Revolut стратегиясы Ұлыбританияның банк нарығын өзгертуі мүмкін – Freedom

Revolut Barclays (BARC) және HSBC Holdings (HSBA) қоса алғанда, Ұлыбританияның ең ірі банктерінен корпоративтік клиенттерді тартуды көздеп отыр, деп хабарлады Financial Times. Компания FTSE 250 индексіне кіретін кәсіпорындарға өз қызметтерін ұсынуды жоспарлап отыр.

Revolut-тың ірі компанияларға қызмет көрсету сегментіне шығуы Ұлыбританияның банк нарығындағы бәсекені күшейтіп, оның құрылымдық өзгерістерін жеделдетуі мүмкін, деп есептейді Freedom жетекші талдаушысы Наталья Мильчакова. Қаржы-технологиялық компанияның артықшылықтары ретінде төмен комиссиялар, цифрлық қызмет көрсету және жеңілдетілген рәсімдер аталады.

Revolut – мобильді қосымша арқылы банк және төлем қызметтерін ұсынатын британдық қаржы-технологиялық компания. Оның клиенттері шоттар аша алады, ақша аудара және айырбастай алады, төлем карталарын пайдалана алады, сондай-ақ жинақтары мен инвестицияларын басқара алады. Revolut акциялары әзірге биржада саудаланбайды, сондықтан компанияның тикері жоқ.

Revolut ірі бизнеске бағыт алды

FTSE 250 – Лондон қор биржасында саудаланатын, британ нарығындағы капиталдандыруы ең жоғары 100 эмитенттен кейінгі 250 ірі компанияны қамтитын биржалық индекс. Бұл индекске ену әдетте бизнестің елеулі ауқымын көрсетеді.

Revolut-тың корпоративтік бөлімшесі 2027 жылға қарай әлем бойынша клиенттер санын қазіргі 800 мыңнан 1 млн-ға дейін арттыруды жоспарлап отыр. 2025 жылы ол компанияның £4,5 млрд-қа жеткен жиынтық кірісінің 16%-ын қамтамасыз етті. Бағыттың жылдық кірісі 53%-ға өсті.

Revolut компанияларға есеп айырысу шоттарын ашу және жүргізу, төлемдер жүргізу және корпоративтік дебет карталарын ұсынады. Мұндай карталар ұйымның шотына байланыстырылған және қызметкерлерге жұмыс шығындарын жұмыс беруші белгілеген шектер аясында төлеуге мүмкіндік береді.

Осы уақытқа дейін бөлімшенің негізгі клиенттері штатында бес адамнан 50 адамға дейінгі қызметкері бар кәсіпорындар болды. Енді Revolut ірі ұйымдармен белсендірек жұмыс істеуге ниетті. 2026 жылдың наурызында алынған британдық банк лицензиясы компанияға корпоративтік клиенттер арасында әсіресе сұранысқа ие кредиттік өнімдерді дамытуға мүмкіндік береді.

Revolut стратегиясы неге сәтті болуы мүмкін

Наталья Мильчакованың бағалауынша, Revolut төмен комиссиялар, жаңа қаржылық өнімдер және толықтай қашықтан қызмет көрсету арқасында дәстүрлі банктердің клиенттерін бірнеше рет тарта алды. Бұған дейін компанияның табысы негізінен жеке тұлғаларға арналған қызметтермен байланысты болды, алайда енді ол корпоративтік банктік қызмет көрсетудің анағұрлым күрделі сегментіне шығуда.

Филиалдардың кең тармақталған желісінің болмауы Revolut-қа шығындарды қысқартуға көмектеседі. Цифрлық технологиялар мен жасанды интеллектіні енгізу операцияларды жылдамырақ өңдеуге және клиенттермен өзара әрекеттесуді жеңілдетуге мүмкіндік береді. Нәтижесінде қаржы-технологиялық компаниялар бизнеске төменірек комиссиялар мен бюрократиясы аз рәсімдерді ұсына алады.

