Ryanair (RYAAY) – ирландиялық лоукостер әуе компаниясы және жолаушылар саны бойынша Еуропадағы ең ірі әуе тасымалдаушы. Компания негізінен еуропалық қалалар арасында қысқа және орта қашықтықтағы рейстерді орындайды, билеттердің төмен базалық құнын ұсынып, қосымша қызметтер үшін бөлек ақы алады.

Ryanair-дің американдық депозитарлық қолхаттары Nasdaq биржасында RYAAY тикерімен айналыста. Компания акциялары еуропалық сауда алаңдарында да ұсынылған.

Әуе отыны 90%-ға қымбаттады

4 қыркүйекте аяқталған аптаның қорытындысы бойынша авиациялық отынның құны баррельіне $171-ге жетті. Бұл өткен жылдың осы кезеңіндегі орташа көрсеткіштен 90%-ға жоғары.

10 қыркүйекте Brent мұнайы баррельіне $105-ке дейін, ал америкалық WTI – $100-ге дейін көтерілді. Бағаның өсуі Таяу Шығыстағы қақтығыстардың ушығуымен және өңірден энергия ресурстарын жеткізудің шектелуімен байланысты.

Отын әуе компаниялары шығындарының негізгі баптарының бірі. Егер оның құны ұзақ уақыт бойы жоғары болып қалса, тасымалдаушылар билеттер бағасын көтеруге, рейстер санын қысқартуға немесе пайданың төмендеуін қабылдауға мәжбүр болады.

Ryanair отын бағасын $67 деңгейінде бекітті

Ryanair қажет отынның 80%-ының құнын 2027 жылғы наурызға дейін баррельіне шамамен $67 деңгейінде алдын ала бекітті. Мұндай механизм хеджирлеу деп аталады: компания алдын ала белгіленген бағамен отын сатып алуға мүмкіндік беретін келісімшарттар жасайды және нарықтағы құбылмалылыққа тәуелділікті азайтады.

Осының арқасында Ryanair-дің отынның басым бөлігі бойынша нақты шығындары қазіргі нарықтық бағалардан едәуір төмен болады. Владимир Чернов мұндай қорғаныс компанияның табыстылығын қолдап, қорғанысы әлсіз еуропалық тасымалдаушыларға қарағанда өзін анағұрлым орнықты сезінуге мүмкіндік береді деп санайды.

Алайда келесі қаржы жылы үшін Ryanair отын қажеттілігінің небәрі 15%-ын баррельіне $85 бағамен бекітті. Егер мұнай қымбат күйінде қалса, компания шығындары нарықтық котировкаларға көбірек тәуелді бола бастайды.

Тарифтердің өсуі сұранысты төмендетуі мүмкін

Билеттер құнының өсуі қосымша шығындардың бір бөлігін жолаушыларға аударуға мүмкіндік береді. Алайда әуе компанияларының мүмкіндіктері шектеулі: бағаның тым жылдам өсуі саяхатқа сұраныстың қысқаруына әкелуі мүмкін.

Қысқа мерзімді перспективада Ryanair котировкаларына шілде–қыркүйектегі тарифтердің төмендеуі және алдағы екі тоқсанға айқын болжамның болмауы қысым түсіруі ықтимал. Басшылық қыста билеттер бағасы бұрынғы деңгейде қалуы немесе сәл өсуі мүмкін екенін жоққа шығармайды.

Владимир Черновтың бағалауынша, Ryanair акциялары жоғары құбылмалылықты сақтауы мүмкін. Сонымен қатар ұзақ мерзімді тұрақтылық компанияда отын құнының өсуінен өзін аз қорғай алған тасымалдаушыларға қарағанда жақсырақ көрінеді.

Мұнайдың жоғары бағасы қаржылық тұрғыдан әлсіз әуе компанияларының нарықтан кетуін жеделдетуі мүмкін. Мұндай жағдайда отын құны тұрақтанғаннан кейін Ryanair нарықтағы үлесін арттыру мүмкіндігіне ие болады, бірақ жақын перспективада бәсекенің азаюы сұраныстың төмендеу қаупін жоймайды.

Бұған дейін Freedom Broker қымбат авиаотынның Delta Air Lines нәтижелеріне қысым түсіретіні туралы жазған. Шығындар мен борыштық жүктеме мәселелері әлсіз тасымалдаушылардың нарықтан кетуіне бұрыннан әкеліп келген: алдыңғы жарияланымдардың бірінде Spirit Airlines-тің банкроттығы туралы хабарланған.

Жеке инвестициялық ұсыныс болып табылмайды.