Материал Қазақстан Республикасының «Қазақстан Республикасының мемлекеттік қызметі туралы» және «Сыбайлас жемқорлыққа қарсы іс-қимыл туралы» заңдарының негізінде дайындалды.
Мемлекеттік қызметші деген кім?
ҚР «Қазақстан Республикасының мемлекеттік қызметі туралы» заңының 1-бабына сәйкес, мемлекеттiк қызметшi – Қазақстан Республикасының заңнамасында белгiленген тәртiппен саяси, сайланатын және әкімшілік мемлекеттік қызметшілер лауазымдарының тізілімінде көзделген мемлекеттiк лауазымды атқаратын және мемлекеттiң функциялары мен мiндеттерiн iске асыру жөніндегі лауазымдық өкiлеттiктерді жүзеге асыратын Қазақстан Республикасының азаматы.
Бұл ретте оның еңбегіне ақы республикалық немесе жергілікті бюджет қаражаты, Қазақстан Республикасының Ұлттық Банкі және (немесе) заңсыз иемденген активтерді мемлекетке қайтару туралы заңнамада айқындалған Арнайы мемлекеттік қор қаражаты есебінен төленедi.
Мемлекеттік қызметшілер үшін қандай шектеулер қолданылады?
«Қазақстан Республикасының мемлекеттік қызметі туралы» ҚР заңының 14-бабына сәйкес, мемлекеттік қызметшіге, сондай-ақ мемлекеттік лауазымда көзделген міндеттерді уақытша атқаратын адамға бағалы қағаздар сатып алуға тыйым салынады.
Шектеулер өзге тұлғаларға да қолданыла ма?
Иә. «Сыбайлас жемқорлыққа қарсы іс-қимыл туралы» ҚР заңының 13-бабында бірқатар басқа санаттағы тұлғалар үшін де осындай шектеулер белгіленген.
Атап айтқанда, шектеулер мына тұлғаларға:
- жауапты мемлекеттік лауазымды атқаратын адамдарға;
- мемлекеттік функцияларды орындауға уәкілеттік берілген адамдарға;
- лауазымды адамдарға;
- өкілеттігін кәсіби тұрақты негізде жүзеге асыратын аумақтық сайлау комиссияларының мүшелеріне;
- Қазақстан Республикасы Ұлттық Банкі мен оның ведомстволарының қызметшілеріне;
- авиация саласындағы уәкілетті ұйымның қызметшілеріне;
- қаржы нарығы мен қаржы ұйымдарын реттеу, бақылау және қадағалау жөніндегі уәкілетті органның қызметшілеріне;
- ұлттық басқарушы холдингтерде, ұлттық холдингтерде, ұлттық компанияларда, ұлттық және өңірлік даму институттарында, олардың еншілес ұйымдарында қызметін жүзеге асыратын, мемлекеттік функцияларды орындауға уәкілеттік берілген адамдарға теңестірілген адамдарға қолданылады.
Көрсетілген санаттағы тұлғаларға да заңнамада көзделген ерекшеліктерді ескере отырып, бағалы қағаздарды сатып алуға шектеулер белгіленген.
Қарастырылған ерекше жағдайларға сәйкес қандай бағалы қағаздарды сатып алуға болады?
Заңнамада жекелеген жағдайларға қатысты ерекшеліктер бар.
Заңнамада белгіленген тәртіппен сатып алуға және (немесе) өткізуге рұқсат етіледі:
- ашық және аралық пайлық инвестициялық қорлардың пайларын;
- облигацияларды;
- коммерциялық ұйымдардың жай акцияларын — тиісті ұйымның дауыс беретін акцияларының жалпы санының 5%-ынан аспайтын көлемде.
Маңызды
Бұл материал ақпараттық мақсатта дайындалды. Әрбір нақты жағдайда жұмыс орныңыздағы заң қызметіне немесе қызметкерлерді басқару қызметіне жүгініп, түсіндірме алуға кеңес береміз. Компания мемлекеттік қызметшілердің әрекеттерінің заңдылығына қатысты консультация бермейді.