Freedom Broker Nucor бойынша өсім әлеуеті шамамен 9% болатын инвестидея ашты

Freedom Broker талдаушылары үшінші тоқсанға арналған болжам жарияланғаннан кейін Nucor Corporation (NUE) акцияларының төмендеуін шамадан тыс деп санайды және Солтүстік Америкадағы ең ірі болат өндірушісінің қағаздарын сатып алуға кеңес береді. Сарапшылардың мақсатты бағасы $270, бұл ағымдағы $247,9 бағасына қатысты шамамен 8,9% өсім әлеуетін білдіреді.

Nucor — болат компаниясы

Nucor құрылыс, энергетика, өнеркәсіп және автокөлік секторы үшін табақ және сортты прокат, арматура, болат конструкциялар және өзге де металл өнімдерін шығарады. Компания сондай-ақ металл сынықтарын қайта өңдейді және Солтүстік Америкадағы ең ірі қайта өңдеуші болып табылады. 

Нарық болжамға тым күрт жауап берді

2026 жылдың үшінші тоқсанына арналған Nucor болжамы талдаушылардың консенсус-болжамынан төмен болып, акциялардың екі сауда сессиясы ішінде 7% төмендеуіне түрткі болғанына қарамастан, нарықтың мұндай реакциясын шамадан тыс деп санаймыз, деп атап өтті Freedom Broker талдаушылары.

Nucor үшінші тоқсанда бір акцияға шаққандағы сұйылтылған пайданың $5,55-тен $5,65-ке дейін болуын күтеді. Екінші тоқсанда көрсеткіш $5,04 болды, ал түзетілген пайда — бір акцияға $4,84. Салыстыру үшін, 2025 жылдың үшінші тоқсанында компания бір акцияға $2,63 тапты.

Nucor-дың болат өндіру бөлімшесінде компания сатылым көлемі тұрақты болған жағдайда орташа іске асыру бағаларының жоғарылауы есебінен пайданы арттыруды жоспарлап отыр. Дайын болат бұйымдар сегментінде көлемдер мен бағалардың өсуі оң әсер етуі тиіс. Ал шикізат бағытының пайдасы бағалар мен жеткізілімдердің төмендеуіне байланысты қысқаруы мүмкін.

Екінші тоқсанның көрсеткіштері

2026 жылдың екінші тоқсанында Nucor-дың болат өндіру бөлімшесінің нәтижелері алдыңғы кезеңдер үшін шикізат сатып алуға кеткен шығындардың $130 млн көлеміндегі қайтарымын қамтыды. Үшінші тоқсанда мұндай түсім күтілмейді. Бұдан бөлек, екінші тоқсанда компания Helion термоядролық энергетика компаниясына салынған инвестицияны қайта бағалау есебінен $61 млн, немесе бір акцияға $0,20 көлемінде ақшалай емес салыққа дейінгі кіріс алды.

2026 жылдың екінші тоқсанында Nucor-дың таза пайдасы $1,16 млрд-қа, немесе бір акцияға $5,04-ке дейін өсті; бұл алдыңғы тоқсандағы $743 млн-нан, немесе бір акцияға $3,23-тен және бір жыл бұрынғы $603 млн-нан, немесе бір акцияға $2,60-тан жоғары. Түзетілген пайда $1,11 млрд-ты, немесе бір акцияға $4,84-ті, түсім — $10,40 млрд-ты, ал EBITDA — $2,02 млрд-ты құрады. Нәтижелердің өсуін болат өндіру бөлімшесіндегі бағалар мен сатылым көлемдерінің ұлғаюы қамтамасыз етті.

Freedom Nucor болжамынан жоғары пайданы күтеді

Freedom Broker Nucor компаниясы өз бағдарларын жүйелі түрде асыра орындайтынына назар аударады. 2016 жылдың төртінші тоқсанынан бері компанияның бір акцияға шаққандағы нақты пайдасы орта есеппен менеджмент болжамынан 13% жоғары болды, ал медианалық асып түсуі 11% құрады.

Осы негізде талдаушылар менеджменттің ағымдағы болжамы консервативті болуы мүмкін деп пайымдайды. Freedom Broker Nucor-дың үшінші тоқсандағы пайдасы бір акцияға $6,45-ке жетеді, жыл/жыл 117% өседі деп күтеді. Бұл нәтиже компанияның $5,65 деңгейіндегі болжамының жоғарғы шегінен де жоғары болады. 2026 жылдың қорытындысы бойынша бір акцияға пайда бағалауы $20,55.

Nucor-ға қолдауды ыстықтай илемделген рулонды прокат, яғни HRC бағалары да көрсетіп отыр. Олар бір тоннасына $1 300 деңгейіне жақын — 2022 жылдың екінші тоқсанынан бергі ең жоғары деңгей. Талдаушылар жоғары бағаларды жылдың соңына дейін болат өндіру бөлімшесі пайдасының орнықты драйвері деп санайды.

Кері сатып алу котировкаларды қолдайды

Үшінші тоқсанның басынан бері Nucor орташа $247,04 бағамен шамамен 2,03 млн өз акциясын қайта сатып алды. Қайта сатып алу қарқыны 2024–2025 жылдардағы көрсеткіштерден шамамен екі есе жоғары.

Жыл басынан бері компания акцияларды қайта сатып алу және дивидендтер арқылы акционерлерге шамамен $1,36 млрд қайтарды. Freedom Broker бағалауынша, Nucor белсенділігі басшылықтың бизнес перспективаларына сенімді екенін көрсетеді және қайта сатып алудың орташа бағасы маңында котировкаларға қосымша қолдау қалыптастырады. Қағаздардың дивидендтік кірістілігі 1,4% құрайды.

Қандай тәуекелдер сақталады

Freedom Broker Nucor-дың Батыс Вирджиниядағы жаңа зауытының жобалық көрсеткіштерге шығу қарқынын қадағалауды ұсынады. Өзге тәуекелдердің қатарына талдаушылар металл сынықтарын қайта өңдеу экономикасының одан әрі нашарлауын және ыстықтай илемделген прокат бағалары өсімінің бәсеңдеу мүмкіндігін атайды. Nucor үшінші тоқсан бойынша толық есепті нарық жабылғаннан кейін 26 қазанда жариялауды жоспарлап отыр. 

Мақсатты бағаның динамикасы

Бұған дейін Freedom Nucor бойынша 12 айлық мақсатты бағаны $305-тен $285-ке дейін төмендетіп, рейтингті «Сатып алу» деңгейінен «Ұстау» деңгейіне түсірген. Мақсаты $270 болатын жаңа «Сатып алу» ұсынымы болжам тудырған құлдыраудан кейін котировкалардың қалпына келуіне бағытталған бөлек қысқа мерзімді инвестициялық идея болып табылады.

2026 жылдың бірінші тоқсанында Nucor-дың түсімі жыл/жыл 21%-ға және тоқсан/тоқсан 24%-ға өсіп, $9,5 млрд-қа жетті. Бір акцияға шаққандағы сұйылтылған пайда $3,23-ке, ал түзетілген EBITDA — $1,51 млрд-қа жетті. Осы нәтижелер жарияланғаннан кейін компания акциялары 4,7% қосты.

Жеке инвестициялық ұсыным болып табылмайды.