Инвестициялық шолу №341. Айқын да таңғаларлық

DFM General Index, динамикасы, 1 жыл

 

Abu Dhabi Securities Exchange index, 1 жыл

 

Кірістілігі, форвардтық мөлшерлеме 1м10л, БАӘ, 1 жыл

 

 

Brent маркалы мұнай, 1 жыл

 

9–23 наурыз аралығында Dubai Financial Market (DFM) индексі 6,4%-ға төмендеп, 5383 пунктке дейін құлдырады, ал Abu Dhabi Securities Exchange (ADI) 4,5%-ға төмендеп, 9423 пунктке түсті. Бұл аймақтағы қарулы қақтығысқа, әсіресе Ормуз бұғазының жабылуына байланысты болды. Салыстырмалы түрде, осы кезеңде S&P 500 индексі 3,2%-ға ғана түзетілді, яғни жергілікті активтерге қысым жоғары болып қалып отыр.

Brent маркалы мұнай бағасы 6,1%-ға өсіп, барреліне $100-ге жетті, жекелеген сауда сессияларында айқын құбылмалылық көрсетіп. Мәселен, 9 наурызда Солтүстік теңіз мұнайы барреліне $119,50 деңгейіне дейін көтеріліп, 2022 жылдан бергі ең жоғары көрсеткішке жетті, алайда кейінгі күндері Тегеран мен Вашингтон арасындағы келіссөздердің шектеулі ілгерілеуіне байланысты баға түзетілді.

Циклдік секторлар төмендеу бойынша көш бастады. Ең үлкен құлдырауды жылжымайтын мүлік секторы көрсетті ( 13,44%). Aldar Properties, Emaar Properties, Emaar Development және RAK Properties акциялары тиісінше 15,1%, 14,29%, 13,56% және 20,96%-ға төмендеді. 2026 жылғы наурыздың алғашқы жартысында БАӘ-дегі аяқталған жылжымайтын мүлік мәмілелерінің жалпы құны айына шаққанда 51%-ға және жылына шаққанда 31%-ға азайды, бұл нарықтағы белгісіздіктің сақталуымен байланысты.

Энергетика секторы күрделі операциялық жағдайға қарамастан небары 0,64%-ға ғана түзетілді. Инвесторлар логистикалық қиындықтарға қарамастан, әлемдік көмірсутек бағасының өсуінен пайда көретін негізгі бенефициарлар ретінде БАӘ энергетикалық компанияларын қарастырады. Ормуз бұғазының жабылуына байланысты туындаған қиындықтар туралы жаңалықтарға қарамастан ADNOC Gas компаниясының (-0,31%) тұрақтылығы инвесторлардың компанияның дағдарыс жағдайларын басқару қабілетіне деген сенімін күшейтеді. Менеджмент Хабшан кешенін қоса алғанда, негізгі өндірістік қуаттардың жұмыс істеп тұрғанын және клиенттерге жеткізілімдердің әр мәміле бойынша жеке келісім тәртібімен жүзеге асырылып жатқанын растады.

БАӘ-нің прокси-казначейлік облигацияларының кірістілігі 4,81%-дан 4,89%-ға дейін көтерілді, ал АҚШ қазынашылық облигацияларының кірістілігі 4,23%-дан 4,48%-ға дейін өсті. Олардың арасындағы спрэд 58 б.п.-тан 42 б.п.-қа дейін тарылды. Бұл бір жағынан мұнай бағасының күрт қымбаттауынан туындаған инфляциялық күтулердің өсуін, екінші жағынан — капиталдың неғұрлым сапалы әрі өтімді жаһандық активтерге ауысуын көрсетеді.

