Инвестициялық шолу №337. Хедж бағамы

Америкалық инвесторлар дәстүрлі түрде «үйдегі» активтерге басымдық береді. Олар портфельдерінде шамадан тыс үлкен үлес алады, өйткені мұндай инвестициялар түсінікті, үйреншікті және ыңғайлы. Бұл құбылыс home bias деп аталады — яғни инвесторлардың өз елінің активтеріне шектен тыс бейімділігі. Алайда 2025 жыл бұл әдеттің құнын көрсетті: АҚШ-тан тыс елдердің акциялары (MSCI ACWI Ex-U.S.) доллармен есептегенде 33% өсті, ал S&P 500 индексі небәрі 18% ғана қосты. Тіпті валюта әсерін алып тастағанда да — құлдыраған доллар табыстылыққа қосымша 8 пайыздық тармақ қосқанын ескерсек, — АҚШ-тан тыс нарықтар жергілікті валюталарда бәрібір 25% өсім көрсетті.

Бұл тренд жалғасуы мүмкін бе және оған қандай алғышарттар бар?

Халықаралық нарықтардың макроэкономикалық көрсеткіштері жақсарды: олардың құрастырылған PMI индекстері өсім аймағында тұр. Еуропа он жылдық стагнациядан кейін қайта жандану белгілерін көрсетуде: жұмыссыздық тарихи минимумға түсті, инфляция Еуропалық орталық банктің мақсатты деңгейіне іс жүзінде сәйкес келеді. Германия қорғаныс шығындарын арттыра бастады, бұл бүкіл еуропалық экономикаға фискалдық ынталандыру береді. Ұлыбританияда инфляция тұрақты түрде баяулап келеді, ал Англия банкі мөлшерлемелерді төмендетуді жалғастыруда, бұл Лондонда саудаланатын акциялардың өсуін ынталандырады.

Қытай сауда соғыстарының бір жылынан кейін өз экспортын Азия–Тынық мұхиты өңіріне және Еуропаға қайта бағыттады. Аспан асты елінің АҚШ қа тәуелділігі екі есеге азайды. Жапон экономикасы америкалық импорттық тарифтерге қарамастан өсіп келеді, ал ондаған жылдар бойы бағалардың төмендеуінен кейін қалыптасқан орташа инфляция елді экономикалық тоқыраудан шығара алады.

Менің ойымша, негізгі фактор – әртүрлі өңірлердегі корпоративтік табыс өсімінің жақындасуы. Биылғы жылға S&P 500 индексіндегі бір акцияға шаққанда табыс (EPS) өсімі 15,5% болады деп болжануда. Еуропа компаниялары үшін (Ұлыбританияны қоспағанда) бұл көрсеткіш 12,8%, жапон және қытай эмитенттері үшін тиісінше 11,4% және 12,6% болады деп күтіледі. Америкалық және америкалық емес компаниялардың көрсеткіштері арасындағы алшақтық қысқарып келеді, бұл соңғыларының бағалы қағаздары үшін өсу драйверіне айналады.

Келесі маңызды драйвер — нарықтық бағалау. 22 қаңтардағы жағдай бойынша S&P 500 индексі алдағы 12 айға есептелген форвардтық P/E көрсеткіші 23,3х деңгейінде саудаланды. Ал британдық FTSE 100 — 13,6х, жапондық Topix — 16,7х мәнінде бағалануда. АҚШ-тағы дивидендтік кірістілік орта есеппен 1,5%, Жапонияда — 2,2%, Ұлыбританияда — 3,3%.

Америкалық емес активтерге экспозиция үшін көшбасшы болып Vanguard Total International Stock ETF (VXUS) саналады, өткен жылы оның құны 32%-дан астам өсті. Егер инвесторлар қауымдастығының ағымдағы жылға арналған оптимистік болжамдары орындалса, америкалық емес акциялар экономика қалпына келе бастағаны және табыс өсімінің америкалық эмитенттердің көрсеткіштеріне жақындай түскені есебінен сенімді оң динамика көрсетуі тиіс.

Алайда нарықтар геосаяси немесе экономикалық күйзелістерге тап болған жағдайда да, АҚШ-тан тыс компаниялардың акциялары бағалау жағынан әлдеқайда арзан, әрі дивидендтік кірістілігі жоғары болып қала береді. Бұл инвесторлар үшін белгілі бір деңгейдегі «қауіпсіздік жастығын» қамтамасыз етеді. Сондықтан осы активтерді әртараптандыру мақсатында ұқсас тәуекел-профильге ие әрі сапасы жоғары баламаны табу іс жүзінде мүмкін емес.