Инвестициялық шолу №347. Жаңалық ағынында

Apple

WWDC 2026 конференциясында Apple (AAPL) өзінің жасанды интеллект стратегиясының егжей-тегжейін таныстырды, дегенмен оны іске қосу мерзіміне қатысты нақты жауап берген жоқ. 1 қыркүйекте Тим Кук қызметінен кетіп, бас директор лауазымын Джон Тернуске тапсырады. Компанияның жаңа басшысы аппараттық инновациялар мен жасанды интеллект технологияларын дамытуға баса назар аударады деп күтілуде. Конференцияның басты оқиғасы Apple Foundation Models (AFM 3) және Apple Intelligence архитектурасы негізінде әзірленген, мүмкіндіктері кеңейтілген жаңа Siri AI көмекшісінің таныстырылымы болды.

Apple бұл технологияларды Alphabet (GOOGL) компаниясымен ынтымақтастықта әзірленген өз шешімдері ретінде ресми түрде ұсынды және олардың «қайта аталған Gemini емес» екенін атап өтті. Серіктестік экономикасы ресми түрде жарияланған жоқ.

Алайда БАҚ мәліметінше, Apple Google компаниясына жыл сайын шамамен $1 млрд төлейді. WWDC барысында Siri AI тек бета-нұсқада көрсетілді, ал компания оны жалпы пайдалануға беру мерзімдерін нақтылаған жоқ. Белгілі болғаны – Еуропалық одақ пен Қытай нарықтарына шығу реттеушілермен келіспеушіліктерге байланысты кейінге қалдырылған. Бұлттық қызметтерге қосылуды қажет ететін кеңейтілген жасанды интеллект функцияларын пайдалану белгілі бір лимиттермен шектеледі.

Лимиттерді ұлғайту үшін iCloud+ немесе Apple One жазылымы қажет болады. Оның үстіне барлық тарифтік жоспарлар мұндай артықшылықтарды ұсына бермейді. Жасанды интеллект өнімдерін дамыту жоспарларына қатысты нақты ақпараттың болмауына байланысты 9 маусымдағы сауда барысында AAPL акциялары 3,6%-ға төмендеді.

Apple Intelligence жүйесімен жұмыс істеуге дайын iPhone құрылғыларының орнатылған базасы, млн дана
Дереккөз: Counterpoint Research, Freedom Broker

Oracle

Oracle (ORCL) компаниясының бірінші тоқсандағы түсімі мен пайдасы нарықтың орташа болжамдарынан сенімді түрде асып түсті. Компанияның келісімшарттық міндеттемелер портфелі (RPO) айтарлықтай ұлғайып, $638 млрд көлеміндегі рекордтық деңгейге жетті. Oracle-дың бұлттық инфрақұрылым сегментіндегі түсімінің өсімі жылдық есеппен 93%-ға дейін жеделдеді. Соның арқасында дәстүрлі бағдарламалық қамтамасыз ету мен аппараттық жабдықтар сегменттеріндегі баяу динамика екінші кезекке ығысты. Компанияның инвестициялық тартымдылығы деректер орталықтарын салуға қажетті жабдықтар мен капитал құнының өсуі жағдайында келісімшарттар портфелінің нақты түсімге тиімді айналуымен байланысты. 2027 қаржы жылында менеджмент күрделі шығындарды (CAPEX) $90–95 млрд деңгейінде жоспарлап отыр, бұл алдыңғы бағалаулардан жоғары.

