Финансист №1 (29) 2023

Фото: Татьяна Романенконың жеке архиві

Тутта Ларсен, шын аты — Татьяна Романенко, — журналист, теле- және радиожүргізуші. Күйеуі және балаларымен бірге Карусель балалар арнасында «Семья на ура!» бағдарламасын жүргізеді

Сіз MTV және МУЗ-ТВ-дегі жұмыстың арқасында белгілі адам болдыңыз. Сол уақыттан бері сіз және сіздің жұмысқа деген қатынасыңыз қалай өзгерді?

Сұрақ ауқымды екен, кәсіби сұрақ емес, метафизикалық десек болады, өйткені маған өмір мен кәсібімді бөліп қарастыру қиын. Мен қазір өзіме ұнайтын дүниені қалай жасау керектігін жақсы білемін. Егер MTV уақытында ол музыка және жастардың қосалқы мәдениеті болса, ал қазір менімен бірге өскен 30–40 жастағы азаматтарға, яғни менің көрермендеріме, бала, отбасы, қарым-қатынас, рухани ізденістер, сенім және тағы басқа тақырыптар қызықты.

Идеяларды қайдан аласыз?

Мен оларды өз өмірімнен табамын. Менің кәсіби қызметім — бұл үнемі өзіңді тану, сұрақтарға жауап іздеу және ең алдымен өзімді дамыту. Бұл тақырыптар өте жалпы болғандықтан және осы өмірде дамуға әрі бір нәрсені білуге деген ұмтылысы бар әрбір адамға қатысты болғандықтан, маған оларды жеке ізденіс деңгейінен толыққанды журналистік зерттеуге дейін масштабтау қиын емес.

Мен адамдардан шабыт аламын. Адамнан қызық ешнәрсе жоқ. Кез келген адамның есігін қақсаңыз, сол жерден бәрін табуға болады деп есептеймін: ерлік те, ғажайып нәрселер де, сатқындық, трагедия, комедия, драма да бар. Адамдар — менің ең сүйікті тақырыбым. Әлемдегі шабыт беретін де, кері тартатын да — адамдар.

Жұмыс пен демалыс арасындағы тепе-теңдікті қалай ұстайсыз? Бос уақытыңызды қалай өткізуді жөн санайсыз?

Мен үшін жақсы демалыс — бүкіл отбасыммен қызмет түрін ауыстыру. Бүгін біз балалармен демаламыз, ертең бір жобада бірге жұмыс істейміз.

Отбасыңызда қаржылық сауаттылық мәселелерін талқылайсыз ба?

Менің балаларым жастайынан жұмыс істейді, әрине мен оларға кішкентай кезінен бастап ақшаға деген дұрыс қарым-қатынас қалыптастыруға тырысамын. Біз ақшаның мәнін, оны қалай пайдалану керектігін және неге ақша адамның өміріндегі басты мақсат емес екенін талқылаймыз. Менің балаларым ақша деген не, оны табудың қиындығы мен жұмсаудың ләззаты туралы біледі.

Сіздің қызыңыз Марфамен бірлесіп кулинарлық шоу жүргізесіздер. Ол өзінің табысын қалай жұмсайды?

Біз оны әдетте тұрмыстық қажеттіліктерге, қажетті заттарға: киім, аяқ киім және басқа да нәрселерге бірге жұмсаймыз. Сонымен қатар балаларда үнемі олардың қалауларына арналған біраз ақша болады. Ол коньки, велосипед, жаңа телефон сияқты қымбат бұйым болуы мүмкін, кейде аса қажет емес, бірақ жағымды әсер ететін кәмпит немесе лимонад сияқты заттар алады.

Тутта Ларсен отбасымен. Фото: Татьяна Романенконың жеке архиві

Жалпы отбасыңызбен жұмыс істеу сізге қалай?

Ол деген бір рахат нәрсе! Бір жағынан, күшіміз бен уақытымызды жұмсауымыз керек, сценарий бойынша әрекет етуіміз керек, екінші жағынан — бұл бірге болудың тағы бір жолы.

Біз тамаша жоба ойлап таптық — балалармен отбасылық саяхаттар туралы «Путь и родитель» атты бағдарламалар циклі. Бұл жоба мәдени бастамалардың Президенттік қорының грантына ие болды. Бірінші маусымда біз Мәскеуге жақын орналасқан, автокөлікпен үш сағатта жетуге болатын және мысалы, Суздаль сияқты тым танымал емес қалаларға бардық. Сонда да ол жерлерде балалармен бірге баруға болатын көптеген қызықты іс-шаралар, дәмді тағамдары бар мейрамханалар, таңғажайып мұражайлар мен басқа да көрнекті орындар бар.

