Freedom Broker Movida облигациялары бойынша «Сатып алу» ұсынымын сақтап қалды

Freedom Broker Movida Europe S.A. (MOVIBZ) 9,7% купоны бар және өтеуге дейінгі кірістілігі 10,9% болатын еурооблигациялар бойынша «2 жылға дейін сатып алу» ұсынымын сақтап қалды. Талдаушылар автопарктің күрт ұлғаюына байланысты еркін ақша ағынының (FCF) уақытша нашарлауына қарамастан, бондтар бойынша оң кредиттік болжамды қалдырды. Эмиссияның индикативтік бағасы 94,49%, ал ағымдағы кірістілік — 10,3%.

Movida: Бразилиядағы автокөлік жалдау

Movida Europe S.A. — бразилиялық Movida көлік тобына байланысты эмитент еурооблигациялар. Компания автокөліктерді қысқа және ұзақ мерзімге жалға берумен, сондай-ақ жалдау паркіндегі пайдаланудан кейін автомобильдерді сатумен айналысады.

9,7% купон — бұл облигация бойынша тұрақты пайыздық табыс, ал өтеуге дейінгі кірістілік 10,9% қағазды өтеуге дейін ұстап тұрған жағдайда сатып алу бағасы мен барлық болашақ төлемдерді ескергендегі күтілетін орташа жылдық нәтижені көрсетеді 

Күшті операциялық динамика кредиттік тезисті сақтайды

Күшті операциялық нәтижелер кредиттік метрикалардың жақсаруын қолдайды, бірақ автопарктің өсуі FCF-ке қысым түсірді, деп атап өтеді Freedom Broker талдаушылары. 2026 жылдың II тоқсанында Movida-ның жалпы түсімі $746 млн болды және ж/ж 2% өсті. Бұл ретте қысқа мерзімді және ұзақ мерзімді жалға беру сегменттеріндегі автокөлік жалдаудан түскен түсім $455 млн-ға дейін өсіп, ж/ж 21% және т/т 4% артты.

Сонымен қатар, пайдаланылған автокөліктерді сатудан түскен түсім $291 млн-ға дейін төмендеп, ж/ж 18% және т/т 7% азайды. Негізгі оң фактор ретінде талдаушылар негізгі жалдау бизнесінің тиімділігінің артуын атап өтеді. Компанияның EBITDA көрсеткіші $334 млн-ға дейін өсіп, ж/ж 22% және т/т 8% артты, ал жалдау сегменттеріндегі EBITDA маржасы 72,8%-ға дейін кеңейді (бір жыл бұрын 71,8% және алдыңғы тоқсанда 70,3%).

RAC сұраныс есебінен өсуде

Қысқа мерзімді жалдау (RAC) сегментінде орташа операциялық автопарк шамамен 114 мың автокөлікке дейін ұлғайып, ж/ж 19% және т/т 7% өсті. Бір автокөлікке шаққандағы орташа жалпы түсім айына шамамен $741 болды, ж/ж 9% өссе де, т/т 3% төмендеді. Орташа тәуліктік тариф шамамен $33-ке жетіп, ж/ж 7% өсіп, алдыңғы тоқсан деңгейінен 2% төмен болды. Жүктеме коэффициенті 76,2% болып, ж/ж 2,1 т.п. артты, бірақ т/т 1,1 т.п. төмендеді. Бұл ретте жалға беру күндерінің саны 7,4 млн-ға дейін өсіп, ж/ж 22% және т/т 5% артты. Талдаушылар көрсеткіштердің өсуін жалға алуға жоғары сұраныс және Movida-ның нарықтағы үлесінің артуымен байланыстырады.

GTF болашақ түсімнің көрінуін қамтамасыз етеді

Ұзақ мерзімді жалдау (GTF) сегментінде орташа операциялық автопарк шамамен 131 мың автокөлік деңгейінде сақталып, ж/ж 4% өсті. Бір автокөлікке шаққандағы орташа жалпы түсім айына шамамен $651-ге дейін өсіп, ж/ж 12% және т/т 4% артты. Жаңа келісімшарттардың кірістілігі әрекеттегі портфель бойынша 3,2%-бен салыстырғанда 3,7% болды.

Келісімшартталған түсім көлемі шамамен $1,95 млрд-қа дейін өсіп, ж/ж 40% артты. Freedom Broker бағалауынша, бұл болашақ нәтижелердің жақсы көрінуін және ескі келісімшарттар неғұрлым табысты келісімшарттармен алмастырылған сайын бір автокөлікке шаққандағы түсімнің одан әрі өсу әлеуетін қалыптастырады.

Автопарктің агрессивті өсуі FCF-ке уақытша соққы берді

Тоқсанның негізгі теріс факторы автокөлік сатып алудың күрт ұлғаюы болды. II тоқсанда Movida шамамен 38,6 мың автокөлік сатып алды, бұл ж/ж 22% және т/т 165% өсім, ал сатылым 19,4 мың автокөлікке дейін төмендеді (ж/ж 25% және т/т 6%). Нәтижесінде тоқсан соңындағы жалпы автопарк шамамен 286 мың автокөлікке дейін өсіп, ж/ж 9% және т/т 7% артты. RAC паркі шамамен 140 мың автокөлікке дейін ұлғайып, ж/ж 16% және т/т 12% өсті.