Мұндай шешім компоненттер құнының қымбаттауымен және жаңа клиенттік келісімшарттармен түсіндіріледі. Сонымен қатар Oracle жаһандық жасанды интеллект инфрақұрылымын құруға арналған қаржыландыру құнын төмендетудің жаңа тәсілдерін тапты. Атап айтқанда, клиенттің өз жабдығын пайдалану немесе алдын ала төлем жасау схемалары қолданылуда. Осының нәтижесінде компания 2027 қаржы жылында күрделі шығындардың шамамен $70 млрд-ын өз қаражаты есебінен қаржыландыруды жоспарлап отыр. Ал тағы шамамен $40 млрд капитал нарықтары арқылы тартылмақ. Бірінші тоқсан мен толық 2027 қаржы жылына арналған түсім және акцияға шаққандағы пайда (EPS) бойынша болжамдар нарықтың орташа күтулеріне сәйкес немесе сәл жоғары болды. Компания басшылығы ұзақмерзімді қаржылық мақсаттарын да растады. 11 маусымдағы сауда қорытындысы бойынша ORCL акциялары 8,5%-ға төмендеді. Бұл инвесторлардың алдағы жылдары күрделі шығындардың айтарлықтай ұлғаюына берген заңды реакциясы болды.

Oracle Corp. (ORCL) компаниясының негізгі қаржылық көрсеткіштері, $ млрд
Дереккөз: FactSet, Oracle, Freedom Broker

Broadcom

2026 жылдың бірінші тоқсаны Broadcom (AVGO) үшін кезекті рекордтық кезең болды. Компанияның түсімі, пайдасы және рентабельділік көрсеткіштері барлық негізгі деңгейлер бойынша нарықтың орташа болжамдарынан жоғары шықты. Бұл өсімнің негізгі драйвері жасанды интеллектке арналған тапсырыстық чиптер мен желілік шешімдер сегменті болып қала береді.

Компания басшылығы аталған өнімдерге сұраныстың өте жоғары екенін атап өтті және ірі бұлттық операторлар мен жетекші ЖИ-зертханалар қатарынан клиенттік базаның кеңейіп жатқанын мәлімдеді. Қазіргі таңда Broadcom-ның өндірістік қуаттары 2028 жылға дейінгі тапсырыстармен қамтамасыз етілген. Сонымен қатар менеджмент жасанды интеллект бағытына қатысты ұзақмерзімді мақсаттарын өзгеріссіз қалдырды. Компанияның болжамы ағымдағы тоқсанда түсім құрылымының өзгеруіне байланысты жалпы маржаның төмендеуін көздейді. Біздің пікірімізше, Broadcom басшылығы жария болжамдарға қатысты байыпты әрі теңгерімді ұстаным танытты. Күтілетін маржа төмендеуі бизнестің кірістілігінің құрылымдық нашарлауымен байланысты емес. Жасанды интеллектке қатысы жоқ жартылай өткізгіштер өндірісі циклінің қалпына келуі, сондай-ақ бағдарламалық қамтамасыз ету сегментіндегі қарқынды өсім компанияның нәтижелерін жақсартуға қосымша серпін беріп отыр. Деректерді өңдеу орталықтарындағы CPU ядролары санының артуы ядро бойынша лицензияланатын VMware өнімдеріне сұранысты күшейтіп, бағдарламалық қамтамасыз ету бағытының өсуіне ықпал етуде. Apollo (APO) мен Blackstone (BX) қатысатын XPV платформасы есептеу инфрақұрылымын қаржыландыруға мүмкіндік береді, бұл өз кезегінде Broadcom түсімінің қалыптасуына оң әсерін тигізуде. Біздің ойымызша, 4 маусымда есеп жарияланғаннан кейінгі күні Broadcom акцияларының 12,6%-ға төмендеуі негізсіз болды.

Broadcom, Inc. (AVGO) компаниясының негізгі көрсеткіштерінің динамикасы
Дереккөз: FactSet, Broadcom, Freedom Broker

CrowdStrike

CrowdStrike (CRWD) киберқауіпсіздік секторындағы жүйелік көшбасшы мәртебесін нығайтып келеді. Компанияның 2027 қаржы жылының бірінші тоқсанындағы түсімі жылдық есеппен 26%-ға өсіп, $1,39 млрд-қа жетті. Жылдық қайталанатын табыс (ARR) $256 млн-ға ұлғайып, $5,51 млрд болды. Ал non-GAAP әдістемесі бойынша операциялық рентабельділік 23,5%-ға дейін көтерілді.