Мұндай саяхат жазбаларын жүргізу өте қиын жұмыс. Мысалы, алғашқы шығарылымдардың 70%-ы қыста көшеде түсірілген, ол кезде әлі де суық болды. Сонымен қатар балалармен бірге жаңа орындар ашу, әсер алу, бір нәрсені зерттеу, үйрену және бәрін бірге жасауды үйрену — үлкен рахат. Кадрдағы бірлескен жұмыс қарапайым өмірде де басымызды біріктіреді, өйткені біз бір-бірімізге мұқият және төзімді боламыз. Отбасыммен жұмыс істеу маған жұмыстан тыс қарым-қатынас орнатуға көмектеседі және бұл балалар үшін де пайдалы: олар тезірек жетіледі, ұқыпты әрі жауапты болады.

Алғашқы табысыңызды қайда жұмсадыңыз? Уақыт өте келе ақшаға деген көзқарасыңыз қалай өзгерді?

Мен алғашқы табысымды Донецк облысының Ханженково-Северный ауылындағы «Шахтерское слово» атты жергілікті көп тиражды газеттегі мақалам үшін алдым. Менің анам бас редактор болды, мен сол жерде жастар бағанасын жүргізіп, ауыл балаларының мектеп өмірі туралы жаздым. Бұл менің алғашқы табысым болды, мен оны әрине, анама бердім.

Менің ақшамен біртұтас қарым-қатынасым бар. Мен ешқандай қаржылық тәртіпті сақтамаймын, 14 жасымнан бастап ақша тапсам да, ештеңеге инвестиция салмаймын. Мен өз отбасым үшін лайықты өмір сүру деңгейін қамтамасыз етуге жеткілікті ақша төлейтін сүйікті жұмысымды істеп жүрмін.

Дәл қазір бір нәрсеге ақша жинағыңыз келе ме?

Әрқашан бір нәрсеге ақша жинауды армандайсың ғой. Бізде үнемі ақша салуды қажет ететін керемет саяжай бар: өсімдіктер отырғызу, шағын қонақ үй салу, жаңа көлік сатып алу. Бірақ мұның бәрі арман емес, жоспар. Мен сондай-ақ желкенді қайықты, күйеуім екеуміз қартайған шақта жылы теңіздерде жүзе алатын шағын теңіз яхтасын алғым келеді. Бірақ егер бізде мұндай қайық болмаса, менің қарттық шағым қызық болмай қалады деген сөз емес!

Егер менде сансыз ақша болса, онда мен оны сағатқа жұмсар едім. Бұрын мен сағатқа қатты қызығатынмын, меніңше ол механикасы мен әдемілігі жағынан адамзат ойының шыңы сияқты көрінетін. Бірақ бүгінгі көзқараспен бұл жай ғана күлкілі нәрсе сияқты. Мен қазір ақшаны мені осы жерде және дәл қазір қуантатын заттарға жұмсар едім.

Тутта Ларсен жұбайы және балаларымен. Фото: Татьяна Романенконың жеке архиві

Қазіргі уақытта тағы қандай жобалармен жұмыс істеп жатырсыз? Болашақта нені жүзеге асыру қызықты болар еді?

Біз қазір мен айтып өткен керемет «Путь и родитель» жобасында жұмыс істеп жатырмыз. Жаңа маршруттар жасап, сапарлар үшін жыл мезгілін таңдаймыз. 10 қалаға баруды жоспарлап отырмыз. «Карусель» арнасы үшін түсірілімді де жалғастырамыз.

Біздің барлық жобаларымыз отбасы, тәрбие, бала тақырыбына арналған, және бізде YouTube арнасындағы «Вера в большом городе» бағдарламасына ұқсас хабар жүргізу ойы бар. Мен адамдар тек дін туралы ғана емес, жалпы өз құндылықтары, өмірде оларға не көмектесетіні, не шабыттандыратыны, не қымбат екені, оларды не қуантатыны және айналасындағы әлемді жақсы жаққа өзгертуге не көмектесетіні туралы айта алатын форматты жүзеге асырғым келеді.

Біздің тағы бір перспективалық жобамыз «Счастливы по-разному» деп аталады. Мен өмірдің барлық қиындықтарына қарамастан бірге болатын, бір-бірін жақсы көретін, өмірге бала әкелетін, сүйіспеншілікті арттыратын және отбасын нығайтатын қиын тағдыры бар қарапайым адамдар туралы айтқым келеді. Бұл менің сүйікті тақырыбым!