Инвестициялық шолу №353. Жаңа бағдарларды іздеу

Palo Alto Networks

Palo Alto Networks (PANW) 2026 қаржы жылының (ҚЖ) төртінші тоқсаны бойынша нарық консенсусынан және компанияның өз болжамдарынан жоғары нәтижелер көрсетті. Бұған платформалық стратегияны табысты іске асыру ықпал етті. Компанияның жаңа буын киберқауіпсіздік шешімдері бойынша жылдық тұрақты түсімі (ARR) бір жыл ішінде 63%-ға өсіп, 9,1 млрд долларға жетті. Тоқсан ішінде бұл көрсеткіштің таза өсімі шамамен 1 млрд долларды құрады. Бұл корпоративтік клиенттердің жекелеген өнімдер жиынтығынан бірыңғай қауіпсіздік платформасына көшуге дайын екенін растады. Орындалмаған міндеттемелердің жиынтық көлемі (RPO) де қарқынды өсуді жалғастыруда. Есепті кезеңде ол жылдық мәнде 34%-ға артып, 21,2 млрд долларға жетті. Бұл бірнеше жылға жасалған ірі келісімшарттардың және Network Security, SASE мен Cortex экожүйелеріне деген тұрақты сұраныстың арқасында мүмкін болды. Компания басшылығының 2027 қаржы жылының бірінші тоқсаны мен бүкіл жылға арналған оң болжамы да маңызды жағымды белгі ретінде бағаланады. Бұл ақпараттық қауіпсіздік инфрақұрылымын шоғырландыруға деген жоғары сұраныстың сақталатынын көрсетеді. Компанияның негізгі өсу драйверлері қатарына терең платформаландыруды таңдаған клиенттер базасының кеңеюі, тапсырыс берушілердің бұлтты ортаға көшуі, сондай-ақ жасанды интеллект дәуірінде корпоративтік деректер мен модельдерді қорғауға деген бизнестің қажеттілігінің артуы жатады.

 

Жаңа буын қауіпсіздік шешімдерінен түсетін ARR динамикасы.
Дереккөз: PANW IR презентация

 

Lululemon Athletica

Lululemon Athletica (LULU) акциялары жыл басынан бері 50%-ға арзандап, ал 2023 жылы тіркелген тарихи максимумнан бері шамамен 75%-ға төмендеді. Бұл динамика Nike (NKE) акцияларының қозғалысын еске салады. Мұндай ауқымды түзетуге 2026 қаржы жылының екінші тоқсанында сатылымдардың жылдық мәнде 4,3%-ға азайып, 2,42 млрд долларға дейін төмендеуі себеп болды. Негізгі қысым Солтүстік Америка нарығынан келді, мұнда түсім 8%-ға қысқарды. Халықаралық сатылымдардың өсімі де баяулап, жылдық есепте небәрі 4%-ды құрады. Есепті кезеңде салыстырмалы сатылымдар Солтүстік Америкада 12%-ға, ал Қытайдың материктік бөлігінде 2%-ға төмендеді. Компания басшылығы мұны брендке қатысты бұқаралық ақпарат құралдары мен әлеуметтік желілердегі жағымсыз пікірлердің әсерімен байланыстырды. Үшінші тоқсанға арналған болжам да сақтық сипатында қалуда. Lululemon Солтүстік Америкадағы сатылымдар тағы 15%-ға қысқарады деп күтеді, ал компанияның жалпы түсімі жылдық мәнде 10–11%-ға төмендеуі мүмкін. Басшылық ағымдағы қаржы жылы бойынша сатылым болжамын екінші рет төмендетіп, оны 10,35–10,5 млрд доллар деңгейінде белгіледі. Бұл компанияның жылдық түсімі 5–7%-ға қысқарады дегенді білдіреді. Сонымен қатар Lululemon жаңа дүкендер ашу жоспарын да қайта қарап, кеңею қарқынын бәсеңдетті. Бұл компанияның қазіргі жағдайда операциялық тиімділікті сақтауға және негізгі нарықтардағы сұранысты қалпына келтіруге басымдық беріп отырғанын көрсетеді.

LULU акциялары бағамының графигі. 
Дереккөз: FactSet

 

