Freedom: Calavo-мен синергия Mission Produce акцияларының бағасын арттырады

Freedom Broker талдаушылары Mission Produce (AVO) акциялары бойынша «Сатып алу» ұсынымын және $16 мақсатты бағасын растайды. Қазіргі бағасы $13,2 болғанда, өсім әлеуеті 21,21% құрайды. Позитивті көзқарас Calavo-ны сатып алғаннан кейін бизнестің кеңеюіне, синергия әсерінің күтілуіне және төртінші тоқсанда қаржылық нәтижелердің жақсару перспективаларына негізделген.

Calavo интеграциясы ұзақмерзімді перспективаларды қолдайды

Mission Produce — авокадо жеткізушілерінің әлемдегі ең ірілерінің бірі. Компания өнімді өсіреді, сатып алады, қаптайды және таратады, ал мамырда агроөнеркәсіптік Calavo компаниясын сатып алғаннан кейін гуакомоле мен соустарды қоса алғанда, дайын өнімдер бағытын да дамытып келеді.

Тоқсанның ең маңызды нәтижесі ретінде Freedom Broker талдаушылары Calavo интеграциясынан күтілетін жылдық синергия әсерінің $30 млн-нан жоғары деңгейге дейін ұлғаюын атайды. Бұған дейін басшылық мәміле жабылғаннан кейін 18 ай ішінде кемінде $25 млн алуды көздеген.

Жаңа бағалау коммерциялық, жалпы және әкімшілік шығындар бойынша үнемнің жоғары болуын, сондай-ақ біріктірілген операциялық желіні оңтайландыру мүмкіндіктерін көрсетеді. Басшылық кеңейтілген платформа 2027–2030 жылдары Mission Produce компаниясына нарықтағы үлесін едәуір арттыруға мүмкіндік береді деп күтеді.

Freedom Broker талдаушыларының пікірінше, тік интеграцияланған бизнес-модель, жеткізілім географиясының әртараптандырылуы және мәміледен кейін ауқымның ұлғаюы жеткізілімнің сенімділігін арттырады, клиенттік базаны кеңейтеді және компанияның операциялық икемділігін күшейтеді.

Сонымен қатар нәтижелер Calavo интеграциясының сәттілігіне, Mission Produce компаниясының көлем өсімін маржа мен ақша ағындарының ұлғаюына айналдыру қабілетіне, сондай-ақ қарыз жүктемесінің төмендеу қарқынына байланысты болады.

Түсім талдаушылар болжамынан жоғары болды

2026 қаржы жылының үшінші тоқсанында Mission Produce түсімі жылдан жылға 25,8%-ға өсіп, $357,7 млн-нан $450,0 млн-ға жетті. Нәтиже $386 млн болған Freedom Broker болжамынан шамамен 16,6%-ға жоғары болды.

Өсімнің негізгі факторы — Calavo нәтижелерінің қосылуы және Мексикадан жеткізілімдердің кеңеюі есебінен авокадо сату көлемінің 38%-ға артуы. Mission Produce шамамен 253 млн фунт авокадо өткізді. Бұл ретте өндіріс пен нарықтағы ұсыныстың ұлғаюына байланысты орташа сату бағасы жылдан жылға 9%-ға төмендеді.

Marketing & Distribution сегментінің түсімі 20,4%-ға өсіп, $344,1 млн-нан $414,3 млн-ға дейін артты. Prepared Foods жаңа сегментінің Calavo сатып алуы 28 мамырда аяқталғаннан кейінгі кезеңдегі сатылымы $15,5 млн болды және әзірге толық тоқсанның нәтижелерін қамтымайды.

Сыртқы клиенттерге сатылым $9,1 млн-нан $14,8 млн-ға дейін ұлғайды. Алайда аффилирленген компаниялармен операцияларды есепке алғандағы сегменттің жалпы түсімі авокадоның орташа бағаларының төмендеуіне байланысты $49,0 млн-нан $45,8 млн-ға дейін азайды. Көкжидектен түскен түсім $4,5 млн-нан $5,4 млн-ға дейін өсті. Көрсеткіш бұрын төленген кедендік баждардың қайтарылуы есебінен қолдау тапты.

Мәміле шығындары таза шығынға алып келді

Түсімнің өсуі әзірге кірістіліктің салыстырмалы жақсаруына алып келген жоқ. Жалпы пайда $44,7 млн құрады, бұл өткен жылдағы $45,1 млн-мен салыстырғанда төмен, ал жалпы маржа 270 базистік тармаққа қысқарып, 9,9%-ға түсті.

