Финансист №1 (41) 2026

Macy’s (M) тарихы 1858 жылы басталды. Сол кезде Роуленд Хасси Мэйси Нью-Йоркте мата, киім-кешек, галантерея және тұрмыстық таурлар сататын дүкен ашты.  Жаңа нүктенің алғашқы күнгі табысы небәрі  $11 шамасында болды, ал бір жыл ішінде айналым $85 мың доллардан асып түсті.

Қарапайым дүкеннен қала символына дейін

Бренд жылдам танымал болды, бұған оның айрықша нышаны да әсер етті. Логотиптегі қызыл жұлдыз — Мэйси жас кезінде теңіз сапарлары барысында салдырған татуировканың көшірмесі.

Сән индустриясы үшін тек тауардың өзі ғана емес, оны сатып алу тәжірибесі де маңызды. АҚШ‑та әмбебап дүкендер көп жылдар бойы «қалалық сахна» рөлін атқарды. Дүкен витриналары мен маусымдық безендірулер мереке атмосферасын тудыратын. Macy’s алғашқылардың бірі болып «әсер мәдениетіне» басымдық берді: дүкен шабыттандыруы, таңдау жасауға көмектесуі және қарапайым сауда сапарын жағымды әрі есте қаларлық оқиғаға айналдыруы тиіс еді.

Мұны 1924 жылы Нью‑Йоркте алғаш рет өткізілген парад айқын көрсетеді — ол мерекелік сауда маусымының басталуына орай ұйымдастырылған болатын. Уақыт өте келе парад ұлттық дәстүрге айналып, брендтің басты қоғамдық элементтерінің біріне айналды. Мұндай форматтар жұмсақ PR ретінде жұмыс істейді: олар нақты тауарды сатпайды, бірақ адамдардың бір дүкенге қайта‑қайта келу әдетін қалыптастырады, брендке деген сенімді нығайтады және оны қалалық өмірдің ажырамас бөлігі ретінде қабылдауға ықпал етеді.

Шопинг. XXI ғасыр

Егер Macy’s брендіне «әйелдер және бизнес» тұрғысынан қарасақ, онда желінің ондаған жылдар бойы әйел сатып алушылармен байланыс қалыптастыруынан бастау қисынды. Әйелдер аудиториясы киім, аяқ‑киім, косметика, сыйлықтар мен үйге арналған тауарлар сияқты негізгі санаттардағы сұранысты айқындауда маңызды рөл атқарды.

Сатып алушы үшін сауда залында оңай бағдарлау мүмкіндігі, ұнатқан заттарын жайлы жағдайда киіп көру және дұрыс таңдау жасау өте маңызды. Әмбебап дүкен клиентке образ жинауға, сыйлық таңдауға немесе «дұрыс» нәрсені табуға көмектесе алғанда ұтады — тұтынушы шексіз ассортименттің ортасында жалғыз қалғандай сезінбеуі тиіс.

2020‑жылдары тұтынушылық әдеттер өзгерді. Интернет таңдау өрісін кеңейтті, шопинг жылдамырақ әрі ыңғайлырақ болды. Ал дәстүрлі «шыны мен бетоннан» салынған дүкендерге өз бизнес тәсілдерін қайта қарауға тура келді. Осындай жағдайда Macy’s A Bold New Chapter («Жаңа шешімді кезең») стратегиясын ұсынды. Оның басты екпіні — клиенттік тәжірибені жаңарту және ассортиментпен нүктелік жұмыс жүргізу. Компания тиімсіз дүкендерді жауып, флагмандық нүктелерді күшейту арқылы сауда нүктелерін оңтайландырды. Бұл ресурстар мен назарды шашыратпай, тиімді бағытта жұмсауға мүмкіндік берді, нәтижесінде әйелдер аудиториясы үшін бренд одан да тартымды бола түсті.

Әйелдерге тән ерекшеліктер

Macy’s бренді туралы сатып алушыларда қалыптасатын көзқарасқа компанияның әйел топ‑менеджерлері мен тәуелсіз директорлары да елеулі ықпал етеді.

Америкалық ритейл саласындағы алғашқы әйел‑басшылардың бірі — Маргарет Глетчелл. Ол Macy’s компаниясындағы мансабын қарапайым кеңсе қызметкері ретінде бастаған, ал 1866 жылы әмбебап дүкеннің басқарушысы қызметіне дейін көтерілді.

Маркетинг дивизионының басшысы Шэрон Оттерман брендтің танымалдылығын арттыратын және медиялық тарихын қолдайтын науқан үшін жауап береді. Мерчендайзинг секторын басқаратын Ната Двир дүкендердегі ассортимент логикасын және тауарлардың орналасуын қалыптастырады. Оның кәсіби тәжірибесінде косметика мен сұлулық индустриясындағы жұмыс ерекше атап өтіледі, ал бұл салаларда брендке деген сенім, сапалы сервис және мерчендайзинг аса маңызды. Macy’s директорлар кеңесіне тәуелсіз өкіл ретінде Эмили Арель енеді — Mitchell & Ness Nostalgia Co. президенті, көпарналы ритейл және клиенттік тәжірибені қалыптастыру саласында мол тәжірибесі бар маман.

Macy’s‑тің күші тек тарихы мен символдарында ғана емес, сонымен бірге сатып алуды жағымды әрі мәнді эмоцияларға айналдыра білу қабілетінде. Нарық өзгеріп жатқан кезде өз клиентін тыңдай білетіндер ұтады. «Қызыл жұлдыз» үшін мұндай ресурс — сатып алушылармен, әсіресе әйел аудиториясымен, ассортименттің әртүрлілігі, коммуникациялар, эксклюзивті витрина дизайны және бірінші деңгейлі қызмет көрсету арқылы орнатылатын байланыс.