Финансист №1 (41) 2026

Америкалық Мэри Барра General Motors автоконцернінің тізгінін қолына алған кезде, компания айтарлықтай сенім дағдарысын бастан кешкен еді: бірқатар көліктерінде апатқа ұшыратқан ақаулар анықталды. Әйел басшы өндірісте ауқымды өзгерістер жүргізіп қана қоймай, саланың тарихында алғаш рет автокөлік қауіпсіздігі мәселелері туралы ашық әңгіме бастады. Сол уақыттан бері GM акциялары екі еседен астам өсті, ал Барраның өзі әлемдегі ең ықпалды және ең дәулетті әйелдердің бірі атанды.

Осындай жағдай технологиялық секторда да орын алды. Лиза Су микрочип өндірушісі Advanced Micro Devices компаниясының атқарушы директоры болған кезде, компания банкроттықтың аз-ақ алдында тұрған еді. Бүгінде AMD — әлемдік жартылай өткізгіш индустриясының флагмандарының бірі, ал оның капитализациясы сол кезден бері 130 еседен астам өсіп, $338 млрд деңгейіне жетті.

Мұндай мысалдар әйелдер бас директор креслосына отырған кезде трансформацияның жетекшісіне айналатынын, жаңа технологиялық шешімдер табатынын және бұрын қолжетімсіз болып көрінген нарықтарды аша алатынын көрсетеді.

Соңғы жылдардағы зерттеулер бұл үрдісті растап отыр. Әйелдер басқаратын бизнес көбіне неғұрлым тұрақты өсім көрсетеді және жоғары табыс әкеледі. Бұдан бөлек, әйелдер басқаратын әлемдік капитал көлемі де қарқынды өсіп келеді, және сарапшылардың бағалауынша, оның үлесі алдағы уақытта да ұлғая бермек.

Тағы бір назар аударарлық маңызды дерек: АҚШ та бүгінде он әйелдің жетеуі инвестициямен айналысады. Алайда олардың көпшілігі әлі де өздерінің қаржылық құзыретін, әсіресе ерлермен салыстырғанда, төмен бағалауға бейім. Бұл парадокс қазіргі экономиканың жағдайын айқын көрсетеді: бизнестегі және инвестициялардағы әйелдердің рөлі туралы қоғамдық түсінікке қарағанда, олардың бұл салалардағы ықпалы әлдеқайда жылдам өсіп келеді.

Сіз қолыңызда ұстап отырған «Финансист» журналының осы саны дәл осындай өзгерістерге арналған. Бұл шығарылымда біз салаларды өзгертіп жатқан әйелдер туралы айтамыз: қаржы мен технологиялардан бастап, кәсіпкерлікке, талдау және креатив индустрияларына дейінгі салалар. Журналда түрлі форматтар жинақталған: өмірбаяндар, талдау материалдары, зерттеулер және сұхбаттар. Оларды біріктіретін бір идея бар: қазіргі таңда әйелдер қолынан бәрі келеді.

Ықылыспен оқыңыздар!