NVIDIA 

NVIDIA (NVDA) компаниясының тоқсандық нәтижелері нарықтың орташа күтулерінен жоғары болғанымен, акция бағасының реакциясына негізінен компания басшылығы алғаш рет ұсынған жылдық болжам әсер етті. Бұл болжам сұраныстың бағасы ретінде емес, жеткізілім мүмкіндіктерінің шекті деңгейі ретінде ұсынылды. Осыдан кейін компанияның келешегіне қатысты басты сұрақ ағымдағы өсу циклінің жалғасуында емес, NVIDIA-ның оған физикалық тұрғыдан қызмет көрсету мүмкіндігінде болып отыр. Басқаша айтқанда, нарық енді сұраныстың жоғары болуына емес, компанияның осы сұранысты уақытында қамтамасыз ете алу қабілетіне көбірек назар аударуда. Корпорация басшылығы жады чиптері құнының өзгеруіне байланысты жалпы рентабельділік бойынша болжамын төмендетті. Сонымен қатар төлемдерді жүзеге асыру мерзімдерінің ұзаруы аясында пайданың ақша ағымына айналу тиімділігі әлсіреді. NVIDIA балансында сала үшін бұрын-соңды болмаған көлемде сатып алу міндеттемелері, клиенттік компаниялардағы үлестер және оларға берілген кепілдіктер жинақталған. Бұл факторлардың ешқайсысы компанияның өсу қарқынына тікелей байланысты емес. Керісінше, олардың барлығы табыс сапасына және компания балансының жай-күйіне қатысты мәселелерді көрсетеді.

 

Тоқсандық есепке дейінгі және кейінгі Nvidia кірісі бойынша болжамдар, млрд АҚШ доллары.
Дереккөз: NVIDIA, FactSet, Freedom Broker

 

Tesla 

Tesla (TSLA) Остинде толық автономды екі орындық Cybercab роботаксиін коммерциялық пайдалануға енгізді. Қазіргі уақытта Техас штатында мұндай небәрі 45 көлік тіркелген. Дегенмен, Cybercab таныстырылымы инвесторлардың көңілінен толық шыға қойған жоқ. Себебі компания көліктің нақты бағасы, өндіріс көлемі және сервисті кеңейту жоспары туралы егжей-тегжейлі ақпарат берген жоқ. Осыдан кейін Tesla акциялары шамамен 6%-ға төмендеді. Акцияларға қысым жасаған тағы бір фактор ретінде АҚШ-тың Ұлттық жол қозғалысы қауіпсіздігі басқармасының (NHTSA) тергеуі аталады. Ведомство федералдық қауіпсіздік стандарттарына сәйкестігі бойынша шамамен 1 мың Cybercab көлігінің өзіндік сертификаттау рәсімін тексеруде. Bloomberg Intelligence сарапшыларының пікірінше, Cybercab үшін жеке өндірістік желінің болуы Tesla-ға бұл көліктердің шығарылымын Model Y өндірісімен қуаттар үшін бәсекелеспей-ақ ұлғайтуға мүмкіндік береді. Сонымен қатар сарапшылар жобаның біртіндеп ауқымданатынын күтеді. Олардың бағалауынша, жақын перспективада роботакси қызметінің компания пайдасына қосатын үлесі шектеулі болып қала береді. Ал бұл бағыттың айтарлықтай табыс әкелуі 2027 жылдан бастап неғұрлым ықтимал деп саналады.

 

Tesla-ның 2030 жылға дейінгі жалпы пайдасы (млн доллар). 
Дереккөз: Bloomberg Intelligence, Freedom Broker

 

PayPal

Bloomberg деректеріне сәйкес, Stripe пен Advent қорлары PayPal (PYPL) компаниясын сатып алу жоспарынан бас тартты. Бұған дейін консорциум бір акция үшін $60,5 ұсынып, компанияны 53 млрд доллардан астам сомаға бағалаған болатын. Алайда Reuters агенттігінің мәліметінше, PayPal директорлар кеңесі бұл ұсынысты жеткіліксіз деп санаған. Бұдан бөлек, мәмілені жүзеге асыру кезінде реттеушілік және қаржылық сипаттағы қиындықтар болуы мүмкін екені де айтылған. Сатып алу әрекетінен бас тартылғаны туралы хабар жарияланғаннан кейін 28 тамызда PayPal акцияларының бағасы 12,7%-ға төмендеді. Нарықтың мұндай реакциясы ықтимал мәміленің акция бағасына оң әсер ететін фактор ретінде бағаланғанын көрсетеді. Консорциумның жоспарларын өзгертуі жақын уақытта компанияның сыйлықақы қосылған бағамен сатып алыну ықтималдығын төмендетіп, PayPal акциялары үшін маңызды өсу катализаторларының бірінен айырды. Сонымен қатар енді компания қызметінің нәтижелеріне қойылатын талаптар да күшейе түспек. PayPal акционерлерге бизнесті сатудан гөрі дербес даму әлдеқайда тиімді болатынын дәлелдеуі қажет. Осыған байланысты инвесторлардың назары компанияның қаржылық есептілігіне және бизнесті трансформациялаудың жаңа стратегиясын іске асыру барысына ауысып отыр. Эмитенттің төлем айналымы өсіп жатқанымен, пайдасы төмендеуде. Сондықтан PayPal жаңа стратегия аясында нарықтағы бәсекелік позициясын сақтап қалып, қаржылық көрсеткіштерінің тұрақты жақсаруына қайта орала ала ма деген сұрақ әзірге ашық күйінде қалып отыр.

 

Stripe және Advent-пен келіссөздер аясындағы PYPL бағасы мен сауда белсенділігі динамикасы.
Дереккөз: FactSet, Bloomberg, Reuters