Freedom Broker: күшті тоқсанға қарамастан, Baker Hughes әлі де артық бағаланған

Freedom Broker талдаушылары Baker Hughes Co. (BKR) мұнайсервистік компаниясының акциялары бойынша мақсатты бағасын $48-ден $51-ге көтерді, алайда «Сату» ұсынымын сақтап қалды. Нарық күтулерінен жоғары болған екінші тоқсан нәтижелеріне қарамастан, ағымдағы баға белгілеулер позитивті факторлардың басым бөлігін қамтып қойған. Ағымдағы $58,4 бағада мақсатты баға шамамен 12,7% төмендеу әлеуетін білдіреді.

Baker Hughes (BKR) — мұнай-газ саласы мен энергетика үшін жабдық, технологиялар және сервистер жеткізетін әлемдегі ең ірі жеткізушілердің бірі. Соңғы жылдары компания бизнесті белсенді түрде трансформациялап, газ инфрақұрылымына, СТГ-ға, энергетикалық жабдыққа және дата-орталықтарға арналған шешімдерге басымдық беріп, сонымен қатар дәстүрлі мұнайсервистік бағытқа тәуелділікті азайтып келеді.

Күшті тоқсан Baker Hughes-тің инвестициялық бағасын өзгертпеді

Freedom Broker талдаушылары кіріс пен пайда бойынша күтулерден жоғары нәтижелер аясында компанияның тоқсандық көрсеткіштерін оң бағалайтынын атап өтті. Газ технологиялары сегментіндегі тапсырыстардың еселеп өсуі ұзақ мерзімді жоғары сұранысты растайды. Алайда қағаздар әлі де әділ бағадан жоғары саудаланып жатыр, сондықтан ұсыным «Сату» күйінде қалады, деп қосты сарапшылар.

Компания 2026 жылдың екінші тоқсанында негізгі қаржылық көрсеткіштер бойынша консенсус-болжамдардан асып түсті. Түсім $6,7 млрд болып, жылдық мәнде 2,4% төмендеді, алайда нарық күткеннен жоғары болды. Акционерлерге тиесілі таза пайда $681 млн-ға жетті, ал GAAP бойынша сұйылтылған акцияға шаққандағы пайда $0,68-ге дейін өсті. Түзетілген акцияға шаққандағы пайда $0,64 болды, бұл консенсус-болжамнан бірден 30,6% жоғары. Түзетілген EBITDA $1,23 млрд-қа жетті.

Тоқсанның басты жетістіктерінің бірі — рекордтық тапсырыстар көлемі. Жаңа тапсырыстардың жалпы портфелі $10,5 млрд-қа жетті, ал Industrial & Energy Technology (IET, газ саласына арналған жабдықты, климаттық және өнеркәсіптік шешімдерді біріктіретін бөлімше) сегменті $7,1 млрд көлемінде рекордтық тапсырыстар алды. Орындалмаған тапсырыстардың жиынтық көлемі $40,1 млрд-қа дейін өсті, оның ішінде IET бойынша $37,1 млрд.

Газ технологиялары басты драйверге айналуда

Өсімнің негізгі көзі — Industrial & Energy Technology бөлімшесі. Оның тоқсандық түсімі іс жүзінде өзгермей, шамамен $3,3 млрд болды, ал газ жабдығына тапсырыстар көлемі өткен жылмен салыстырғанда 3,5 есе өсіп, $6,2 млрд-қа жетті.

Өсімді СТГ-ға әлемдік жоғары сұраныс, энергетикалық инфрақұрылымды дамыту жобалары және қарқынды кеңейіп жатқан дата-орталықтар нарығы қолдап отыр. Тоқсан ішінде Baker Hughes Venture Global, Cheniere, Golar сияқты сұйытылған табиғи газ экспорттаушы компаниялардың жобаларына жабдық бойынша ірі тапсырыстар, сондай-ақ Солтүстік Америкадағы энергетика нысандары мен деректерді өңдеу орталықтары үшін жалпы қуаты 2 ГВт-тан асатын газ турбиналарын жеткізу жөнінде тапсырыстар алды.

Осы ретте мұнайсервистік бағыт қысымды сезінуді жалғастыруда. Oilfield Services & Equipment сегментінің түсімі 4,6%-ға қысқарып, $3,5 млрд-қа дейін төмендеді. Ең әлсіз динамиканы қайтадан Таяу Шығыс және Азия өңірі көрсетті: геосаяси шиеленіс аясында сатылым 12,9%-ға құлдырады.

Ірі мәміле перспективаларды күшейтеді, бірақ борыш жүктемесін арттырады

Шілдеде Baker Hughes энергетикаға, газ өнеркәсібіне және криогендік технологиялармен жұмысқа арналған жабдық өндірушісі Chart Industries-ті $13,6 млрд құнына сатып алуды аяқтады. Компания өнеркәсіптік және энергетикалық газдарды сұйылту, сақтау және тасымалдауға арналған жабдықтың ең ірі өндірушілерінің бірін иеленді, бұл Baker Hughes-тің тез өсіп жатқан СТГ және энергетикалық инфрақұрылым нарығындағы позициясын едәуір күшейтеді.

Сонымен бірге талдаушылар үшінші тоқсанда-ақ пайыздық шығындар мен борыш жүктемесінің айтарлықтай өсетінін күтеді. Мәмілені қаржыландыру үшін Baker Hughes бұған дейін $10 млрд көлемінде облигациялар орналастыратынын мәлімдеген. Жақын перспективада басшылық қарызды азайтуға назар аудармақ, сондықтан талдаушылар биыл акцияларды кері сатып алу бағдарламасының қайта басталуын немесе дивидендтердің өсуін күтпейді.

Неліктен талдаушылар Baker Hughes акциялары бойынша «Сату» ұсынымын сақтап отыр

Freedom Broker күшті тоқсандық нәтижелер мен индустриялық және энергетикалық технологиялар сегментінің ұзақ мерзімді әлеуетін ескере отырып, Baker Hughes акцияларының мақсатты бағасын $51-ге дейін көтерді. Алайда бағалау қайта қаралғаннан кейін де мақсатты баға ағымдағы нарықтық құннан төмен қалып отыр, бұл шамамен 12,7% төмендеу әлеуетіне сәйкес келеді.

Талдаушылардың пікірінше, бизнестің одан әрі өсуі көбіне СТГ, энергетикалық инфрақұрылым және дата-орталықтарға арналған жабдық жобаларының дамуына байланысты болады. Сонымен қатар мұнайсервистік сегментке қысым, Chart Industries-ті сатып алғаннан кейінгі борыш жүктемесінің өсуі және сақталып отырған геосаяси белгісіздік акциялардың ағымдағы деңгейлерде инвестициялық тартымдылығын шектейді.

Baker Hughes-тің алдыңғы нәтижелері

2026 жылдың сәуірінде талдаушылар Baker Hughes-тің индустриялық және энергетикалық технологияларға қарай трансформациясының жеделдегенін атап өткен. Ол кезде компания да СТГ жабдығына және энергетикалық жобаларға жоғары сұраныс арқасында түсім мен пайда бойынша нарық күтулерінен асып түсті. Сонымен бірге талдаушылар мұнайсервистік бизнестің әлсіздігін, Chart Industries-ті сатып алу мәмілесіне дайындыққа байланысты борыш жүктемесінің өсуін атап өтіп, акциялар бойынша ұсынымды «Сату» деңгейіне дейін төмендетті әрі мақсатты бағаны $44-тен $48-ге көтерді.

Жеке инвестициялық ұсыным болып табылмайды.