Экономика жаңалықтары  

• Әскери операция басталғанға дейін АҚШ пен Израильдің Иранға қарсы әрекеттеріне дейін Ормуз бұғазы арқылы әлемдік мұнайдың шамамен 19%-ы тасымалданатын, бұл ақпанда тәулігіне 105,14 млн баррельді (б/с) құрады. Бұғазды айналып өтетін бағыттарға 5,5 млн т/б көлеміндегі жеткізілімдерді қайта бағыттау мүмкіндігін ескере отырып, таза ұсыныс тапшылығы 12–14 млн т/б деңгейінде бағаланады, бұл жаһандық тұтынудың 11–13%-ына тең. Әмірліктер осы дәліз арқылы тәулігіне 3,2 млн т/б экспорттаған және Habshan–Fujairah (ADCOP) құбыры арқылы 1,5 млн б/с-қа дейін қайта бағыттай алады. Біздің бағалауымызша, Ормуз бұғазын сәуір айының ортасына дейін ашу ықтималдығы — 60%, мамыр айының ортасына дейін — 84%, одан кейінгі бір айда — 94%. Дегенмен Polymarket деректері бойынша, 18 наурызда транзиттің 30 сәуірге дейін қалыпқа келу ықтималдығы 25% болып бағаланды, яғни бір апта бұрынғы 55%-дан айтарлықтай төмендеген.
• БАӘ Орталық банкі (CBUAE) 17 наурызда қаржылық тұрақтылықты қолдау шаралары пакетін (Financial Institution Resilience Package) бекітті. Бұл бастама көлемі $272 млрд-тан асатын алтын валюта резервтерімен қамтамасыз етіліп, өңірлік қақтығыс жағдайында банк жүйесінің үздіксіз жұмысын қамтамасыз етуге бағытталған. Қабылданған стратегия аясында банктердің өтімділікке қолжетімділігі кеңейтілді, өтімділік бойынша реттеуші талаптар жеңілдетілді, капиталдық буферлер босатылды, проблемалық несиелерді жіктеу талаптары жұмсартылды. БАӘ Орталық банкіндегі банктердің пайдалануына қолжетімді өтімділіктің жалпы көлемі $250 млрд деп бағаланады, бұл жүйеге берік қор жасайды.

