Инвестициялық шолу №353. Жаңа бағдарларды іздеу

Жаһандық көрініс

Қарастырылып отырған кезеңдегі индекстер мен секторлардың кірістілігі.
Дереккөз: FactSet, Freedom Broker талдауы

25 тамыз бен 8 қыркүйек аралығында АҚШ қор нарығы оң аумақта аяқталғанымен, өсім негізінен ірі технологиялық компаниялардың акцияларында шоғырланды. S&P 500 индексі 0,86%-ға көтерілсе, тең салмақталған бенчмарк 1,32%-ға төмендеді. Бұл нарықтағы раллидің кеңеюі уақытша баяулағанын көрсетеді. Кең нарық индексіндегі ең ірі 15 компанияның 66,7%-ы оң кірістілік көрсетсе, жалпы бенчмарк бойынша бұл үлес 33,7%-ды ғана құрады. Сонымен қатар, қарастырылып отырған кезеңде Nasdaq-100 индексі 1,8%-ға өсті.

Геосаяси және макроэкономикалық белгісіздік жағдайында шағын және орта капитализациялы компаниялардың акцияларына сұраныс артты. Сауда қорытындысы бойынша шағын компаниялардың 54,7%-ы, ал орта компаниялардың 46,3%-ы өсім көрсетті. Бұл сегментке деген салыстырмалы қызығушылық инвесторлардың неғұрлым тұрақты ақша ағындарын іздеуімен және активтер бағасының АҚШ Федералдық резерв жүйесінің монетарлық саясатын қайта қарауына тәуелділігінің төмен болуымен түсіндіріледі.

Қарастырылып отырған кезеңде оң кірістілік көрсеткен компаниялардың индекстер бойынша үлесі.
Дереккөз: FactSet, Freedom Broker талдауы

Өсім көшбасшысы ІТ секторы болды (+4,02%), оған негізінен жартылай өткізгіштер индустриясы қолдау көрсетті. Кезеңдегі негізгі оқиғалар жасанды интеллект үдеткіштеріне сұраныстың жоғары деңгейде сақталып отырғанын растаған NVIDIA (NVDA), Broadcom (AVGO) және Marvell (MRVL) компанияларының есептері мен жаңартылған болжамдарының жариялануы болды. Broadcom компаниясы ЖИ-ден түсетін түсім бойынша болжамын жоғарылатты. Компания 2027 қаржы жылында бұл көрсеткіштің шамамен екі есе өсетінін және 2028 жылы да ұлғаюын жалғастыратынын күтеді. Бұл алдағы екі жылда компанияның жасанды интеллект бағытының нәтижелері оның дәстүрлі жартылай өткізгіштер бизнесінің көрсеткіштеріне қарағанда едәуір жылдам жақсаруы мүмкін екенін білдіреді.

Marvell компаниясы да дата-орталықтарға арналған шешімдер мен кастомды чиптерге гиперскейлерлер тарапынан сұраныстың жоғары болуы аясында болжамдарын жақсартты. Компания ағымдағы қаржы жылына арналған түсім болжамын алдыңғы бағалаумен салыстырғанда 3,8%-ға арттырды. Ал 2028 қаржы жылына арналған болжам бірден 1,5 млрд долларға өсіріліп, 18 млрд долларға жеткізілді. Бұл бұрынғы бағалаудан шамамен 9,1%-ға жоғары. Өсімнің негізгі драйвері дата-орталықтармен байланысты бизнес болып қалып отыр. Екінші тоқсанда бұл бөлімшенің түсімі жылдық есепте 46%-ға ұлғайды. Бұған негізінен Marvell компаниясының Amazon (AMZN) және Alphabet (GOOGL) сияқты ірі бұлтты қызмет көрсетушілер үшін әзірлейтін кастомды ЖИ-чиптерге сұраныстың артуы себеп болды.

Осы жағдайда NVIDIA есебі ең алдымен нарық фокусының өзгеруі тұрғысынан маңызды. Компания алғаш рет жылдық бағдар ұсынды және оны сұраныс бағасы ретінде емес, қолжетімді жеткізілім көлемінің шегі ретінде көрсетті. Бұл инвесторлар үшін негізгі сұрақты «ЖИ циклы жалғаса ма?» деген мәселеден «NVIDIA мәлімделген жеткізілім көлемін қамтамасыз ете ала ма?» деген мәселеге ауыстырады.

