Инвестициялық шолу №351. S&P 500 жаңа максимумдарда

Акциялар мен ЖДҚ динамикасы

 

KASE Индексі динамикасы, 1 жыл

 

USD/KZT динамикасы, 1 жыл

 

KASE котировкалары 31 шілдеде соңғы екі айдағы өсімге қарай ең күшті техникалық сигналды көрсетті. Қарастырылып отырған екі апта ішінде 12 сессияның 11-і плюспен аяқталды.  Бұл жағдайда есеп беру маусымы алғашқы триггер болмады, ол Kaspi.kz нәтижелері жарияланғаннан кейін импульсті күшейте түсті.  Осы тұста жергілікті нарықтың негізгі бенчмаркі жаңа тарихи максимумдарға жетті. Біз акциялар үшін көптеген нүктелік позитивті драйверлерді көріп тұрған жоқпыз.  Сатып алушылардың белсенділігінің терең себебі — KASE маусым-шілде айларындағы «тоқыраудан» кейін тамызда өсе бастайтын нарық қозғалысының маусымдық сипаты болуы әбден мүмкін.  Бұған қоса, шілде айының соңына қарай болған түзетуден кейін қазақстандық компаниялардың акциялары инвестициялау үшін қайтадан тартымды болды деп есептейміз.

KASE шілденің аяғы — тамыздың басында Банк ЦентрКредит акцияларының қолдауымен жоғары қарай бұрылды. Екі апта ішінде эмитенттің қағаздары 6,4%-ға қымбаттады, бұл нарықтағы ең жоғары нәтиже емес еді, бірақ ұзақ уақытқа созылған бүйірлік трендтен кейін олардың жоғары қарай серпілуі нарықты жандандырды. Әрі қарай раллиге Қазақтелеком қағаздары қосылды, олар ұзағырақ өсім кезеңін көрсетіп, компанияның кеңсе штатын айтарлықтай қысқарту туралы жаңалықтар аясында наурыздағы максимумдарға жетті.  

Кейін Қазатомөнеркәсіп бағалы қағаздарын сатып алушылар белсенділік танытты. Оның ЖДҚ баға белгілеулердің көтерілуіне Фибоначчи бойынша $62,3 қолдау деңгейіне жетуі бастапқы нүкте болды. Олар үш көлденең қарсылық деңгейін, сондай-ақ 50, 100 және 200 күндік жылжымалы орташа мәндерді бұзып өтіп, төмендеу үрдісін бұзды.  Сонымен қатар, уран бағасы да өсіп, тамыздың екінші онкүндігінің басына қарай ақпан айындағы максимумдарға қайта оралды. 

Халық банкінің акциялары да жоғары қарай жылжыды, оның LSE-дегі ЖДҚ-лары сәуірдегі шыңдарға айтарлықтай жақын тұр. 

Kaspi.kz котировкалары тоқсандық есептілікке және дивидендтің 1000 теңгеге дейін өсуіне оң жауап берді. Тиісті ұсыныс 9 қыркүйекте өтетін АКЖЖ тарапынан жоғары ықтималдықпен бекітіледі, нәтижесінде финтех акцияларының ағымдағы жылдағы дивидендтік кірістілігі 12 тамыздағы жабылу бағасына қарай 8,4%-ға дейін артады. Эмитенттің екінші тоқсандағы есебін алдын ала бірқалыпты позитивті деп атауға болады. Компания, әсіресе e-commerce және fintech сегменттерінде күшті операциялық көрсеткіштер көрсетті.  Сонымен қатар, қорландырудың жоғары құны мен Түркиядағы инвестициялар маржаға қысым жасауды жалғастырды.  Kaspi.kz түсімі 15%-ға өскен кезде, оның EBITDA көрсеткіші тек 5%-ға ғана ұлғайды.

Теңге долларға қысым жасауды жалғастырып, оны шілде айындағы деңгейден төмен ығыстырды. Дегенмен, осы шолу жазылған сәтте американдық валютаны сатып алушылар белсенді түрде қарсылық көрсетіп, USD/KZT жұбының 466 деңгейінен төмен бұзып өтуіне жол бермеді.

Маңызды жаңалықтар

Украина КҚК нысандарына шабуыл жасауды тоқтатуға келісті. Bloomberg мәліметтері бойынша, АҚШ Киевтің Қара теңіздегі КҚК теңіз терминалы ауданындағы мұнай танкерлері мен инфрақұрылымына шабуылдарды тоқтату туралы келісіміне қол жеткізді.  Келісім шілде айындағы бірқатар соққылардан кейін жасалды, соның салдарынан мұнай тиеу жұмыстары бірнеше рет уақытша тоқтатылған болатын.  Украина кеме иелерінің қауіпсіз өту үшін қажетті мәліметтерді беруі мақсатында байланыс нүктелерін құрды. Қазақстан үшін бұл айтарлықтай позитивті жаңалық: КҚК айналасындағы әскери тәуекелдердің төмендеуі мұнай экспортындағы іркілістердің ықтималдығын азайтады.

Air Astana 2026 жылдың екінші тоқсанын $0,1 млн шығынмен аяқтады. Бұл ретте, бір жыл бұрын авиатасымалдаушы $18 млн көлемінде пайда тіркеген еді. Есепті кезеңде компанияның түсімі 18,3%-ға өсіп, $433 млн-ға жетті, бірақ EBITDAR көрсеткіші 3,7%-ға төмендеп, $93,6 млн-ды құрады. Жанар-жағармай бағасының жоғарылауы, теңгенің нығаюы және Pratt & Whitney қозғалтқыштарына жұмсалған қосымша шығындар салдарынан бұл көрсеткіштің маржасы 26,5%-дан 21,6%-ға дейін қысқарды.

Ұлттық банк тамыз айына жоспарланған валюталық операциялар туралы хабарлады. Реттеуші айдың соңына дейін Ұлттық қордан бюджетке қаражат түсуін қамтамасыз ету үшін $200–300 млн сатуды көздеп отыр.  Шілде айында бұл сатылымдардың көлемі $200 млн-ды құраған болатын. Ұлттық қордан алынған $500 млн мемлекеттік қазынаға берілу үшін жыл соңына дейін теңгеге біркелкі конвертацияланады. Сонымен қатар, БЖЗҚ өзінің портфельдік қажеттіліктері үшін $375 млн сатып алды.

Күтулер мен стратегия

Алдыңғы шолуда біз қазақстандық қор алаңдарында консолидацияның жалғасып жатқанын атап өтіп, екінші тоқсандағы корпоративтік нәтижелердің жариялана бастауымен сатып алушылардың жандануын болжаған болатынбыз. Нарықтың жоғары қарай серпілісі ертерек орын алды, сондықтан басталып жатқан есеп беру маусымының нарыққа қосымша позитивті әсер ету мүмкіндігі бар. Бірқатар негізгі қағаздардың өсу әлеуеті сақталуда. Қазатомөнеркәсіп, Kaspi.kz, Халық банкі және Solidcore акциялары жоғары қарай қозғалысын жалғастыруы мүмкін.  Бұл ретте біз жергілікті үзілістерге дайын болуды ұсынамыз, олардың бірі алдағы екі апта ішінде орын алуы ықтимал.