Компания жаңалықтары 

• Multiply Group, 2PointZero және Ghitha Holding шамамен $32,6 млрд көлеміндегі активтері бар инвестициялық құрылым құруға алып келетін бірігуді жариялады. Слияние мақсаты — AI стратегияларды қолдану есебінен синергетикалық әсерге қол жеткізу, сондай ақ географиялық ауқымды кеңейту (85-тен астам елде қызмет). Нарық бұл жаңалықты оң қабылдады: хабар шыққаннан бері Multiply Group акциялары 10,8%-ға өсіп, өнеркәсіп сегментіндегі өсім көшбасшысына айналды. Біріккен компанияның басшылығы аймақтағы тұрақсыздыққа қарамастан, 2026 жылдың өзінде таза пайданы 35%-ға арттыруды болжап отыр.
  •    Amlak Finance (DFM: AMLAK) БАӘ дегі ең ірі исламдық ипотекалық провайдер, компания тарихындағы бетбұрысты кезең болған 2025 жылдың толық қаржылық нәтижелерін жариялады. Банктің таза пайдасы 117 есеге өсіп, жиынтық табыс шамамен $63 млн нан $850 млн ға дейін ұлғайды. Бұл өсімнің негізгі драйвері 2025 жылдың шілдесінде аяқталған, жалпы құны $790 млн болатын Дубайдағы Рас эль Хор ауданындағы жер банкінің сатылуы болды,  ол $583 млн мөлшерінде пайда әкелді. Бұл эмитентке жинақталған шығындарын толық жабуға және есепті кезең соңында бөлінбеген пайданы тіркеуге мүмкіндік берді. Осы жағдайға байланысты Amlak акциялары 26,43%-ға қымбаттап, индустриядағы өсімнің абсолютті көшбасшысы атанды.
  •     10–13 наурыз аралығында Mubadala егемендік қоры өзінің еншілес компаниясы Mamoura Diversified Global Holding арқылы Aldar Properties (ADX: ALDAR) компаниясындағы үлесін 25,12%-дан 26,26%-ға дейін ұлғайтты. Бұған $2,72 млрд құнындағы бөлшек сауда платформасын құру бойынша (Yas Mall және The Galleria Luxury Collection) Mubadala мен бірлескен кәсіпорынды жабу, сондай ақ Аль Марья аралындағы $16,3 млрд көлеміндегі қаржы ауданының кеңейтілуіне арналған серіктестікті жариялау алғышарт болды. 2025 жылдың қорытындысы бойынша Aldar кірісті 47%-ға және таза пайданы 36%-ға арттырғанын көрсетті, ал кіріс бойынша бэклог рекордтық $19,5 млрд қа жетті.
  •    Air Arabia (ADX: AIRA) Ливан, Иордания және Иракты қоса алғандағы бірқатар өңірлік бағыттар бойынша рейстердің тоқтатылуын ұзартты. Салалық талдау деректері бойынша, компанияның операциялық қуаты дағдарысқа дейінгі деңгеймен салыстырғанда 64%-ға төмендеді, бұл қарастырылған кезеңде оның акцияларының 7,92%-ға арзандауына әкелді. Дегенмен Emirates және Flydubai сынды флагмандық тасымалдаушылар қауіпсіздік мақсатында арнайы қауіпсіздік дәліздерін және жойғыштардың сүйемелдеуін пайдаланып, рейстердің едәуір бөлігін орындауды жалғастыруда. 23 наурыздағы жағдай бойынша Emirates өткізу қабілетін дағдарысқа дейінгі деңгейдің 75%-ына дейін қалпына келтірді, бұл жаңа жағдайларға біртіндеп бейімделіп жатқанын көрсетеді.
  •    ADNOC және OMV AG 19 наурызда Borouge Plc (ADX: BORU), еуропалық Borealis AG және канадалық Nova Chemicals компанияларының бірігуі аясында Borouge Group International AG құрылуын қалыптастырудың маңызды кезеңінің аяқталғанын жариялады. Тараптар Borouge 4 (B4) өндірістік кешені бойынша келісімге қол қойды, бұл жаңа бірлестікке өз өндірген өнімін өткізуге мүмкіндік береді. Конгломерат толық қуатқа шыққаннан кейін үш жыл ішінде қосымша таза пайданы $400 млн деңгейінде, жылдық орташа өсімді шамамен 10% көлемінде болжайды. Наурыз айының соңында мәміле аяқталғаннан кейін біріктірілген кәсіпорынның жалпы өндірістік қуаты 13,6 млн тоннаға жетеді, нәтижесінде ол әлемдегі полиолефин өндірушілердің топ 4 қатарына кіреді.

Алдағы екі аптадағы күтулер

Әмірліктердің қор нарықтарындағы ахуалдың динамикасын айқындайтын негізгі фактор – Иранға қарсы жүргізіліп жатқан әскери операция. АҚШ пен Иран арасындағы ықтимал келіссөздер жөніндегі мәлімдемелер қарастырылып отырған кезеңнің соңында котировкалардың ішінара қалпына келуіне алып келді (DFM соңғы сауда күнінде 0,8% өсті).

Базалық болжамға сәйкес, жағдайдың сәуір–мамыр айларында 60–84% ықтималдықпен тұрақтануы және мұнай бағасының мамыр–маусымда барреліне $60 деңгейіне оралуы күтіледі. Ормуз бұғазының ұзақ уақыт бойы жабылуы котировкалардың барреліне $200-ден жоғары күрт өсу қаупін тудырады.

Қалыптасқан белгісіздік жағдайында БАӘ акциялар нарығындағы құбылмалылық жоғары болып қала береді. Қорғаныс активтері санатына жататын телекоммуникация компаниялары, бірінші қажеттіліктегі тұтыну тауарларын өндірушілер және әртараптандырылған қаржы холдингтерінің бір бөлігі салыстырмалы тұрақтылық көрсетуді жалғастырады. Девелоперлердің, әуе тасымалдаушыларының және логистикалық инфрақұрылым компанияларының акциялары геосаяси жағдайдың өзгеруіне барынша сезімтал болып қалады. Капитал жеткіліктілігі коэффициенті реттеуші минимумнан едәуір жоғары тұрған БАӘ банктік секторының мықты капиталдық базасы аймақтағы ұзаққа созылған тұрақсыздық жағдайында да қаржылық тұрақтылықты сақтауға мүмкіндік береді.