Сектордағы инвесторлық көңіл күйге әсер еткен қосымша фактор OpenAI ұсынған жаңа Astra моделінің таныстырылымы болды. Компания бұл модельді жасанды интеллект дамуының жаңа кезеңіне жасалған қадам ретінде сипаттап, оның мүмкіндіктерін түсіндіру үшін AGI (жалпы жасанды интеллект) терминін қолданды. AGI ұғымының анықтамасына қатысты пікірталастарға қарамастан, бұл таныстырылым озық модельдерді дамыту үшін есептеу қуаттарының барған сайын көбірек көлемі қажет деген нарықтық көзқарасты күшейтті. Бұл өз кезегінде NVIDIA және үдеткіштерді, желілік жабдықтарды, сондай-ақ кастомды жартылай өткізгіштерді өндірумен байланысты басқа да компаниялардың акцияларына сұранысты қосымша қолдады.

2026 және 2027 жылдардағы жартылай өткізгіштер индустриясындағы форвардтық PE мультипликаторы.
Дереккөз: Bloomberg, Freedom Broker талдауы

Жартылай өткізгіштер сегментінің бағалануы әлі де нарықтың жоғары күтулерін көрсетеді. 2026 жылға арналған форвардтық P/E коэффициенті 23,5x деңгейінде, ал соңғы үш жылдағы орташа көрсеткіш 22,4x болған. Бұл аталған кезеңдегі пайда тарихи деңгейлерге қарағанда сыйлықақымен бағаланып отырғанын білдіреді. Сонымен қатар, дәл осы мультипликатор бойынша 2027 жылға арналған бағалау 15,1x деңгейінде қалыптасқан, ал тарихи орташа мәні 19,8x болған. Бұл компаниялар күтіліп отырған пайда өсімін жүзеге асырған жағдайда, сектор бағалауының салыстырмалы түрде тартымды екенін көрсетеді.

Соңғы екі апта ішінде АҚШ Федералдық резерв жүйесінің (ФРЖ) 15-16 қыркүйектегі отырысының қорытындысы бойынша қабылдайтын шешіміне қатысты болжамдар жоғары құбылмалылық танытты. ФРЖ төрағасы Кевин Уорштың 28 тамызда Джексон-Хоул симпозиумындағы мәлімдемесі нарық тарапынан «қатаң» риторика ретінде қабылданды. Инвесторлар бұл сөздерді теріс бағалады. Спикер инфляцияның жеделдеу тәуекелдерінің сақталып отырғанына және баға өсімін 2% деңгейіндегі мақсатты көрсеткішке жеткізу қажеттігіне назар аударып, монетарлық саясаттың қатаюы мүмкін деген алаңдаушылықты күшейтті. Соған қарамастан, кейінірек ФРЖ Басқарушылар кеңесінің мүшесі Кристофер Уоллердің сөйлеген сөзі нарық қатысушыларының көңіл күйін жақсартты. Уоллер дезинфляция үдерісінің жалғасып жатқанын, энергия тасымалдаушылары бағасының қымбаттауы мен тарифтердің экономикаға әсері шектеулі екенін атап өтті. Сондай-ақ ол инфляцияда күтпеген күрт өсімдер болмаған жағдайда базалық мөлшерлемені өзгеріссіз қалдыруды қолдауға дайын екенін мәлімдеді.

2026 жылғы тамыз айына арналған еңбек нарығы туралы 4 қыркүйекте жарияланған деректер нарық тарапынан ФРЖ мөлшерлемені көтеруі мүмкін деген пікірді күшейтетін қосымша фактор ретінде қабылданды. Ауыл шаруашылығынан тыс секторлардағы жұмыспен қамтылғандар саны консенсус-болжамдағы 55 мыңға қарсы 162 мың адамға өсті. Жұмыссыздық деңгейі 4,14%-ды құрап, нарық күткен 4,1% көрсеткішіне жақын болды. Сонымен бірге, оң тосынсыйдың едәуір бөлігі техникалық сипатқа ие болды. Шамамен 84 мың жаңа жұмыс орны маусымдық түзетулердің ерекшеліктерімен түсіндіріледі. Бұл негізінен демалыс және ойын-сауық индустриясы, қонақжайлылық секторы, денсаулық сақтау және әлеуметтік көмек салаларында байқалды. Тағы шамамен 40 мың жұмыс орны бір ай бұрынғы қысқарудан кейін муниципалдық және өңірлік әкімшіліктердегі жұмыспен қамтудың қалпына келуі есебінен құрылды. Осылайша, АҚШ Еңбек министрлігінің тамыз айындағы есебі экономиканың негізгі үрдістерінің айтарлықтай жақсарғанын көрсеткен жоқ.