Инвестициялардың өсуі ақша ағындарына әсер етті. Ақшалай капитальдық шығындар $705 млн-ға дейін өсіп, ж/ж 74% және т/т 43% артты. FCF минус $221 млн-ға дейін нашарлады (бір жыл бұрын плюс $161 млн және 2026 жылдың I тоқсанында минус $71 млн болған). Талдаушылар әзірге автопарктің ұлғаюын Movida-ның тұрақты агрессивті кеңею стратегиясына қайта оралуы ретінде қарастырмайды. Менеджмент шешімді Бразилиядағы шілде айындағы қысқы демалыс кезінде сұраныстың маусымдық өсуімен түсіндіреді. Осы кезеңге компания қосымша шамамен 18 мың автокөлікті іске қосты.

Леверидж төмендеуде, бірақ өтеу кестесі тығыз күйінде

II тоқсан соңында Movida-ның лизингті қоса алғандағы жалпы қаржылық қарызы шамамен $4,0 млрд болды. Ақша қаражаты мен өтімді қысқа мерзімді қаржылық активтер қоры $658 млн-ға дейін төмендеді (тоқсан бұрын $762 млн). Бұл ретте EBITDA-ның өсуі есебінен таза қарыз/EBITDA көрсеткіші 2,9x-тен 2,8x-ке дейін жақсарды. Ковенанттар мақсатындағы көрсеткіш ең жоғары рұқсат етілген 3,5x деңгейімен салыстырғанда шамамен 2,66x деңгейінде іс жүзінде тұрақты қалды.

Тоқсан аяқталғаннан кейін Movida шамамен $310 млн қарызды қайта қаржыландыруды жалғастырды, оның ішінде шамамен $210 млн дебентураны 2033 жылға дейін және $100 млн несиені 2029 жылға дейін ұзарту бар. Дебентуралар — компания қаржыландыру тарту үшін шығаратын борыштық бағалы қағаздар. Оларды 2033 жылға дейін ұзарту Movida-ға өтеулердің бір бөлігін кейінге қалдыруға және алдағы жылдары өтімділікке түсетін қысымды азайтуға мүмкіндік береді. 

Талдаушылардың пікірінше, мәмілелер компанияның қорландыруға қолжетімділігі сақталып отырғанын растайды. Алайда өтеу кестесі әлі де айтарлықтай: шамамен $307 млн 2026 жылдың қалған бөлігіне, $607 млн — 2027 жылға және $722 млн — 2028 жылға тиесілі.

Қытай автокөліктері жаңа кредиттік тәуекел тудырады

Облигациялар үшін тағы бір тәуекел факторы — Бразилия автомобиль нарығында қытайлық өндірушілер үлесінің тез ұлғаюы. 2026 жылдың I жартыжылдығында Қытайдан импортталған автокөліктерді тіркеу ж/ж дерлік екі есе өсіп, 141 мыңға жетті және барлық импорттық автокөліктердің шамамен жартысын құрады. Movida үшін бұл тренд бизнестің жоғары капиталсыйымдылығына байланысты маңызды: автокөлікті жалға беруден және кейін оны сатудан түсетін табыс сатып алу және қорландыру құнын өтеуі тиіс, деп есептейді Freedom Broker сарапшылары. 

Бұл ретте талдаушылар әзірге тәуекелді басқаруға болады деп санайды. Movida автокөліктерінің шамамен 84%-ы ең қолжетімді баға санатына жатады: орташа ағымдағы қалдық құны шамамен $14,5 мың және сату кезіндегі күтілетін құны шамамен $13,1 мың. Салыстырмалы санаттағы жаңа қытай автокөліктерінің орташа бағасы шамамен $25,7 мың.

Мөлшерлемелердің төмендеуі облигацияларды қолдайды

Movida-ның кредиттік профилі үшін қосымша оң фактор — Бразилияның ақша-несие саясатының жұмсаруы. Тамызда Бразилия Орталық банкі Selic негізгі мөлшерлемесін қатарынан төртінші рет 0,25 т.п.-қа төмендетіп, жылдық 14%-ға дейін түсірді. Талдаушылардың бағалауынша, мөлшерлемелердің одан әрі төмендеуі еркін ақша ағынын (FCF) қолдап, леверидждің төмендеуін жеделдетуі мүмкін. Freedom Broker 2026 жылы FCF шамамен $81 млн деңгейінде теріс болып қалатынын, 2027 жылы нөлге жақын болатынын, ал 2028 жылы шамамен $116 млн-ға дейін жақсаратынын күтеді. Сонымен қатар, талдаушылар бағалауынша, таза қарыз/EBITDA тиісінше шамамен 2,4x, 2,2x және 2,1x-ке дейін төмендеуі мүмкін.

MOVIBZ 9.7'33 тартымды кірістілікті сақтайды

Freedom Broker Movida бойынша оң кредиттік көзқарасты және MOVIBZ 9.7'33 еурооблигациялары бойынша «2 жылға дейін сатып алу» ұсынымын сақтайды. Шығарылымның рейтингі S&P бойынша BB-, Moody’s бойынша Ba3 және Fitch бойынша BB, басымдығы — жоғары, қамтамасыз етілмеген қарыз. Купон 9,7%, төлемдер жылына екі рет жүзеге асырылады, өтеуге дейінгі кірістілік — 10,9%, ағымдағы кірістілік — 10,3%. Индикативтік баға — 94,49%, өтеу күні — 2033 жылғы 11 қазан, айналымдағы шығарылым көлемі — $350 млн, ең төменгі лот — $200 тыс.

Жеке инвестициялық ұсыным болып табылмайды.