Авокадоның орташа бағасының төмендеуі International Farming сегментіне қысым көрсетті, ал Calavo сатып алынуы Marketing & Distribution нәтижелерін қолдады. Операциялық пайда $21,0 млн-нан $0,5 млн-ға дейін қысқарды. Есепке мәміле бойынша $12,6 млн көлеміндегі консультациялық және интеграциялық шығындар, сондай-ақ сатып алуды есепке алуға байланысты шығындар енгізілді.Скорректирленген EBITDA $32,4 млн болды (өткен жылы $32,6 млн). Marketing & Distribution сегментінде көрсеткіш $20,0 млн-нан $24,7 млн-ға дейін өсті, ал International Farming сегментінде $12,1 млн-нан $7,6 млн-ға дейін төмендеді.

Скорректирленген таза пайда $18,2 млн-нан, немесе бір сұйылтылған акцияға $0,26-дан, $15,0 млн-ға, немесе бір акцияға $0,18-ге дейін азайды. Mission Produce-ке тиесілі таза шығын $6,5 млн-ды, немесе бір сұйылтылған акцияға $0,08-ді құрады, бұл өткен жылдағы $14,7 млн пайдаға, немесе бір акцияға $0,21-ге қарсы. Нәтиже Calavo сатып алуына байланысты салыққа дейінгі $25,4 млн шығындарды қамтиды.

Компания төртінші тоқсанда EBITDA өсімін күтеді

Басшылық 2026 қаржы жылының екінші жартыжылдығы бойынша скорректирленген EBITDA болжамын $84–88 млн деңгейінде растады. Үшінші тоқсандағы $32,4 млн нәтижесінен кейін компания төртінші тоқсанда шамамен $52–55 млн алуды күтеді.

Көрсеткішке Calavo-ның толық тоқсандағы үлесі, Перу егінін өткізудің неғұрлым кеш мерзімдері, көкжидек сатылымының ұлғаюы және авокадо маржасының қалпына келуі қолдау көрсетуі тиіс. Перудағы плантациялардан экспортқа жарамды өнім көлемі алдыңғы маусымдағы 105 млн фунтқа қарсы 120–130 млн фунт деңгейінде күтіледі.

Төртінші тоқсанда сала бойынша авокадо жеткізілімдері жылдан жылға шамамен 10%-ға өсуі мүмкін, ал орташа баға басшылық болжамына сәйкес, өткен жылдағы бір фунт үшін $1,39 деңгейінен шамамен 10%-ға төмендейді.

Calavo сатып алынғаннан кейін қарыз өсті

Тоқсан соңында Mission Produce-тің ақша қаражаты және олардың баламалары $47,1 млн құрады, бұл 2025 қаржы жылының соңындағы $64,8 млн-мен салыстырғанда төмен. Ұзақ мерзімді қарыз (ағымдағы бөлігін қоса алғанда) негізінен Calavo сатып алуын қарыз арқылы қаржыландыру есебінен шамамен $400,3 млн-ға дейін өсті.

2026 қаржы жылының алғашқы тоғыз айында операциялық қызметтен ақша қаражатының кетуі $25,9 млн-ға жетті, бұл өткен жылдағы $21,4 млн келіп түсуімен салыстырғанда кері динамика. Өзгеріске пайданың төмендеуі, мәміле мен интеграцияға жұмсалған $26,0 млн шығындар және айналым капиталына маусымдық қажеттіліктің артуы әсер етті.

Капиталдық шығындар $39,8 млн-нан $32,0 млн-ға дейін қысқарды. Жыл қорытындысы бойынша компания көрсеткішті шамамен $45 млн деңгейінде күтеді. $100 млн көлеміндегі кері сатып алу бағдарламасы аясында Mission Produce үшінші тоқсанда өз акцияларын $7,2 млн-ға және тоғыз айда $9,4 млн-ға сатып алды.

Freedom Broker «Сатып алу» ұсынымын сақтап қалды

Маусымда Freedom Broker сарапшылары да Mission Produce акцияларын сатып алуды ұсынған, алайда ол кезде мақсатты баға $15 болатын. Талдаушылар нәтижелердің әлсіз екінші тоқсаннан кейін екінші жартыжылдықта қалпына келуін күткен: онда түсім 24%-ға қысқарып, $290,9 млн-ға дейін, ал скорректирленген EBITDA $19,1 млн-нан $7,1 млн-ға дейін төмендеген еді. Жаңа есеп шыққаннан кейін мақсатты баға $16-ға көтерілді.

Жеке инвестициялық ұсыным болып табылмайды.