Наталья Мильчакова Revolut-тың жаңа стратегиясы сәтті болуы мүмкін екенін жоққа шығармайды. Компания дәстүрлі банктердің ең ірі клиенттерін тез арада тартып ала алмаса да, оның кеңеюі Ұлыбритания нарығындағы шағын қаржы-технологиялық компаниялар мен жас жобалардың рөлін күшейтуі мүмкін.

Barclays деген не

Barclays (BARC) – Ұлыбританиядағы ең ірі банктердің бірі. Ол жеке тұлғалар мен компанияларға қызмет көрсетеді, кредиттер береді, төлемдер жүргізеді, активтерді басқарады және инвестициялық-банктік қызметтер ұсынады. Банктің акциялары Лондон қор биржасында BARC тикерімен саудаланады.

Barclays-тің күшті жақтары ретінде танымалдылығы, кең клиенттік базасы және дамыған кредиттік инфрақұрылымы сақталып отыр. Алайда филиалдық желіні ұстау және күрделі ішкі рәсімдер шығындарды арттырып, цифрлық бәсекелестермен салыстырғанда жаңа қызметтерді енгізуді баяулатуы мүмкін.

HSBC деген не

HSBC Holdings (HSBA) – штаб-пәтері Лондонда орналасқан халықаралық банктік топ. Ол бөлшек және корпоративтік банктік қызметтер ұсынады, халықаралық сауданы қаржыландырады және клиенттердің активтерін басқарады. HSBC акциялары Лондон қор биржасында HSBA тикерімен саудаланады.

Банктің негізгі артықшылықтарының бірі – Азиядағы кең ауқымды қатысуы және ірі компаниялардың халықаралық операцияларын сүйемелдеу мүмкіндігі. Сонымен қатар бизнестің ауқымы мен реттеуші талаптар жаңа өнімдерді дамыту процесін қымбат әрі ұзақ етеді.

Дәстүрлі банктер маңызды артықшылықтарын сақтап отыр

Revolut-тың технологиялық мүмкіндіктеріне қарамастан, ірі компаниялардың жаңа банкке ауысуы едәуір уақыт алуы мүмкін. Корпоративтік клиенттерге тек шоттар мен төлем карталары ғана емес, сондай-ақ ірі кредиттік желілер, сауда қаржыландыруы, ақша ағындарын басқару және халықаралық операцияларға қызмет көрсету қажет.

Barclays пен HSBC елеулі капиталға, ірі кәсіпорындармен көпжылдық қатынастарға және тәуекелдерді басқарудың дамыған жүйесіне ие. Revolut-қа үлкен операциялық көлемі бар ұйымдарға сенімді қызмет көрсете алатын инфрақұрылымы бар екенін дәлелдеуі керек.

Реттеуші талаптар да кеңею қарқынын шектеуі мүмкін. Компания неғұрлым көп банктік және кредиттік қызмет ұсынған сайын, тәуекелдерді бақылау, клиенттерді қорғау және заңнаманы сақтау шығындары соғұрлым жоғары болады.

Цифрлық қаржылық платформалардың өсуі төлем сегментіндегі бәсекені әлдеқашан күшейтті. Бұған дейін Freedom American Express перспективаларын бағалаған, ол карталар шығаруды, төлемдерді өңдеуді және корпоративтік клиенттерге қызмет көрсетуді біріктіреді. Талдаушылар сондай-ақ тұтынушылық белсенділіктің өзгеруі аясында PayPal төлем сервисінің жағдайын қарастырған. Revolut-тың кеңеюі цифрлық платформалар мен дәстүрлі қаржы ұйымдары арасындағы бәсекенің бөлшек нарықтан корпоративтік сегментке біртіндеп таралып жатқанын көрсетеді.

Жеке инвестициялық ұсыныс болып табылмайды.