Инвестициялық шолу №350. Бағдардың өзгеруі

American Superconductor (AMSC) — электр энергиясының сапасын бақылау шешімдерін әзірлейтін компания. Компанияның инвестициялық тартымдылығын АҚШ-та ЖИ технологияларының дамуы, деректер орталықтары тарапынан сұраныстың артуы және энергияны көп қажет ететін өндірістердің кеңеюі аясында энергетикалық инфрақұрылымға түсетін жүктеменің өсуі қамтамасыз етеді.

Қолдаушы факторлардың қатарында бизнестің кеңеюі және табыстың анағұрлым жоғары маржалы сегментінің үлесінің артуы бар. Компания энергетикалық жүйелердің сенімділігіне қойылатын талаптардың күшеюінен және желілік инфрақұрылымды жаңғырту үдерісінен ұтып отыр.

Тәуекелдер бизнесінің жобалық сипатымен байланысты, бұл тоқсан сайынғы қаржылық нәтижелердің біркелкі болмауына әкелуі мүмкін. Сондай-ақ ірі тапсырыс берушілер санының шектеулілігі және инфрақұрылымдық жобаларды іске асыру мерзімдеріне тәуелділік тәуекел болып саналады. Freedom Broker-дің AMSC акциясы бойынша алдағы 12 айға арналған мақсатты бағасы — 54 АҚШ доллары.

 

Flexsteel Industries (FLXS) — жиһаз өндірушісі. Компанияның инвестициялық тартымдылығы өнім ассортиментін тұрақты жаңартып отыруымен, сату арналарының кеңеюімен, операциялық қызметті тиімді басқаруымен, өнім портфелін оңтайландыру, еңбек өнімділігін арттыру және жеткізу тізбегін жетілдіру арқылы табыстылықты өсіруімен байланысты. Компанияның консервативті қаржылық саясаты бір мезгілде бизнесті дамытуға инвестиция салуға және акционерлерге капиталды тұрақты түрде қайтаруға мүмкіндік береді. Тоқсандық дивиденд көлемі 25%-ға ұлғайтылды.
Flexsteel бизнесі тұрғын үй нарығындағы жағдайға және тұтынушылық белсенділікке тәуелді. Негізгі тәуекелдер тұрғын үй секторындағы әлсіз ахуалдың сақталуымен, сұраныстың төмендеуімен, сондай-ақ шикізатқа, логистикаға және импорттық жеткізілімдерге кететін шығындардың өсуімен байланысты. Freedom Broker-дің FLXS акциясы бойынша алдағы 12 айға арналған мақсатты бағасы — 72 АҚШ доллары.

 

Fastly (FSLY) — бұлтты сервистер провайдері. Компанияның инвестициялық тартымдылығы IT қауіпсіздігі мен бұлтты қызметтер саласындағы жоғары маржалы шешімдерді белсенді енгізуімен байланысты. Бұл табыстылық пен еркін ақша ағынының өсуіне ықпал етеді. Өсудің негізгі драйверлері қатарында киберқауіпсіздік шешімдеріне сұраныстың тұрақты артуы, жасанды интеллектпен және стримингтік бейнемен байланысты деректер трафигі көлемінің ұлғаюы бар. Өнім желісін кеңейту арқылы Fastly операциялық тиімділікті және бір клиенттен түсетін орташа табысты біртіндеп арттырып келеді. Негізгі тәуекелдер ең ірі бұлтты қызмет жеткізушілер тарапынан жоғары бәсекелестікпен, жаңа өнімдерді енгізу қарқынының баяулау ықтималдығымен және интернет-трафик көлемінің төмендеуіне бизнестің сезімталдығымен байланысты. Freedom Broker-дің FSLY акциясы бойынша алдағы 12 айға арналған мақсатты бағасы — 27 АҚШ доллары.

 

Aehr Test Systems (AEHR) — чиптерге арналған пластиналарды сынақтан өткізетін жабдықтарды әзірлеуші компания. Оның шешімдері саладағы компанияларға шығындарды азайтуға және өнім сапасын арттыруға мүмкіндік береді. Компанияның инвестициялық тартымдылығын тапсырыстардың рекордтық көлемі қолдайды, бұл болашақ табыстың жоғары деңгейде болжамдылығын қамтамасыз етеді. Өсім драйверлерінің қатарында жасанды интеллектке арналған процессорлар өндірушілерімен, сондай-ақ кремний фотоникасы саласындағы компаниялармен ынтымақтастық арқылы бизнесті әртараптандыру бар. Aehr компаниясының өндірістік моделі шығарылым көлемін күрделі шығындарды (капиталдық салымдарды) елеулі арттырмай көбейтуге мүмкіндік береді, бұл өз кезегінде пайданы өсіруге ықпал етеді. Тәуекелдер жартылай өткізгіштер саласының циклдік сипатына, ірі тапсырыс берушілердің жоғары шоғырлануына және олардың инвестициялық жобаларын іске асыру мерзімдеріне қатысты белгісіздікке байланысты. Freedom Broker-дің AEHR акциясы бойынша алдағы 12 айға арналған мақсатты бағасы — 110 АҚШ доллары.