Сплит (split) бұл — эмитент-компанияның тарапынан болатын корпоративтік әрекет, мұндай әрекетті орындағанда акциялардың саны ұлғайып, ал акциялардың бағасы өскен санға тепе-тең төмендейді.
Бұл ретте бизнестің жалпы нарықтық құны өзгермейді. Бірақ бір акцияның бағасы бірнеше есеге төмен немесе жоғары болуы мүмкін.
Мұндай акцияларды ұстайтын инвестор одан ақшасын жоғалтпайды да, табыс таппайды да, оның салымдарының құны бұрынғы күйінде қалады.
Бірақ, егер компания акцияларды бөлшектеп тастаса және олар бірнеше есеге арзандаса, көп адам оларды сатып ала алады.
Акцияларды бөлудің екі түрі бар: Бағалы қағаздарды кері және тікелей бөлу (сплит).
Тікелей сплитте (split) акциялардың саны артады, әр акцияның бағасы төмендейді. Тікелей сплитті әдетте акциялардың бағасы тым жоғары болған кезде жүргізеді және компания оларды жаңа инвесторлар үшін қол жетімді еткісі келеді.
Мысалы: компанияның әрқайсысының құны 1000 АҚШ доллары тұратын 1000 акциясы болды. Компания 10:1 сплит өткізді, енді оның әрқайсысының құны 100 АҚШ доллары тұратын 10 000 акциясы бар.
Кері сплитте (reverse split) акциялардың саны азаяды және әр акцияның бағасы өседі. Кері сплитті әдетте акциялары төмен деңгейде саудаланатын компаниялар жиі пайдаланады, өйткені акциялар тым арзан болған кезде, олар акцияларды баға бойынша таңдау өлшемшарты бар инвесторлар үшін тартымды болмауы мүмкін.
Мысалы: компанияның бір данасының құны 1 АҚШ доллары тұратын 100 000 акциясы болды.
Компания 1:10 сплит өткізді, енді оның әрқайсысының құны 10 АҚШ доллары тұратын 10 000 акциясы бар.