АҚШ Федералдық резерв жүйесінің маусымдағы отырысының жарияланған хаттамалары пайыздық мөлшерлемені көтеру әлі де базалық сценарий емес екенін көрсетті. Инфляцияға қатысты алаңдаушылық күшейгеніне қарамастан, ФРЖ экономиканың баяулау және еңбек нарығындағы жағдайдың нашарлау тәуекелдерін ескеруді жалғастыруда.
Инфляция басты тәуекел болып қала береді
Отырысқа қатысушылар инфляцияны АҚШ экономикасы үшін ең елеулі тәуекел ретінде мойындады. Хаттамада бағаның өсуі мына факторлармен қолдау табатыны атап өтіледі:
- бұрын енгізілген тарифтердің түпкілікті бағаларға ауысуы;
- Таяу Шығыстағы қақтығыс аясында энергия тасымалдаушылар мен шикізаттың қымбаттауы;
- ЖИ дамуына байланысты жоғары инвестициялық сұраныс.
Сонымен қатар, ФРЖ инфляциялық қысымның бір бөлігі уақытша сипатқа ие екенін мойындайды. Сарапшылардың бір бөлігі компаниялар сұраныстың төмендеуі және нарықтағы үлесін жоғалту қаупіне байланысты бағаны одан әрі көтеруден қауіптенеді деп санайды. Бұдан бөлек, жасанды интеллектіні енгізу ұзақ мерзімді перспективада еңбек өнімділігін арттырып, экономикаға дезинфляциялық әсер етуі мүмкін.
Еңбек нарығы мөлшерлемені көтеруге қарсы
Инфляцияға қатысты риторика қатаңдағанына қарамастан, ФРЖ еңбек нарығына қатысты тәуекелдерді күн тәртібінен алып тастаған жоқ. Отырысқа қатысушылардың бір бөлігі жұмысқа қабылдау қарқынының бәсеңдеуін және ашық бос жұмыс орындарының санының азаюын атап өтті, бұл еңбек нарығының салқындауын көрсетуі мүмкін. Ал жалақының өсуі, реттеуші өкілдерінің пікірінше, әзірге инфляцияның 2% мақсатты деңгейімен үйлесімді болып отыр.
Freedom Broker талдаушыларының бағалауынша, дәл осы фактор алдағы айларда мөлшерлемені көтеруге қарсы негізгі дәлелдердің бірі болып қала береді.
ФРЖ-ның екі сценарийі
- Егер инфляция баяулауын жалғастырып, 2% мақсатты деңгейіне қайта орала бастаса, реттеуші ағымдағы мөлшерлемені сақтайды немесе алдағы уақытта оны төмендетуге көшуі мүмкін.
- Еңбек нарығы тұрақты болып, инфляция жоғары деңгейде сақталған жағдайда, ФРЖ ақша-кредит саясатын қатаңдатуы мүмкін. Потенциалды тәуекел факторлары ретінде реттеуші жасанды интеллект секторынан жоғары сұранысты, Таяу Шығыстағы қақтығыстың салдарын және сауда тарифтерінің ықпалын атап өтеді.
Freedom-тің ФРЖ мөлшерлемесі бойынша болжамы
Freedom пікірінше, 2026 жылдың күзінде мөлшерлемені көтеру үшін инфляциялық қысымның орнықтылығына қатысты жаңа дәлелдер қажет болады. Маусым–тамыз айларындағы деректер шешуші мәнге ие болады.
Талдаушылардың базалық сценарийі алдағы айларда қалыпты инфляцияның сақталуын көздейді. Мөлшерлемені көтеруге негіз тек базалық PCE дефляторы маусым, шілде және тамыз айларында айдан айға орта есеппен 0,27%-дан жоғары болған жағдайда ғана пайда болуы мүмкін. Әзірге мұндай сценарий негізгі емес.
Мамыр айында базалық PCE дефляторының жеделдеуі жылдық мәнде 4,1%-ға дейін — соңғы 3 жылдағы ең жоғары деңгейге — қарамастан, талдаушылар мұнай бағасының төмендеуі және энергетикалық фактор ықпалының біртіндеп әлсіреуі есебінен маусым–тамызда инфляциялық қысымның бәсеңдеуін күтеді.
Жеке инвестициялық ұсыныс болып табылмайды.