Қазіргі кезде инвестициялық қауымдастық ФРЖ-ның қыркүйек айында мөлшерлемені көтеру ықтималдығын шамамен 58% деп бағалап отыр. Бұл негізгі сценарий ретінде қарастырылғанымен, жалғыз ықтимал нұсқа емес. Ақша-кредит саясатының қатаюы тәуекелді активтердің жаппай сатылуына әкелуі мүмкін. Ал монетарлық жағдайлардың қазіргі деңгейде сақталуы акциялар нарығы үшін оң катализатор болмақ.

Нарық назары

Алдағы бірнеше аптада инвесторлардың назары геосаяси жағдайға да, аяқталуға жақындаған корпоративтік есептілік маусымына да аумақ. 16 қыркүйекте ФРЖ мөлшерлеме бойынша қабылдайтын шешім қор нарықтарындағы құбылмалылықтың күшеюіне себеп болуы мүмкін.

Қарастырылып отырған кезеңде WTI маркалы мұнай бағасы шамамен 7%-ға өсіп, барреліне 93 долларға жетті. Бұған Таяу Шығыстағы қақтығыстың ушығуы, логистикалық тізбектердің күрделенуі және энергетикалық инфрақұрылымға төнген қауіптің артуы әсер етті. Нарық қатысушылары Ормуз бұғазындағы танкерлерге және Сауд Арабиясындағы нысандарға жасалған шабуылдарға ерекше назар аударуда. Сонымен қатар, текетірес географиясы БАӘ, Бахрейн, Кувейт және Иордания аумақтарына дейін кеңейіп келеді.

WTI маркалы мұнай бағасы мен PDBC ETF динамикасы.
Дереккөз: FactSet, Freedom Broker талдауы

Осы жағдай аясында нарық қатысушыларының басым бөлігі энергия ресурстарының жоғары бағалары ұзақ уақыт сақталады деп күтуде. АҚШ билігі қақтығыстан шығудың жария жоспарын немесе шиеленісті төмендетудің нақты тетіктерін ұсынған жоқ. Бұл жақын болашақта әскери іс-қимылдардың жалғасу ықтималдығын арттырады. Мұндай жағдай жанармайдың, логистиканың және тыңайтқыштардың қымбаттауы арқылы инфляциялық қысымның мұнай нарығынан тыс салаларға да таралу қаупін күшейтеді. Баға қозғалысының неғұрлым ауқымды сипат алғанын энергия ресурстарын, өнеркәсіптік және бағалы металдарды, сондай-ақ астық ауыл шаруашылығы дақылдарын қамтитын әртараптандырылған шикізат тауарлары қоржынының динамикасын қадағалайтын PDBC ETF-тің оң көрсеткіштері де растайды. Бұл қор құнының өсуі инвесторлардың тек мұнай жеткізілімдерінің іркіліс қаупін ғана емес, сонымен қатар тауарлардың кең ауқымы бойынша бағаның қымбаттау ықтималдығын да ескеріп отырғанын көрсетеді.

Корпоративтік есептілік маусымы аяқталуға жақын: S&P 500 индексінің құрамына кіретін 493 компания тоқсандық нәтижелерін жариялап үлгерді. Алдағы апталарда инвестициялық қауымдастық үшін екі корпорацияның есептері ерекше қызығушылық тудырады.

