Инвестициялық шолу №350. Бағдардың өзгеруі

Alphabet

Alphabet (GOOGL) сәтті тоқсандық қаржылық есебін жариялады. Жалпы нәтижеге негізгі оң үлесті Google Cloud бөлімшесі қосты. Оның түсімі жылдық есеппен 82%-ға өсіп, 24,8 млрд АҚШ долларына жетті, операциялық пайдасы үш еседен астам ұлғайып, 8,8 млрд долларды құрады, маржасы 20,7%-дан 35,6%-ға дейін артты, ал орындалмаған тапсырыстар көлемі (backlog) 514 млрд долларға жетті. Көрсеткіштердің өсуіне корпоративтік жасанды интеллект шешімдері мен инфрақұрылымына жоғары сұраныс, сондай-ақ клиенттерге TPU жүйелерін жеткізудің басталуы ықпал етті. Алайда есептеу қуаттарын кеңейтуге бағытталған инвестициялар осы оң нәтижелердің барлығын жоққа шығарды. CAPEX бойынша жоспарлар шамамен екі есеге ұлғайтылып, 44,9 млрд долларға дейін көтерілді, соның салдарынан еркін ақша ағыны 5,3 млрд доллардан минус 5,9 млрд долларға дейін төмендеді. Alphabet 2026 жылға арналған капиталдық инвестициялар жоспарын 195-205 млрд доллар аралығына дейін арттырды және бұл шығындарды 2027 жылы да көбейтуді көздеп отыр. Осылайша, бұлтты бизнес табыстарының әсерлі өсу қарқыны жасанды интеллект инфрақұрылымына жұмсалатын ауқымды шығындардың көлеңкесінде қалды.

Прогноз менеджмента по CAPEX на 2026 год
Дереккөз: FactSet

Lockheed Martin

Lockheed Martin (LMT) екінші тоқсан бойынша кіріс пен пайда жағынан консенсус-болжамнан жоғары нәтижелер көрсетті. Компания өзінің жылдық болжамын да жақсартты. Түсім жылдық есеппен 11%-ға өсіп, 20,1 млрд АҚШ долларына жетті, ал түзетілген бір акцияға шаққандағы пайда (EPS) 7,9 долларды құрады. Көрсеткіштердің сенімді өсуі ішінара өткен жылғы ірі есептен шығарулардан кейінгі төмен базаның әсерімен байланысты болды. Есептің негізгі оң тұсы 65 млрд доллар көлеміндегі тапсырыстардың рекордтық ағыны болды. Компанияның тапсырыстар портфелі 230,4 млрд долларға жетіп, болашақ түсімдердің жоғары деңгейде болжануына мүмкіндік береді. Кірістердің өсуіне негізгі үлесті THAAD, PAC-3 және Precision Strike Missile бағдарламалары қосты. Өсу қарқыны бойынша Missiles and Fire Control бөлімшесі көш бастады: оның түсімі 19%-ға, ал операциялық пайдасы 24%-ға артты. Ал Aeronautics сегментінде керісінше теріс динамика байқалды. F-35 жойғыш ұшақтарының жеткізілімі өткен жылғы 50 бірліктен 19 бірлікке дейін қысқарды.

Болжамның жақсартылуы тұрақты сұранысты растайды, дегенмен алдағы өсім F-35 ұшақтарына деген сұранысқа және жинақталған тапсырыстар портфелін орындаудан түсетін кірістерге байланысты болады.
LMT акциясы бойынша мақсатты баға – 628 АҚШ доллары, рейтинг – «сатып алу».

Lockheed Martin акцияларының S&P 500 индексіне қатысты динамикасы
Дереккөз: FactSet

American Express

American Express (AXP) 2026 жылдың екінші тоқсаны бойынша нәтижелерін жалпы алғанда нарық күткен деңгейде жариялады. Резервтерге аударымдардың көлемі жағымды тосынсый болды, алайда салық жүктемесінің күшеюі EPS өсімін шектеді.

Менеджмент кобрендтік карталар портфелін сатудан кейінгі қысымға қарамастан, жылдық түсім бойынша болжамын сәл жақсартты. Сонымен қатар, EPS бойынша бағдар өзгеріссіз қалдырылды. Бұл компанияның клиенттік базаны кеңейту және клиенттердің тәжірибесін жақсарту мақсатында технологияларға, маркетингке және халықаралық экспансияға инвестицияларды ұлғайту жоспарын көрсетеді. Ұзақ мерзімді перспективада менеджмент бұрынғыдай түсімнің жылына 10%-дан жоғары, ал EPS-тің шамамен 15% деңгейінде өсуіне бағдар ұстап отыр. Қосымша оң драйвер депозиттік өнімдерді дамыту болуы мүмкін, өйткені қазіргі уақытта АҚШ-тағы American Express карталарын ұстаушылардың шамамен 10%-ында ғана осы компанияның депозиттік шоттары ашылған. Есеп жарияланғаннан кейін American Express акциялары 4%-дан астам төмендеді. 

Бұған инвестициялардың ұлғаюы жағдайында EPS бойынша болжамның өзгеріссіз қалдырылуы себеп болуы ықтимал. Компанияның форвардтық P/E көрсеткіші жыл басындағы 21x деңгейінен 17,5x деңгейіне дейін төмендеді.