Бұл көрсеткіштердің жоғары қарқынына тұрақты сұраныс пен Falcon платформасын белсенді монетизациялау ықпал етті. Өсімнің негізгі драйвері — клиенттердің киберқауіпсіздік бюджеттерін Falcon платформасы мен Falcon Flex моделі төңірегінде шоғырландыруы. Бұл мәмілелерді тезірек жабуға, кросс-сатылымдарды кеңейтуге және клиенттердің инфрақұрылымында қосымша модульдерді енгізу деңгейін арттыруға мүмкіндік беруде. Генеративті модельдер мен агенттік жасанды интеллект жүйелерінің кең таралуы жаңа киберқауіптердің пайда болуына алып келуде. CrowdStrike бұлттық деректерді, цифрлық сәйкестікті және жасанды интеллектке бейімделген орталарды қорғау саласында мықты позицияға ие. Компания Anthropic және OpenAI сияқты жетекші ЖИ-зертханаларымен бірлескен жобаларға да қатысуда. Компанияның түсім бойынша болжамын $5,915–5,959 млрд деңгейіне дейін көтеруі CrowdStrike-тың жылдың екінші жартысына тұрақты сұраныс, ауқымы кеңейіп келе жатқан платформа және ірі клиенттер сегментіндегі үлесін одан әрі арттыру әлеуетімен қадам басып отырғанын көрсетеді.

CRWD компаниясының қаржылық көрсеткіштері ($ млрд)
Дереккөз: компания мәліметтері

Palo Alto Networks

Palo Alto Networks (PANW) 2026 қаржы жылының үшінші тоқсанында күшті нәтижелер көрсетті. Компанияның түсімі жылдық есеппен 31%-ға өсіп, $3 млрд-қа жетті. Сонымен қатар ұсынылған шоттардың жалпы көлемі (billings) 61%-ға артып, $4,18 млрд болды, ал жаңа буын киберқауіпсіздік шешімдерінен түсетін жылдық қайталанатын табыс (NGS ARR) шамамен 60%-ға өсіп, $8,13 млрд-қа жетті. Бұл көрсеткіштер сұраныстың айтарлықтай күшейгенін және кірістерді платформалық модельге көшіру үдерісінің жалғасып жатқанын көрсетеді. Соның арқасында компания түсімдерінің болжамдылығы артып келеді. Алдағы тоқсандардағы өсімнің негізгі драйвері бизнес тарапынан жасанды интеллект инфрақұрылымына салынатын ауқымды инвестициялар болмақ.

Трафик көлемінің артуы, ЖИ-деректер орталықтарының салынуы және жоғары өнімді желілік қорғанысқа деген қажеттілік Palo Alto-ның аппараттық және бағдарламалық firewall-шешімдеріне рекордтық сұраныс қалыптастырды. CyberArk және Chronosphere компанияларын сатып алғаннан кейін өнімдік экожүйенің кеңеюі де қосымша өсу әлеуетін береді. Бұл мәмілелер компанияның цифрлық сәйкестікті қорғау (identity security), жүйелік бақылау мен мониторинг (observability) және ЖИ-агенттерді қорғау сегменттеріндегі позицияларын күшейтті. Сатып алынған активтерді тиімді біріктіру компанияға жалпы маржаға қысым сақталған жағдайда да жоғары операциялық тиімділікті ұстап тұруға мүмкіндік беруде. Palo Alto Networks киберқауіпсіздік саласындағы жасанды интеллект трендтерінің тікелей бенефициарларының бірі ретінде қарастырылады. Компания бір мезгілде қайталанатын табыс базасын ұлғайтып, платформалық қамтуды кеңейтіп және жаңа ЖИ-инфрақұрылымын қорғауға деген сұранысты тиімді монетизациялап отыр.

Соңғы 12 айдағы желіаралық экрандарға (Firewall) берілген тапсырыстар өсімі, ж/ж
Дереккөз: Palo Alto Networks IR презентациясы