Freedom: LVMH сатылымдарының төмендеуі бүкіл люкс секторына қатысты алаңдаушылықты күшейтті

LVMH және өзге де люкс санатындағы тауар өндірушілердің акциялары француз холдингінің инвесторлардың көңілін қалдырған есептілігінен кейін төмендеді. Оның сән және былғары бұйымдары бойынша негізгі бөлімшесінің III тоқсандағы сатылымы күтілгеннен де қатты қысқарды. Freedom талдаушысы Наталья Мильчакованың пікірінше, нәтижелер бүкіл сектор бойынша көрсеткіштердің нашарлауына қатысты алаңдаушылықты күшейтті.

⁠LVMH Louis Vuitton, Dior, Fendi, Bulgari және басқа да брендтерді біріктіреді. Холдинг киім, аксессуарлар, зергерлік бұйымдар, косметика және алкоголь өнімдерін шығарады, сондай-ақ бөлшек сауда желілерін басқарады.

Негізгі бөлімшенің сатылымы 5%-ға төмендеді

⁠LVMH-тың 2026 жылғы III тоқсан және тоғыз ай бойынша есебіне сәйкес, шілде–қыркүйекте сән және былғары бұйымдары бөлімшесінің органикалық түсімі жылдық мәнде 5%-ға төмендеді. Бұл көрсеткіш валюта бағамдарының ықпалын және бизнестің құрамындағы өзгерістерді есепке алмайды.

Oninvest ⁠хабарлағандай, талдаушылар қысқару шамамен 1,6% болады деп күткен. 5%-дық төмендеу бір брендтің емес, Louis Vuitton және өзге маркаларды қамтитын бүкіл бөлімшеге қатысты.

Сонымен бірге топтың жалпы органикалық түсімі тоқсан ішінде 1%-ға өсті. Сағаттар мен зергерлік бұйымдар сатылымы 6%-ға артты, ал құрамына Sephora кіретін таңдаулы бөлшек сауда бағыты 8% қосты. Осылайша, сән бизнесіндегі әлсіздікті өзге бағыттар ішінара өтеді.

Көңіл қалу LVMH бәсекелестеріне де әсер етті

13 қазандағы сауданың алғашқы сағатында LVMH акциялары 1,8%-ға арзандады. Oninvest деректері бойынша, Hermès қағаздары 2,7%-ға, Kering – 1,9%-ға, ал Richemont – 2,2%-ға төмендеді.

Мильчакова қазанның басынан бері LVMH акциялары шамамен 3% жоғалтқанын атап өтеді. Оның бағалауынша, инвесторлар әлсіз сатылым қаупін алдын ала ескерген, алайда нақты төмендеу консенсус-болжамнан едәуір терең болды.

Реакция басқа компанияларға да тарады, өйткені нарық ең ірі люкс холдингінің нәтижелерін қымбат киімге, аяқкиімге және аксессуарларға деген сұраныстың жай-күйі туралы сигнал ретінде қабылдайды.

Қытайдағы сұраныс басты тәуекел факторы болып қала береді

Мильчакова сатылымдардың нашарлауын ең алдымен Қытай экономикасы өсімінің баяулауымен байланыстырады. Бұған дейін Қытайда сұраныс қалпына келеді деген күтулер люкс компанияларға қызығушылықты қолдап келген, алайда жаңа нәтижелер бұл сценарийдің орнықтылығын күмәнға салды.

LVMH-тың өзі де III тоқсанда сән және былғары бұйымдары бөлімшесі Қытайдағы сұраныстың әлсіреуінен зардап шеккенін атап өтті. Ал америкалық нарық оның бизнесін қолдауды жалғастырды.

Талдаушының бағалауынша, Қытай сұранысының әлсіздігі бүкіл сектор үшін маңызды: ол бірден бірнеше өндірушінің сатылым болжамдарын нашарлатып, олардың котировкаларының қалпына келуін шектеуі мүмкін.

Акциялардың төмен бағалануы әзірге алаңдаушылықты сейілтпейді

Бұған дейін Freedom Broker ⁠LVMH акцияларының дисконтты бағалануы әлсіз сұраныс тәуекелдерін өтемейтінін атап өткен. 5 қазандағы материалда холдинг қағаздары күтілетін пайдаға қатысты баға коэффициенті бойынша Inditex-тен шамамен 30% арзан бағаланған.

Сол кезде Мильчакова инвесторлардың сақтығын Қытайда және Азияның басқа елдерінде сұраныстың төмендеуімен түсіндірген. Жаңа есептілік LVMH-тың жалпы нәтижелерінің жақсаруы әзірге оның негізгі сән бағытының тұрақты қалпына келуімен қатар жүрмейтінін көрсетеді.

Жеке инвестициялық ұсыныс болып табылмайды.