Түсім мен EPS динамикасы
Дереккөз: FactSet, Freedom Broker талдауы

Intel

Intel (INTC) компаниясының екінші тоқсандағы нәтижелері өзінің болжамдарынан да, нарықтың орташа күтулерінен де жоғары болды. Түсімнің өсу қарқыны соңғы 15 жылдан астам уақыттағы ең жоғары деңгейге жетті, бұл негізінен серверлік сегменттің есебінен қамтамасыз етілді. Жасанды интеллект инфрақұрылымы тарапынан сұраныс ұсыныстан тұрақты түрде асып түсуде.

Компания табысты өндіріс көлемін арттыру арқылы емес, негізінен бағалардың өсуі мен сатылым құрылымының өзгеруі арқылы көбейтуде. Клиенттік бизнес сегментінде жеткізілімдер азайып жатыр, ал өндірістік қуаттардың бір бөлігі әдейі серверлік процессорлар өндірісіне қайта бағытталуда. Intel 18A технологиялық процесі компанияның ішкі жоспарларынан озық қарқынмен дамып келеді, ал 14A жобасы жоспарға сай іске асырылуда. Алайда қатарынан екінші тоқсан компания жаңа технологиялық процестердің тапсырыс берушілері туралы мәлімет жарияламай отыр, бұл негізгі белгісіздік факторы болып саналады. Үшінші тоқсанға арналған болжам мен жоспарланған CAPEX көлемі консенсус-болжамнан жоғары болды. Сонымен қатар жаңа өндірістік қуаттарға деген сұранысқа қатысты айқындықтың болмауы және негізгі бизнес сегменттеріндегі нарық үлесінің қысқаруы негізгі мәселелер ретінде қабылдануда.

Тоқсандық есеп жарияланғаннан кейінгі күні, 24 шілдеде, INTC акцияларының бағасы 2,4%-ға төмендеді.

Intel Corp. (INTC) компаниясының негізгі қаржылық көрсеткіштері.
Дереккөз: Intel, FactSet, Freedom Broker.

AT&T, Verizon, T-Mobile, Comcast, Charter

АҚШ-тағы ең ірі сымсыз байланыс операторлары екінші тоқсанда тұрақты сұраныс арқасында түсім мен EBITDA көрсеткіштерін жақсартты. Тұрақты байланыс операторлары дәстүрлі кең жолақты интернет (ШПД) пен бейнесервистер сегментінде теріс динамиканы сақтап отыр, алайда оны мобильді қызметтердің жылдам өсуі ішінара өтейді.

Есепті кезеңде AT&T (T) компаниясының шоғырландырылған түсімі жылдық есеппен 2,3%-ға өсіп, 31,6 млрд АҚШ долларына жетті. Advanced Connectivity сегментіндегі түсім 5,1%-ға артып, 23,5 млрд долларды құрады. EBITDA 8%-ға өсіп, 12,0 млрд долларға жетті. Интернетке қосылған жаңа абоненттер саны 646 мың болды. Еркін ақша ағыны (FCF) 4,7 млрд долларға жетті, ал 2026 жылға арналған осы көрсеткіш бойынша болжамның төменгі шегі 18 млрд доллар деңгейінде расталды. Компания борыштық жүктемені азайтуды жалғастырды.

Verizon (VZ) компаниясында Mobility & Broadband бағытының түсімі жылдық есеппен 2,8%-ға өсті, ал кең жолақты интернет абоненттерінің базасы 348 мыңға артып, 17,1 млн-ға жетті. Постпейд тарифтерінің пайдаланушылары 550 мыңға көбейді. Түзетілген EBITDA рекордтық 13,7 млрд долларға жетті, маржа 40,1%-ды құрады (+7,2% ж/ж). Таза пайданың төмендеуіне қарамастан, компания еркін ақша ағынының (FCF) өсу болжамын жылдық есеппен 9-10%-ға дейін көтерді.

T-Mobile (TMUS) компаниясының түзетілген EBITDA көрсеткіші жылдық есеппен 12%-ға өсіп, 9,5 млрд долларға жетті. Бұған түсімнің екі таңбалы өсімі, сондай-ақ постпейд тарифтері мен тіркелген сымсыз интернетке қолжетімділік (FWA) қызметтерінен түсетін кірістердің артуы ықпал етті. Компания EBITDA бойынша 37,1-37,5 млрд доллар көлеміндегі болжамын растады және түзетілген FCF бойынша бағдарын 18,4-18,8 млрд долларға дейін көтерді.

Ал Comcast (CMCSA) және Charter (CHTR) компанияларында кең жолақты интернет қызметтерін пайдаланушылар саны тиісінше 167 мыңға және 172 мыңға қысқарды. Comcast компаниясының кабельдік телевидение абоненттері саны 280 мыңға азайды.

Charter 2,9 млрд доллар көлеміндегі CAPEX жоспарын, сондай-ақ желіні жаңғырту және мобильді бизнесін дамыту стратегиясын растады.

 

2026 ж. II тоқсандағы байланыс қызметтері кірісінің динамикасы
Дереккөз: компаниялардың деректері
Ескертпе: AT&T үшін — Advanced Connectivity сегментінің өсімі; T-Mobile — қызметтік түсім; Verizon — Mobility & Broadband; Comcast — Connectivity & Platforms; Charter — жиынтық түсім.