17 қыркүйекте Carnival (CCL) 2026 қаржы жылының үшінші тоқсаны бойынша нәтижелерін жариялайды. Алдыңғы осындай кезең компания үшін өте табысты болды. Круиздік оператордың түсімі жылдық есепте 5%-ға өсіп, рекордтық 6,7 млрд долларға жетті. Ал түзетілген таза пайда 20%-дан астам ұлғайып, 569 млн долларды құрады. Валюта бағамдарының қысымы мен жанармай құнының 30%-ға дейін қымбаттауына қарамастан, түзетілген акцияға шаққандағы пайда (EPS) 15%-дан астам өсіп, 0,41 долларға жетті. Компания үшін негізгі оң драйверлер ретінде круиздерге жоғары сұраныс, брондау бағаларының рекордтық деңгейі және флоттың жоғары жүктемесі қалып отыр. Биылғы жылға брондалған рейстер көлемі 93%-ды құрайды, ал клиенттердің депозиттеріндегі қаражат көлемі рекордтық 9 млрд долларға жеткен. Есепті тоқсан бойынша басшылық шамамен 1,86 млрд доллар көлемінде түзетілген пайда және акцияға шаққандағы пайданы (EPS) шамамен 1,35 доллар деңгейінде болжайды. Инвесторлар брондау динамикасына, баға саясатының сақталуына, геосаяси факторлардың еуропалық бағыттарға әсеріне және жанармай шығындарына ерекше назар аударатын болады. CCL акциясы бойынша консенсустық мақсатты баға 34,7 долларды құрайды.

24 қыркүйекте Costco (COST) 2026 қаржы жылының төртінші тоқсаны бойынша есептілігін жариялайды. Алдыңғы үш айлық кезеңде ретейлердің таза сатылымы жылдық есепте 11,6%-ға өсіп, 69,2 млрд долларға жетті. Таза пайдасы 15,2%-ға артып, 2,19 млрд долларды құрады. Акцияға шаққандағы пайда (EPS) 15,2%-ға өсіп, 4,93 долларға жетті. Бұл сатып алушылар ағынының, сатылым көлемінің және мүшелік жарналардан түсетін табыстың артуын көрсетеді. Жанармай бағасы мен валюта бағамдарының әсерін есепке алмағанда, компанияның салыстырмалы сатылымдары 6,6%-ға ұлғайды. Клиенттер ағыны 2,4%-ға өссе, орташа чек 4,2%-ға артты. Сонымен қатар, онлайн сатылымдардың 21,5%-ға және мүшелік жарналардан түсетін кірістің 10,7%-ға өсуі қосымша қолдау көрсетті. Мүшелікті ұзартудың жаһандық коэффициенті 89,7%-ға жетті, ал ақылы мүшелер саны 4,1%-ға өсіп, 82,9 млн адамды құрады. Инвесторлар салыстырмалы сатылымдардың динамикасына, клиенттер ағынына, маржа көрсеткіштеріне, сондай-ақ қойма форматындағы сауда желісін кеңейту қарқынына назар аударады. COST акциясы бойынша консенсустық мақсатты баға 1086 долларды құрайды.

Кең нарық бойынша техникалық көрініс

S&P 500 индексі 7690 пункт деңгейінде консолидация кезеңіне өтті. Индекс 20 күндік жылжымалы орташа мәннен сәл төмен орналасқанымен, 7600 пункт маңынан өтетін 50 күндік жылжымалы орташа көрсеткіштен және өсуші тренд сызығынан жоғары саудалануда. RSI индикаторы «бұқалар» мен «аюлардың» күштері тең екенін көрсетеді. Сонымен қатар, нарықтың кеңдігі айтарлықтай нашарлады: S&P 500 құрамындағы акциялардың 50 күндік орташа мәннен жоғары орналасқан үлесі 47%-ға дейін қысқарды. Осыған байланысты индекстің алдағы динамикасы бойынша болжам бейтарап деңгейге өзгертіледі. Қазіргі уақытта бенчмарк тамыз айындағы максимумнан басталатын төмендеуші сызық пен өсуші тренд арасында тарылып келе жатқан диапазон қалыптастыруда. Негізгі қолдау аймағы 7580-7600 пункт аралығында орналасқан, мұнда 50 күндік жылжымалы орташа көрсеткіш пен көлденең қолдау деңгейлері түйіседі. Осы аймақтан төмен түсу түзетудің тереңдеу қаупін арттырады. Ал жоғары жақтағы ең жақын мақсатты деңгей ретінде шамамен 7820 пункт маңындағы тарихи максимумға қайта оралу қарастырылып отыр.

Күтілетін сауда ауқымы

S&P 500 индексінің 7580-7820 пункт аралығындағы қозғалысын негізгі бағдар ретінде қарастырамыз.