Инвестициялық шолу №351. S&P 500 жаңа максимумдарда

2026 жылдың екінші тоқсанындағы есеп беру маусымы Уолл-стрит үшін статистикалық аномалияға айналды. Тамыздың ондарына қарай сол сәтте есеп берген S&P 500 құрамындағы компаниялардың 89%-ының пайда өсімі ковидтен кейінгі 2021 жылдан бергі максималды 50,4%-ды құрады. Болжамдардан эмитенттердің 85%-дан астамы асып түсті (бес жылдық орташа үлес 78% болған), ал 29% көлеміндегі жиынтық «сюрприз» FactSet-тің 2008 жылдан бергі бүкіл бақылау тарихындағы рекордтық көрсеткіш болды. Жалпы нарық индексі бұл динамикаға 14 шілдеден бастап шамамен 3%-дық өсіммен жауап беріп, 7760 тармақ аймағында өзінің тарихи максимумын жаңартты.

Бұл ретте ағымдағы маусымдағы аталған ауытқулардың барлығын тек екі-ақ компания қамтамасыз етті. Alphabet (GOOGL) компаниясының акцияға шаққандағы пайдасы (EPS) акциялар портфелін іске асырылмаған қайта бағалаудан түскен $98 млрд есебінен $9,11-ді құрады  (консенсус: $2,88).  Корпорация негізгі ставканы Anthropic (ЖИ-лаборатория, Claude тілдік ЖИ-модельдер отбасының иесі) және SpaceX (SPCX) компанияларына жасады. Өз кезегінде, Amazon (AMZN) компаниясының EPS көрсеткіші Anthropic-тегі үлесін қайта бағалаудан түскен $53,4 млрд-тың арқасында $5,75-ке жетті (консенсус:  $1,82).

Маусым айының соңынан бастап S&P 500 индексінің долларлық пайдасы өсімінің 71%-ы Alphabet пен Amazon-ға тиесілі болды.  Олардың үлесін есепке алмағанда, бұл көрсеткіш болжамдардан тек 10,9%-ға ғана асып түсіп, 32%-ға ұлғайды, дегенмен бұның өзін де күшті нәтиже деп танымасқа болмайды. Бенчмаркке кіретін барлық секторлар бойынша түсім өсімі 2021 жылдың соңынан бергі максималды 15,3%-ды құрайды.

Пайданың төмендеуін тек денсаулық сақтау индустриясы көрсетті. Оған Gilead Sciences (GILD) компаниясының M&A мәмілелерінен қалған балласты біржолғы есептен шығаруы қысым жасады. Чипмейкерлердің (чип өндірушілердің) түсімі есепті кезеңде 77%-ға ұлғайды, ал пайдасы 135%-ға шарықтады. Мұнайдың бір жыл бұрынғы $63,68-ге қарсы орташа бағасы $92,55 құрауының арқасында энергетика секторында пайда 146%-ға көтерілді. S&P 500-дің таза маржасы 2009 жылдан бергі рекордтық 16,9%-ға жетті және тіпті Alphabet пен Amazon-ды есепке алмағанда да қомақты 15%-ды құрады.

Тұрақты инфляция және шілде айында жұмыспен қамтудың күтпеген жерден қысқаруы ФРЖ-ның қыркүйекте мөлшерлемені көтеру ықтималдығын бағалаудың екі есе төмендеуіне алып келді. Алайда, нарықтың бұл жаңалықтардың барлығына реакциясы өте ұстамды көрінеді. Компания болжамдардан асып түскен жағдайда, оның акциясы өткен жылдардағы 1%-ға қарсы орташа есеппен 0,4%-ға ғана көтеріледі. Іс жүзінде, бұл позитивтің бір бөлігі котировкаларға алдын ала енгізіліп қойған, дегенмен бұл биржа ойыншыларының консерватизмін ақтамайды.

Russell 2000 жыл басынан бері 22,3%-ға өсті, ал мегакаптар (аса ірі капиталдандыруы бар компаниялар) тек 9,9%-ға ғана артты. Үшінші тоқсанға арналған пессимистік болжамдарды бес жылдық орташа үлес 58%-ға қарсы эмитенттердің тек 33%-ы ғана берді. Жағдайдың парадоксы сол, нарық бұл өсім барысында арзандап жатыр. S&P 500 қаңтардан бастап 13%-ға көтерілді, ал оның болжамды P/E көрсеткіші 22,2х-тен 20х-ке дейін төмендеді. Бұл ФРЖ мөлшерлемені 25 б.п.-ға көтерген жағдайда да раллидің кеңеюіне үміт артуға мүмкіндік береді. Нақты тәуекелді тек пайда бойынша бағдарлардың төмен қарай қайта қаралуы ғана тудырады.

Бұл өмір мерекесінің қашан аяқталатынын айту қиын, бірақ мұндай нарықтан тіпті ең консервативті инвесторлардың да шықпағаны жөн. Кейбір сәтте күтілімдер тым жоғары болып кетуі мүмкін екендігіне қарамастан, қазіргі уақытта бар мүмкіндіктерді жіберіп алмау анық қажет. SPDR S&P 500 ETF Trust (SPY) қорына ұзақ мерзімді инвестиция салу тамыз айының ортасы үшін барынша негізделген шешім болып қала береді. Сондай-ақ, Dell Technologies (DELL), Hilton Worldwide (HLT), Hyatt Hotels (H), Optex Systems (OPXS), Onto Innovation (ONTO) және Robinhood Markets (HOOD) қағаздарын сатып алуды ұсынатын біздің сарапшылардың қысқа мерзімді идеяларын қарастыруға болады.