Инвестициялық шолу №339. Қорғанысқа ойнау

2025 жылдың төртінші тоқсанына арналған ЖІӨ динамикасының алдын ала деректері 20 ақпанда жарияланып, кейбір инвесторлардың көңілін қалдыруы мүмкін еді. Себебі базалық экономикалық көрсеткіштің нақты өсімі консенсус‑болжамнан екі есе төмен болды: тоқсаннан тоқсанға жылдық есепте 2,8% күтілгеннің орнына өсім небәрі 1,4% деңгейінде қалды. Бұл жарияланым импорттық тарифтерге қатысты белгісіздікпен бірге соңғы айда S&P 500 индексінің 0,5% түзетілуіне алып келді.

Инвесторлар мен БАҚ американдық активтерді (акциялар, облигациялар, доллар) сату стратегиясы ең ұтымды қадам болуы мүмкін деген пікір айта бастады. Алайда қазіргі жағдайда бірқатар маңызды жайттар бар. Мысалы, ЖІӨ бойынша жағымсыз тосынсыйдың негізгі себебі — мемлекеттік шығыстар компонентінің жылдық есепте тоқсаннан тоқсанға 5%-дан астам төмендеуі. Бұл ең алдымен федералдық шығыстардың шатдаунға байланысты 16,5%-дан артық қысқаруынан туындады. Келесі жарияланымда осы құрамдастың кері динамикасын күтуге негіз бар, бұл тұтынудың өсуіне және жалпы ЖІӨ-ге оң серпін беруге ықпал етеді. Атланта ФРБ экономика өсімін 3,1% деңгейінде болжайды. Freedom Broker ішкі болжамдары бұдан да оптимистік: АҚШ экономикасының 3,2% өсуі күтіледі, бұл рецессиялық деңгейлерден айтарлықтай алыс.

Соңғы бір жылда доллар индексі 8%-ға төмендеді, бұл АҚШ үкіметіне экспортты ұлғайту және импортты қысқарту жөніндегі уәделерін орындауға көмектеседі. Гринбектің бұдан да күшті құнсыздануын күтуге болмайды, өйткені ол американдықтардың сатып алу қабілетін әлсіретер еді, ал олар Дональд Трамптың электоратының өзегін құрайды. Жоғары ықтималдықпен жергілікті серпілу шеңберінде доллардың тактикалық нығаюына сенім артуға болады, бірақ тарихи максимумдарға оралуын біз болжаймыз деп айта алмаймыз.

Lipper деректеріне сәйкес, жылдың басынан бері америкалық акциялардан $50 млрд астам қаржы шығарылған. Бұл 2010 жылдан бергі жылдың алғашқы сегіз аптасындағы ең белсенді таза сатылым болып, «Америкадан шық» («Продавай Америку») стратегиясының танымал болуына әкелді.

Алайда БАҚ бұл жаңалықтарды көтеріп, контексті ескерусіз қалдырды. АҚШ Қаржы министрлігінің мәліметтері бойынша, 2025 жылы АҚШ акциялары мен облигацияларын шетелдіктердің таза сатып алуы $1,55 трлн-ға жетті, бұл өткен жылмен салыстырғанда 30%‑дан астам өсімге тең. Осы соманың $650 млрд астамы акцияларға, ал $440 млрд-тан көбі қазынашылық облигацияларға тиесілі болды.

Қытай АҚШ‑тың қазынашылық облигацияларын жаппай сатып жатыр деген кең тараған пікірді де шын мәнінде күмәнмен қарауға болады. Расында, өткен жылы Пекиннің мұндай активтерінің ресми көлемі $76 млрд‑қа қысқарып, $683 млрд деңгейіне дейін төмендеді — бұл соңғы 17 жылдағы минимум. Алайда ел айтарлықтай көлемдегі шетелдік активтерді, оның ішінде трежерилерді, орталық банктің балансынан мемлекеттік банктерге аударады. Яғни формалды түрде ҚХР‑дың АҚШ қарыз рыногына қатысуы азайғандай көрінеді, бірақ іс жүзінде бұл қатысуды жоққа шығармайды.

Маңыздысы — биыл да, былтырғы сияқты, нарықты айтарлықтай құбылмалылық толқындары мен бағыттың жиі өзгеруі күтіп тұр. Соған қарамастан, портфельдерден америкалық активтерді шығару — сәтсіз идея. АҚШ нарығының ауқымы, тереңдігі, өтімділігі және тарихи табыстылығы оны белгісіздік жағдайында да тартымды етеді. Бұл ой, әсіресе, нарық динамикасын мұқият бақылауға дайын емес және пассивті инвестицияларды жөн көретін инвесторлар үшін өзекті.

Активтер құрамында негізгі индекстерге тең үлеспен инвестициялау нұсқасын қарастыруға болады — дәлірек айтқанда, олардың ETF‑тері: SPDR Dow Jones (DIA), SPDR S&P 500 (SPY), Invesco QQQ Trust (QQQ) және iShares Russell 2000 (IWM).