Freedom: ЖИ инфрақұрылымы технологиялық алыптардың ақша ағынын жұтып жатыр

Freedom Broker сарапшыларының пікірінше, жасанды интеллектке инвестициялаудағы басты тәуекел — инфрақұрылымды салу қарқыны мен оның өтелімділігі арасындағы алшақтық. Ең ірі бес технологиялық компанияның капиталдық шығындары орта есеппен операциялық ақша ағынының 100%-ына жуықтады, ал Amazon мен Oracle-да ол қазірдің өзінде одан асып отыр. Сарапшылар 2027 жылдың III тоқсанының соңына қарай S&P 500 бойынша базалық нысананы 8300 пункт деңгейінде сақтайды, алайда бұл межеге жету пайда болжамдарының расталуына байланысты.

Капиталдық шығындар еркін қаражатты азайтады

Freedom Broker есептеуінше, Amazon (AMZN) және Oracle (ORCL) компанияларының 2026 жылдың бірінші жартыжылдығындағы капиталдық шығындары жылдық мәнге келтіргенде операциялық ақша ағынынан асып түседі. Alphabet-та олар оның көлемінің шамамен 95%-ын жұтады. Бес компания бойынша орташа көрсеткіш 100%-ға жуықтады.

Операциялық ақша ағыны негізгі қызметтің қанша қаражат әкелетінін көрсетеді. Капиталдық шығындарды шегергеннен кейін дивидендтерге, акцияларды кері сатып алуға, қарызды өтеуге және басқа мақсаттарға бағыттауға болатын еркін ақша ағыны қалыптасады. Сондықтан пайданың өсуі өздігінен акционерлерге қолжетімді ақшаның артқанын білдірмейді.

Сарапшылар ірі технологиялық компаниялардың баланстары мықты болып, қаржыландыруға қолжетімділігі сақталып отырғанын атап өтеді. Эксперттердің негізгі сұрағы — жаңа инфрақұрылым олардың бұрынғы бизнес-модельдерінің табыстылығымен салыстырмалы капитал қайтарымын қамтамасыз ете ала ма.

Болашақ шығындар контрактілермен бекітіліп қойған

Freedom Broker бағалауынша, келісімшартталған баланстан тыс міндеттемелер Microsoft (MSFT) үшін шамамен $558 млрд, Alphabet (GOOGL) үшін $798 млрд, Meta (META) үшін $696 млрд, Amazon үшін $307 млрд және Oracle үшін $322 млрд құрайды. Microsoft, Alphabet және Meta үшін бұл сомалар қаржылық қарыз бен танылған жалдау міндеттемелерінен бірнеше есе көп.

Мұндай келісімшарттарды қарызбен тікелей теңестіруге болмайды, деп түсіндіреді сарапшылар: олардың мерзімдері мен экономикалық табиғаты әртүрлі, ал бір бөлігі болашақ операциялық қызметпен байланысты. Дегенмен олар компаниялар өз мойнына алуға міндеттенген шығындардың ауқымын көрсетеді.

Әсіресе қолданыстағы және болашақ жалдау арасындағы айырмашылық айқын. Бес компания бойынша орта есеппен қол қойылған, бірақ әлі басталмаған шарттардың көлемі танылған жалдау міндеттемелерінен шамамен 5,6 есе жоғары. Meta-да арақатынас 12 еседен асады, Oracle-да 6,6 есе, Alphabet-та — 4,4 есе, Microsoft-та — 3,7 есе.

ЖИ-дің өтелімділігі бүкіл нарық үшін маңызды

Инфрақұрылымдық жарыстың салдары жекелеген компаниялардың шегінен шығады. 2027 жылы S&P 500 бойынша күтілетін пайданың өсімінің шамамен 83%-ы технологиялық секторға тиесілі, ал 2028 жылы — 60%-дан астамы.

Freedom Broker индекс компанияларының акцияға шаққандағы пайдасының 2026 жылы 31%-ға және 2027 жылы 13,2%-ға өсуін болжайды. Баға/пайда қатынасының болжамды деңгейі 18,1х болып сақталған жағдайда, базалық сценарий 2027 жылдың III тоқсанының соңына қарай S&P 500-дің 8300 пунктке жетуін көздейді.

Егер жаңа қуаттар түсім мен өнімділіктің өсуін қамтамасыз етсе, бүгінгі шығындар пайданың әрі қарай ұлғаюына негіз болады. Егер коммерциялық қайтарым құрылыс қарқынынан қалып қойса, компаниялар бір мезгілде жоғары капиталдық шығындармен, әлсіз еркін ақша ағынымен және күтілгеннен төмен нәтижелермен бетпе-бет келуі мүмкін.

Мұндай жағдайда акцияларға қысым бірден екі арна арқылы туындауы ықтимал: пайда болжамдарының төмендеуі және инвесторлар бизнес үшін төлеуге дайын мультипликаторлардың қысқаруы арқылы.

Жоғары мөлшерлемелер инвестициялық жүктемені күшейтеді

Бұған дейін Freedom Broker мемлекеттік облигациялардың жаһандық сатылымын ФРЖ саясатына қатысты белгісіздікпен және мұнайдың қымбаттауымен байланыстырған еді. Қыркүйектің ортасында АҚШ-тың он жылдық қазынашылық облигацияларының кірістілігі 5%-дан асып, 2007 жылдан бергі ең жоғары деңгейге жетті. Жапонияда ұқсас көрсеткіш 3,025%-ға көтерілді — 30 жылда алғаш рет. Кірістіліктің өсуі Оңтүстік Корея, Сингапур және бірқатар еуропалық елдердің нарықтарында да байқалды.

Freedom Broker сарапшыларының бағалауынша, қымбат мұнай бизнестің шығындарын арттырып, әсіресе энергия тасымалдағыштарды импорттауға тәуелді елдерде инфляциялық тәуекелдерді күшейтеді. Инвесторлар болашақ төлемдердің құнсыздануын өтеу үшін жоғарырақ кірістілік талап етеді, бұл облигациялар бағасына қысым түсіреді. Компаниялар үшін бұл жаңа қарыз алудың және қарызды қайта қаржыландырудың қымбаттауын білдіреді, соның ішінде ЖИ инфрақұрылымын салу кезінде де.

Жеке инвестициялық ұсыныс болып табылмайды.